Gilbert Renthlei

Baptistu Johana hnua thuhriltu hmuhnawm ber

Billy Sunday

               Tun tum chu American Baseball player hmingthang, ropuina hrang hrang khumtu, mahse mahni ropuina aia Pathian rawngbawl thlangtu Evangelist hmingthang Billy Sunday-a chanchin ve thung aw!

            Billy Sunday hi Ames, Iowa, USA-ah Nov 19, 1862 khan a piang a. A pa hi Germany atanga US-a pem lut Sonntag-a niin US a pemluh hnu hian William Sunday tiin a hming a thlak ta a. A pa William-a hi lung mistiri niin sipaiah te a tang zak zak a, Billy Sunday-a naupan laiin a pa hian a thihsan a, hei vang hian a nu Mary Jane Sunday hian a Billy-a te unau hi a an pi leh pu te bulah a pempui ta a ni.

            An pi leh pu te bulah chuan an awm reng thei lo va. Tichuan a nu chuan pasal dang neiin hmundangah an insawn leh a, a pahrawn pawh hian a hnu lawkah a kalbosan leh avangin an nufa za hian an rethei hle. Hetianga an retheih em avang hian kum 10 mi anihin a nu chuan Billy-a leh a u  te chu Glenwood, Iowa-a fahrah chawmna in Soldiers Orphan Home-ah a dah a. He fahrah chawmna in atang hian Billy-a pawhin zirna mumal tak leh nundan mawi tak zir chhoin infiamna lamah talent tha tak a nei tih hriatchhuah a ni chho ta a ni.

            Kum 14 mi anihin fahrah chawmna in chu a chhuahsan a. Nevada, Iowa-a Colonel John Scott-a hnuaiah hna thawkin a inhlawh a. John Scott-a hian duat taka lo enkawl hna a thawh karlakah Nevada High School-ah lehkha a zirtir pah a. High School hi zir zo lo mahse pianpui finna nei mi niin hriatna tam tak a chhar tho a ni.

            High School a kal lai hian infiamna lamah a inhmang chho a, Baseball chu a ngainat bakah a khel thiam hle. Tichuan kum 1880-ah Fire Brigade Team-a khel tura lak niin Nevada atangin Marshalltown, Iowa-ah  a pem ta a, hlawhtlinna a hmuchho ta.

            A talent ropui tak hi hmuin Marshalltown Baseball player lar tak Adrian “Cap” Anson chuan National League Champion lai Chicago White Stockinga-a a khelh theih nan hma a lak pui ta a, a che tha theiin a thiam em avang chuan player thar nimahse fans tam tak a nei nghal a, hun harsa tak tak laka an team chhanchhuaktu pawimawh tak a ni a, a lar chak hle mai. A thiam bakah a tlanchak em em a, chu a chhapah a nungchang a mawi em em bawk. Hei vang hian fans te leh a khelhpui te ngei pawn an ngaina hle. Mi rintlak tak a nih bawk avangin an team manager Cap Anson chuan Chicago White Stockings team Business Manager atan a ruat hial a ni.

            Billy-a hi club hrang hrangin an inchuh nasat em avangin America rama Baseball Club lar tak takah a khel kual a. Chicago Whote Stockings atangin kum 1888 khan Pittsburgh Alleghenys-ah a insawn a, chuta tangin Philadelphia Phillies-ah kum 1890 khan a insawn leh a, heng team tan hian tha taka khelin fans te’na an duh ber a ni chho a, a record pawh a tha hle.

            Billy-a hian a damchhungin Baseball infiamna hi a ngaina em em a, a remchana hun a neih phawt chuan Baseball tournament a en ziah thin. Rawngbawla a vahchhuahnaah te pawh Baseball chungchangah interview a hmachhawn fo va, sawm anih angin inkhel te a ham sak (umpired) fo thin a ni.

            Piantharna: Chicago White Stockings-a a khelh lai, kum 1886-1887 season khan a khelhpuite nen tlai khat chu khawlaiah an leng chhuak a. Kawtthler pakhata an kal lai chuan zaipawlin a naupanlaia a nuin a sak thin Rev Robert Lowry-a hlaphuah “Where is My Wandering Boy Tonight?” tih hla an sak chu an ngaithla a. Chulai hmunah chuan Pacific Garden Mission-in rawngbawlna an lo nei mek a ni. Chu zaipawl hlasak chuan engemawtakin Billy Sunday-a thinlungah chuan thu a sawi ta. Tichuan chulai hmunah chuan inkhawm duhna rilru neiin inkhawm tur chuan a kal ta thin a, chulai hmuna hnathawka awm nu pakhat chuan Billy-a nun ruak tak chu a hmuhin Krista chu lal leh chhandamtua a pawm ngei theih nan tan a lo la sauh sauh a, Billy-a hnenah chuan fuihna thu nasa taka hrilhin a tawngtai sak ta thin a. Tichuan Billy-a pawh chuan a rilru siamin Isua chu Lal leh chhandamtuah a pawm a, a piangthar ta a ni.

            Tlangval nungchang tha tak nimahse a pianthar hma hian Billy-a hian zu te inin pawisa te a khel ve fo thin a. Mahse hetia a pianthar tak hnuah erawh hi chuan chung a lo tih thin te chu a bansan ta hmak a, nasa taka an thlem pawhin Pathiannia inkhelh pawh a duh ta bau lo.

            Nupui: Kum 1886 khan Billy Sunday-a hi Chicago khawpuia bawnghnute hmanga sumdawng lian ber fanu Helen Amelia Nell Thompson nen Jefferson Park Presbyterian Church-ah an inhmelhriat tir a. Heta tang hian an pahnih hian inhmelduhin an inngaizawng chho ta. Mahse chhungkaw hausa leh changkang tak Nell Thompson-i te leh fahrah chawmna in atanga chawrchhuak Billy Sunday-a te dinhmun chu a inthlau hle mai. USA-a baseball khelthiam hmingthang nimahse Nell Thompson-i pa chuan  an inneih chu a remti mai lova. Mahse an pahnih chuan an inhmangaih em avangin Sept 5, 1888 khan an innei ta a ni.

            Rawngbawl duhna: Nupui a nei a, Baseball player hmingthang tak niin Philadelphia Phillies teamah a khel bawk a. Heti chung hian Billy Sunday-a chuan a nunah duhkhawp lohna lian tak mai a nei a. A duh ber chu a pianthar tirh atanga a duh ber hun puma Pathian rawngbawl hnathawh a ni. Kum 1891 a lo ni a, a rilru a siam ta. Baseball team lian tak tak te chuan dollar 3000-5000 chuang hlawh turten an rawn sawm ta luai luai a. Mahse Billy-a chuan chung sawmna te chu Pathian rawngbawl a duhna liantak avangin a hnar fithla fai ta vek a, tichuan dollar 5000 hlawh thei chuan thlakhata dollar 83 hlawh turin Chicago-a Young Men’s Christian Association (YMCA) hnuaia hnaruak thawk turin a inpe ta a ni.

            Chicago YMCA-ah hian Billy-a hian Assistant Secretary hna a thawk a. Office lama a hna bakah hmun hrang hrangah rawngbawla a vahchhuah a ngai a, hei hi a hnu zela a rawngbawlna atana Pathianin a buatsaihna a lo ni reng a ni. Tichuan kum thum chhung chu Assistant Secretary ni chungin damlo te a tlawh a, mi mangangte tana tawngtaina hun hmun hrang hranga hmangin, mahni intihhlum tumte a chhanchhuak a, zu hmun te luhchhuakin Kristian inpawlhona hrang hrangah te rawngbawlin hun a hmang chho ta a ni.

            Kum 1893 atangin hetih hunlaia America rama Evangelist lar ber mai J. Wilbur Chapman-a assistant hna a thawk a. Hetah hian a hna ber chu J. Wilbur Chapman-a rawngbawlna tur atana inbuatsaihna lo kalpui te, tawngtai inkhawm leh zaipawl buatsaih te leh thil tul ang zawng zawng buaipui a ni. Hetianga J. Wilbur Chapmana puibawmtu bera a tan chhung hian Bible chang behchhana thusawi (Homiletics) leh sermon phuahkhawm dan te a inzir fing hman hle a, Wilbur Chapman-a pawh hian nasa takin Pathian thu zir turin Billy-a hi a nawr a, thuhriltu tha taka chherchhuah tumin a fuih sauh sauh thin a ni.

            Ama puala rawngbawlna: Kum 1896 khan J. Wilbur Chapman chu Pastor hnathawk turin Philadelphia-ah a let leh a, heta tang hian Billy Sunday-a pawhin ama pualin rawngbawl hna a thawk ve tan ta. January 1896-ah a vawikhatnan Garner, Iowa-ah rawngbawlna a nei a, hmun hrang hrangah rawngbawl chho zelin Presbyterian kohhran chuan Pathian thuhrilna License chu kum 1898-ah pein kum 1903 khan ordained a ni ta bawk. Tichuan thingtlang khaw te tak te teah te rawngbawlna a nei chho ta zel a, amah Baseball khelthiam hmingthang a lo ni tawh bawk nen, a larna a hmang tangkai thiam a, mipui a hipkhawm tam thei hle.

            Billy Sunday-a thusawi dan hi a hriam a, a tlang bawk a, a tawngkam hmanah te pawh tawngkam bawraw pui pui entirnan jackass, bastard etc ang chi a hmang nasa hle a, hei vang hian sawisel a hlawh  nasat phah hle. Sawisel hlawh viau mahse Billy Sunday chuan, “Chanchin tha hi a mawlmang thei ang ber leh misual te pawhin an hriatthiam theih tura sawichhuah ka duh a, hmun kilkhawr tak tak a misual bawraw pui pui ten tawngkam un tak tak ka hman chuan an hrethiam dawn si lo a, chuvangin an tawngkam hman ang ka hman ve a tul ani,” tiin an sawiselna hi a chhang thung.

            Tin Billy Sunday-a hi a hmuhnawm thei hle a, a ing euh nasa thei hle. Hei vang hian Baptistu Johana hnua thusawitu hmuhnawm ber an tifo thin reng a ni. A chang chuan a thusawi laiin dawhkan chungah te a lawn a, a kun vak vak a, chair te a vaikual a, a tlan kual a, a zuang bawk thin. A sermon sawi dan style danglam tak avang pawh hian mi tam tak a hip hle a ni.

            Kum 11 chuang rawngbawla a vahchhuah hnuah sawmtu a ngah hle a, America ram dung leh vangah Billy Sunday-a chu Evangelist lar ber pawl a ni a, rawngbawl dan tur leh ruahmanna hrang hrang duan lawk chu hna pakhat atling chho ta. Tichuan kum 1908 khan a nupui Helen Amelia Nell Thompson chu Manager atan a chhawr ta a. Nell Thompson-i hnuaiah hian Billy-a pawhin hmasawnna a chhar chhuak hnemin rawngbawl dan kalphung pawh a thlak nasa hle. Rawngbawlnaa tawiawm tu tur Musicians te, Bible zirtirtu te, zai hruaitu leh mi hrang hrang an chhawr ta a ni. Hemi atang phei hi chuan sawmtu a ngah leh zual a, mipuiin an lawm em em a, Billy Sunday-a chanchin leh a thusawi te chu America rama chanchinbu lian ten an chhuah deuh reng mai a ni.

            Billy Sunday-a hian American evangelist dangte ang lo takin a hunlaia khawtlangin harsatna an tawh hrang hrang a vei em em a, naupang chhawr luih te, hmeichhiate dinhmun hniam bik leh vun rawng inthliarna te chua vei a, a auchhuah pui nasa hle thin. Zu a haw hle a, “Ramhuaiin enge an tih thin in hriat duh chuan Zu dawrah enge an tih tih va en mawi rawh u!” tih te, “Hremhmunah hian Jubillee lawm ta se, chu Jubillee chu Zu an hmuhchhuah Jubille a ni ngei ang,” ti tein Zu hi a sawichhe thin a ni. Kum 1919-a America ramin Zu khap burna dan an siam ah pawh khan a thawhhlawk hle a, mipui hnenah pawh a campaign nasa hle. Kum 1933-a he Zu khapna hlih a nih pawh khan Billy-a hian hman anih leh theih nan a bei leh nasa hle a ni.

Amah hi mi conservative tak mai niin Presbyterian kohhran ordained nimahse a ministry hi chu pawl bik awm lo(non-denominational) takmai a ni thung. Liberals ho a ngaithei lo hle a, “Tunlai hian Isua kha Nula thianghlim hrin ani tih ringhlel khawpin sex lamah kan thiangzau tawh a, Isua thawhlehna ringhlel khawpin kan in zirsang ta,” tiin a sawi thin. Sual a haw em em mai a, heti hian sual a huat zia a sawi thin, “Sual hi ka hua a ni. Ke ka neih chhung chu Sual hi pet ka duh a, Kuttum ka neih chhung chu hnek ka duh. Lu ka neih chhung chuan tauh ka duh a, Ha ka neih chhung chuan seh ka duh a ni. Ka upat huna kut, ke leh ha ka neih loh hunah pawh sual hi tihboral anih a, kei vanram ka luh thlengin thial char char mai ka duh a ni,” tiin.

            Billy Sunday-a hi American Evangelist zinga sawm hlawh ber pawl a ni a, rawng a bawl chhung hian mihring Vaibelchhe 1 chuang hmaah thu a sawi a, mi nuai 12 chuangin piantharna an chang niin chhut a ni. Kum 1912-a Wilkes Barre hmuna crusade a neih tum phei chuan he khuaa cheng zawng zawng zatve lai mai chu an piangthar a,Wilkes Barre khaw mipui tam tak chuan zuin an bansan tak avangin zu dawr 200 chuang khar a nih phah a ni.A rawngbawlna khua te’n zuin an bansan duak thin avangin Zu siamtu company te chuan Billy Sunday hi an do nasa hle a ni

Heti khawp hian Pathianin hmang nasa mahse fa enkawl kawngah a hlawhchham ve hle a, a fapa pathum te chuan an pa dodal nasat em em zu leh pawisa khelh ngawl an vei ve thung a, mi tam tak Kristiana a siam laiin a fate ngei pawh Kristian an ni lo tiin beih a tawk nasa hle a, an nupa chuan an fate chungah an beidawng ve hle a ni. A thih hma kum hnih lekah an fapa George-a chu amah ala intihlum zui bawk nen, an fate hian Billy-a te nupa nun an khawih chhe nasa hle.

Indopui I-na a tawp chhoh hnu khan Radio leh TV te a lo lar chhoh avangin Billy-a lar zualpui pawh a reh chho a, ti chung hian hmun hrang hrangah thusawia sawmtu a ngah hle tho. A hriselna pawh tlahniam zelin lung thalo a nei chho a. A doctor pawhin pulpit atanga inthiarfihlima thusawi bansan turin a ngen a. Mahse Doctor thurawn chu pawm loin Pulpita thusawi chu a bansan chuang lo a. Tichuan a sermon hnuhnung ber, “Chandam ni turin enge ka tih tur” tih a sawi atanga kar khat hnu leh Nov 6, 1935 khan a rawng a bawl sak thin Pathian hnena chawl turin he khawvel hi a chhuahsan ta a ni.