Gilbert Renthlei

Rev RICK WARREN        

 Tunlai khawvela Pastor lar ber mai, Rev Rick Warren-a chanchin hi  ziak tura ngenna a awm nual avangin tun tum chu Mega Church lar tak Saddleback Church-a Senior Pastor Rev Rick Warren-a chanchin hi kan thlurbing leh dawn a. A chanchin kan luhchilh hmain hriatzau nan enge Mega Church awmzia han sawi phawt ila.

              

                     Mega Church: Megachurch tih hi khawvel ram zau zawka kohhran lian zualte sawi nan hman a ni thin a, kartawp inkhawmnaa member 2,000 aia tam inkhawm ziahna kohhran hi Mega Curch tiin koh a ni. US-ah khuan hetiang Mega Church hi tam tak a awm a, The Hartford Institute in a zirchian danin US ringawtah khuan Protestant ho Mega Church hi 1,300 chuan a awm niin tarlan a ni. He zirchiannaah hian kar tawp inkhawma member 10,000 – 47,000 chuang inkhawm awmna thin kohhran 50 chuang a awm a, US a Mega Church lian ber chu Lakewood Church, Houston, Texas ami niin kar tawp apiangin he kohhrana inkhawm hi mi 40,000 an chuang ziah a ni. South Korea hian khawvela Mega Church lian Top 10-a lang pha Mega Church 5 an nei a, khawvela Mega Church lian ber pawh member 8,30,000 chuang nei Yoido Full Gospel Church, Seoul, S. Korea a mi a ni. Heng Mega Church te hi inkhawmpui lian a ni hawt mai a, Stadium hman bikah te, kar tawpah an inkhawm a, Pastor pawh engemawzat an nei thin a ni. Awle duhtawk dawn ila, Mega Church Senior Pastor Rev Rick Warren a chanchin in chhunzawm ang.

                Pian leh seilenna: Rick Warren-a hi San Jose, California-a January 28, 1954 khan Jimmy Warren leh Don Warren te inkarah a piang a, a pa hi Baptist Pastor niin a nu hi High School pakhata Librarian hnathawk a ni. San Jose-ah hian piang mahse Warren-a hi Ukiah, California-ah a seilian a, Ukiah-a an awm lai, kum 1972 khan Ukiah High School atangin a graduate nghe nghe. Ukiah High School-a a luh lai hian an sikul huam chhunga Kristian pawl (Club) hmasa ber The Fisher of Men Club chu a din nghe nghe a ni.

                Warren-a hi Pastor fapa a nih angin a naupan lai atangin naupang fel tak mai a ni a, lehkha zir leh thusawi te pawh a timiin Leadership quality pawh a nei tha hle. California Baptist University, Riverside, California atangin B.A. a zo a, hemi hnu hian Southwestern Baptist Theological Seminary, Fort Worth, Texas atangin Master of Divinity a zo leh a, Fuller Theological Seminary, Pasadena, California atangin Doctor of Ministry a hlawhchhuak bawk. Kum 1979 khan Elizabeth K. Warren nen an innei a, a nupui nen hian fa pathum neiin tu pali an nei tawh a ni.

                Rawngbawlna: Kum 19 mi a nih lai, California Baptist University-a a zir laiin hun puma rawngbawl tura kohna a dawng niin Rick Warren hian a sawi thin a. November, 1973 khan a thian pakhat nen sikul tlanboin an sikul atanga km 350-a hla Jact Tar Hotel, San Francisco-a W.A. Criswell-a rawngbawlna chu an va chhim vang vang a ni. Hemi tum hian Warren-a te thiandun chuan Speaker hi chibai ngei tumin an va pan hnai a, an inchibai lai chuan W.A. Criswell chuan Warren-a mit-ah chiang taka enin, “Nangmah chibai tur leh i tana tawngtai tur hian thupek ka dawnin ka inhria,” tiin a hrilh nghe nghe a ni.

                Southwestern Baptist Theological Seminary-a a zir laiin Warren hi Billie Hanks Jr-a pawl peng pakhat Texas Ranch for Christ-ah a inhmang hle a, he pawla a awm lai hian lehkhabu ziak lam pawh a luhchilh tan a ni. Tichuan a lehkhabu hmasa ber The Victory Scripture Memory Series and the Twelve Dynamic Bible Study Methods for Laity chu Billi Hanks Jr leh Wayne Watts te nen inziah tawmin an tichhuak a, he lehkhabu hian a hnu zela a lehkhabu ziahnaah kawng a kawhhmuh nasa hle.

                Saddleback Church: Doctor of Ministry a neihna Fuller Theological Seminary-a a zirchhuah hnuin Saddleback Valley mipui, Pathian ngaihsak lo leh khawvel taka nung te a hmuhin Rick Warren hian helai hmun hi a rawngbawlna tura Pathianin a dahna niin a ngai a, tichuan Saddleback-a a inah Pathian thu zirna a hawng ta. A rin leh beisei aiin Saddleback mipuite chuan a Bible Class siam chu an hlut a, a ni tel a chhimtu mipui an lo punkhawm zel avang chuan kohhran anga mumal taka indin tulin an hre ta a. Tichuan April 6, 1980 Easter Sunday-ah chuan Laguna High School Hall-ah mipui vantlang inkhawm hmasa ber an huaihawt ta a, hemi tum hian mi 200 chuang an inkhawm a ni.

                He Saddleback kohhran hian mipui ngaihven a hlawh a, an kalphung, Rick Warren-a thusawi leh an hmalakna hrang hrang chuan mipui a hip em em a, kohhran pawh a thang chak hle mai. Saddleback kohhran hian member 10,000 an tlin hma chuan anmahni pualin Biak in an nei lo a, hmun remchangah inkhawm an huaihawt thin a ni. Kum 1990 chho khan Lake Forest Campus chu inkhawm nan an lei a, hetah hian mi 2300 lenna tur inkhawmna chu plastic tent hmangin an sa a, kum 1995 khan tuna an inkhawmna hmun hi mi 3500 lengin an sa zo leh a ni. Heta tang hian naupang pual inkhawmna tur (Children Ministry)  te, zirlaite puala inkhawmna leh a nawlpui inkhawmna tur te buatsaihin vawiinniah chuan mi 22,000 chuang inkhawm an awm ta ziah a ni.

                Saddleback Church hian Campus Acre 300 chuaanga zau neiin rawngbawlna kawng peng (community Ministry) 300 chuang  an hma a, Children Ministry, Missle School Ministry, High School Ministry, College Ministry leh Young Adult Ministry te kalpuiin an hlawhtling em em a, kartin zirlai 2,500 chuangin heng Ministry te rawngbawlna hi an rawn chhim thin a ni. Heng bakah hian Jail tang te, AIDS veite, hmeithai  leh ruihhlo ngaite zingah nasa takin rawng an bawl bawk.

                Heng bakah hian Rick Warren hian Pupose Driven Network of Churches chu dinin ram hrang hrang 162 chuangah an in zarpharh a, hemi hnuaiah hian Pastor leh puithiam 4,00,000 chuang training pein an chanchinbu tihchhuah Ministry Toolbox chu kohhran hruaitu 1,57,000 chuangin an la bawk a ni.

                Ziaktu ropui: Rev Rick Warren-a hi member sing chuang nei Saddleback-a rawng a bawl mai bakah Kristian literature huang chhunga lehkhabu ropui tak tak engemawzat a ziak a, heng a lehkhabu te hian ngainat an hlawhin khawvel pum huapah pawh a lehkhabu te hi an lar hle a, tawng hrang hrang 50 chuanga lehlin an ni tawh a ni. Chung Rick Warren-a lehkhabu ziak te chu-

The Purpose Driven Church (1995)

Answers to Life’s Difficult Questions (1999)

The Purpose Driven Life (2002)

What on Earth Am I Here For? (2004)

God’s Answers to Life Difficult Questions (2006)

God’s Power to Change Your Life (2006)

Rick Warren’s Bible Study Methods (2006)

The Purpose of Christmas (2008)

Heng zingah hian ‘The Purpose Driven Life’ hi a hlawhtling fal hle a, New York Times Best Seller niin Wall Street Journal leh Publishers Weekly-in lehkhabu hralh tha chart an siamah pawh copies maktaduai 30 chuang hralhin pakhatna a hauh chiang hle. Tin, a lehkhabu hmasa ber, ‘The Purpose Driven Church’ pawh hi a tha hle aniang, ‘100 Christian Books That Changed the 20^th Century’ ah telh niin kohhran hruaitute tana chhiartur lehkhabu tha ber-ah thlan a ni bawk.

                Sum ngaina lo: Rick Warren hian a lehkhabu ziak atang hian sum tam tak a huilut a, a hausak phah hle. A lehkhabu pakhat ‘The Purpose Driven Life’ kha Copies maktaduai 30 chuang a hralh kan tih tawh kha. He lehkhabu atang ringawt pawh hian copy khatah Dollar 1 chauh ei pawh nise a lo berah Dollar maktaduai 30 chu a huilut dawn tih a chiang reng mai. Chu achhapah a lehkhabu dangte pawh hi copies nuai chuang chuang a la hralh leh nghal a, dollar 1 chauh lehkhabu pakhatah a ei dawn lo tih lah a chiang ropui si, a lehkhabu hralhna atang hian sum, a mak amaka tam a rawn luanglut hum hum mai a ni.

                Chutih laiin Rev Rick Warren-a hi heng sum zozai hian a tibuai lo hle a, a khawsak pawh a tihsan phah chuang lo. Sana pawh Wall-Mart atanga a lei Dollar 17 man lek a la bun va va a, car pawh kum 11 chuang a lo khalh tawh Ford company siam a la khalh ve mai, a chhan chu sum leh paiin an chhungkaw khawsak a thlak danglam tur a ni lo tih chu an chhungkaw thuvawn a ni tlat atin ni. Hetianga a lehkhabu hralhna atanga sum tam tak a huiluh takah hian kum 25 chhung zet kohhran atanga hlawh a lo lak tawh chu kohhran hnenah a pekir leh vek a, an sum lakluh zawngzawng atanga 90% chu rawngbawlna kawng hrang hrang atana pechhuakin a la bang 10% hmangin an in enkawl ve naw naw a ni.

                Pastor lar: Lehkhabu ziak leh kohhran enkawl lama a hmingthan ang bawk hian Warren-a hi hmun hrang hrangah thusawi turin sawm a hlawh hle mai a, heng hunah te hian kohhran leh sakhua pawn lam bakah politics leh khawvel inlumlehdan boruak chungchangte a sawi tlangpui thin. United Nations, World Economic Forum, African Union, Council of Foreign Relations, Havard Kenedy School of Government, Global Health Summit etc-ah te sawm anih angin thu a lo sawi tawh a ni.

Kum 2003 khan Evangelical Christian Publishers Association chuan Gold Medallion Book Award a lo hlan tawh a, U.S News & World Report-in kum 2005 khan America’s Top 25 Leaders  thlanchhuah zingah a telh. Time Magazine chuan Khawvela mihring huhang ngah ber ber a thlan ‘100 Most Influential People in the World’ (2005) leh ’15 World Leaders Who Mattered Most’ (2004) (Khawvela Hruaitu pawimawh 15)ah te thlang tawhn Newsweek chuan ’15 People Who Make America Great’(America ti ropuitute) zingah a lo telh tawh bawk a ni.

August 2008 khan Saddleback Church hian hetih hunlaia American Presidential Election candidate pahnih John McCain leh Barack Obama te an ngaihdan sawipuina hun ‘Civil Forum on the Presidency’ chu an dawl a, a hmuipuipu ber atanRev Rick Warren hi a tang nghe nghe. He hunah hian Rev Rick Warren-a hian darkar khat chuang a hran ve ve in heng candidate pahnih te hi an rinna leh hringnuna thilthleng hrang hrang chungchanga an ngaihdan (human rights, abortion etc) a sawipui a, rampum huapah TV a pek chhuah a ni nghe nghe.

November 2008 khan President thlanna neih a ni ta a, Obama a lo tlin takah chuan amah lakluhna huna tawngtaisaktu tur atan Obama hian Rev Rick Warren hi a thlang ta a, neih inang inneih leh nau tihtlak chungchanga a ngaihdan avanga mawngkawhur hoin nasa taka an beihna karah Obama lakluhna inkhawmah hian Rev Rick WEarren hian Obama tawngtai sakna hun a hmang ta a ni.

Tunah hian Saddleback Church hnuaia programme hrang hrang buaipuiin a kul ataiin a inhmang reng a, hmun hrang hrangah rawngbawl tura sawm a hlawh hle. A nupui Kay Warren nen hlawkna um lo pawl pathum Acts of Mercy, RKW Legacy Partners leh Equipping the Church te an kal pui a, an rawngbawlna chuan hmun hrang hrangah par a chhuang mek a, a chhuang zel dawn a ni.