Sunday, August 5, 2012


Mizo Pastor hmasa ber
Rev Chhuahkhama

                Rev Chhuahkhama hi Phaileng East khuaah kum 1885 khan a piang a, a pa chu Parova a ni. Parova hi khawlhring hnam a ni a, Pasaltha, Ramvachal a nih avangin Parova hi Phaileng khuaah hian a lar ve hle thin. Hetianga ramchhuah atchilh tak anih avang hian in lamah pawh awm tam lovin ramhnuai lamah a tal tam hle a, engmah hian a ramchhuak tur an thulh tir thei lo.  Mahse Chhuahkhama a pian dawn tuk erawh hi chuan Parova pawh hian ramchhuah a lo tum vek tawh chu a thulh phah a, chuvang chuan a fapa lo piang hmingah pawh ‘Ramchhuahkhama’ tih a phuah ta a, mahse a hnuah ‘Ram’ tih hi pawihin Chhuahkhama' tih chu a pu hlen ta a ni.
                Chhuahkhama te khua hi Vailian in an haldarh tak avangin Pawibawiha fapa Thangkhama khaw din thar Sekaihah an insawn a, hemi hnu hian Patkhuihah kaiin reilote hnuah Tualbungah an insawn leh a. Heta tang hian Lungpherah an kai leh ta a ni.
               Chhuahkhama chu kum 15 mi vel anihin eizawnna kawng dap turin Aizawl-ah a thianpa Darnghaka nen a pa hriat lohin an kal ru ta a. Hetih hunlai hian Gurkhali Sipai hovin Mizo naupangte chu bel nawt atan an chhawr thin a, naupang thenkhat chuan belnawta inhlawh chung hian lehkha an zir thin a, Chhuahkhama pawh hian sipai belnawt chunga lehkhazir chu a chak leh Aizawl a kal chhan ber chu a ni.

                A tum ang ngei chuan Sipai bel nawta inhlawh chungin lehkha chu a zir ta a. Kum 1903-a Mizorama lehkha zir hmasate tana Lower Primary Exam hmasa berah pawh telin tha takin a pass nghe nghe. Chhuahkhama hi mi nungchang tha leh lehkha thiam thei tak mai a ni a, hetih hunlaia sap te pawhin Chhuahkhama hi an duh hle a, Kristian tha takah an siam zui ta a ni. Hetih hunlai hian Assam Chief Commisioner chhu Aizawl-ah a lokal a, sikul pawh a tlawh a, sikul naupang nungchang tha ber hnenah lawmman a pek duh thu sawiin zirtirtute chuan mipa lamah Chhuahkhama leh hmeichhe lamah Saii te an thlangchhuak a, Chief Commissioner chuan an pahnih chuan Tangkapui a pe ve ve a, Mizo zinga tangkapui hmu hmasa ber a ni.
                Lower Primary a pass hlim hian Chhuahkhama hi a tlangval ve uaih tawh a, tlangval hmeltha tak mai leh sam nalh bawk si, Assam hruaitu luber hmelhriat tham ni bawk si a nih avangin mi pawhin an ngaisang hle. Kum 1906-ah Upper Primary a exam leh a, chu pawh chu tha takin a passed leh ta. Upper Primary a passed hnu chuan Mission Sikul Inspector-in reilote a ruai a, mahse Major Cole-an hna pek a tiam avangin kum 1907 khan Aizawl leh Lunglei inkarah Dak Overseer hna a thawk ta a ni.
                Chhuahkhama hi Lower Primary a zirlai atang tawha Kristian tha tak anih avangin Dak Overseer hna thawka Aizawl leh Lunglei inkar a kar tawn zak zak lai pawh hian a zinchhuah changa a riahna khua apiangah Pathian thu a sawi thin a, a thusawi ngaihthlak duh vang pawh ni loin a hmelthat em avangin a bawr huai huai thin. Nula ho pawhin an star thei em em a, a hmelthat avangin thlemna tam tak a tawk a, mahse Pathian thu awih tak anih avangin tuman an thlem thlu zo lo.
                Kum 1908-ah Sialsuk-ah an sawn a, heta tanga a hna thawk tura tih a ni. Rei vak lo a thawh hnu chuan nuam a ti vak lo ngeni ban a tum ta a. A bang tur chu Major Cole a chuan a ui em em a, hna dang pawh ngaituah sak zui a intiam hial a. Hetih rual hian Pu Zosaphluia khan Cherra-a Pathianthu zir turin a lo thlem ve mek bawk a, tichuan kum 1909 khan sawrkar hna chu a bansan ta a ni.
                Hetia a ban hnu lawk atanh hian Zosaphluia hnuaiah Personal Clerk angin a thawk chhunzawm a. Tumkhat chu amah duhsak em emtu Bawrhsap Cole-a chuan Pu Zosaphluia fapa nen an leng dun lai a hmu a, “Babu hna thawk turin ka ti che a, Saphluia nau awma tan i duh zawk a ni maw?” tiin a chhuahchhal hial a. Mahse Cherra atanga a lo chhuah hnuin kawngah Major Cole-a nen hian an intawk leh a, “Tlangval sual tlanbvo tum mai emaw inih ka ti a, mahse thil ropui tak thawh tum i ni tih ka hre ta, ka lawm hle mai,” tiin Bawrhsap Cole-a chuan a fak ta thung a ni.
           Cherra-ah: Zosaphluia hnuaia a thawh hnuin kum 1910  February thlaah Chhuahkhama chu Cherra-ah Pathian thu zir turin a kal ta a, Mizo, Cherra-a Pathian thu zir tura kal hmasa ber anih avang chuan Sap leh Khasi ho pawn an lo lawm hle mai. A hming chu Khasi hovin lam harsa an tih avangin C. Khama tiin an ziak a, Khama tih hlirin an ko thin. Cherra-ah hian tha takin a zira, kum 1912-ah a zirlai chu a zirzo ta a ni.
                A zir zawh hnu hian hna hrang hrang a thawk chhunzawm a, tichuan kum 1913 Presbyterian khawmpuiah Mizo zinga Pastor hmasa ber ni turin Ordained a ni ta a, amah ordain tu chu Khasi Assembly aiawha lokal Welsh Missionary Rev Ceredig Evans-a niin Lunglei atanga kal Pu Buanga’n (Rev J.H. Lorrain) fuihna thuchah a sawi bawk a ni.
                Hetih hunlai hian Pastor tyih hming hi Mizoten an la hre lo va, ‘Sap aiawh thei’ tiin an sawi mai thin. Hetianga ‘Sap aiawh thei’ a lo nih takah chuan mipuiin an ngaisang a, Kristian leh Kristian la ni ve lo chenin an ngai ropui em em a ni.Kum 1914 atangin Bial nei loin ram pumah a tulna apiangah rawngbawlin a zinkual thin a, Baptisma chantir te a lo tul tawh avangin kum 1914 chhung ringawt pawh hian mi engemawzah a baptist a ni. Hemi kum vek, February 26, 1914 hian nupui a nei a, a nupui chu Hauteii (Hauthangpuii) niin kum 20 mi ani a, hetih lai hian Chhuahkhama hi kum 27 mi a ni. Hauteii nen hian fa 11 lai an nei a, a upa berin a sen laiin a thihsan a, midang erawh an puitling vek a ni. Hauteii hi nu fel tak anih bakah Rev. Chhuahkhama hian a kaihruai thiam hle a, a rawngbawlnaah tanpuitu tha tak a ni. A bial mite an lo lanin, a tana hriat harsa si, hriat loh zahthlak theih bawk si hunah te hian, a nupui chuan, “Khawia awm leh tute nge in nih kha?” a lo ti hlauh thin a. An han insawi tan chuan ani chuan a lo man nghal mai a, hre takin a be chhunzawm thei a. Anni chuan, “Kan Pastor makzia hi chu aw, keini khual lam hlate pawh hi min hre em em zel a,” an ti hial thin a ni.
Zosaphluia leh Chhuahkhama: Han let leh lawk ila. Zosaphluian Rev Chhuahkhama a hmuhchhuah dan hi ngaihnawm ve mai mai tak a ni. Saphluia sikulah chuan Chhuahkhama chu a rawn kal ve a, naupang te a ni a, tawngtai lai hian midang zawng zawng kun nghiaia an maimitchhin laiin Chhuahkhama chu a meng tlat mai pek a. Chu chu Zosaphluia’n a hmuh fuh a, Sikul banah chuan a office ah a ko ta a, a zawt a, Chhuahkhama chuan, “Ka pa hi puithiam a ni a, Kristian ka ni lo va, kristiante tawngtainaah ka maimit chhin ve a thiang lo, chuvanga meng ka ni,” tiin tlang takin a hrilh hmiah mai a, Saphluia chuan chutianga naupang ze danglam tak leh rilru nghet tak mai chu Pathian tan mi pawimawh tak leh tangkai tak a la ni thei dawn a ni, a ti a, a hnehah chuan ” Isua Krista chuan hna ropui tak thawk turin a duh che a ni” a ti ta zawk a, a hau lo va, duat taka enkawlin a theih tawpin a kaihruai a, Mizo zinga pastor nemngheh hmasa ber Chhuahkhama chu Mizo Kristian te tan Kohhran BAN pawimawh ber a lo ni ta a ni.
Kum 1914 hian Tirhkoh exam neih a ni a, he exam-a tling mi pali Phawka, Vanchhunga, Hauchhunga leh Thangkhuma te chu October, 1914 khan ordained niin Mizoramah chuan Pastor panga an lo awm ta. Tichuan heng Pastor panga te bial chan tur hi khawmpui chuan a rel felsak ta a, Phawka’n Tlawng ral thlanglam zawng a chang a, Hauchhunga’n Sialsuk atanga chhim chhak Champhai kawng achin chhim lam Tuichang thlang lam zawng a chang a, Thangkhuma’n Tuirial chhak lam, Champhai lamlian achin hmar lam zawng a chang ve thung a, Vanchhunga’n Tuichang ral chhak lam zawng a chang ve bawk a, Rev Chhuahkhama pawh chuan Tuirial leh Tlawng inkar, Aizawl achin hmar lam zawng a chang ta bawk a ni.
                Chumi atang chuan Rev Chhuahkhama pawn bial hran a nei ve ta. A bial chu zau ber lo mahse Aizawl khawpui a chan tel avangin a ropui bera sawi theih a ni. Aizawlah chuan mi lian leh ropui an lo tam a, chungte chuan hotu enin an en a, zah a kai hle. Aizawlah hian Mission sap pahnih Sandia Sap leh Zosaphluia te an awm avangin Aizawl aiin a a bial hmundang a ngaihtuah a, hetih hunlaia Pastor te zingah Bial fan taima pawl tak a ni. Heng avangte hian a hlawh a lo tam deuh bik ngeni tumkhat chu Tirhkoh Phaisama leh tirhkoh dangten Saphluia hnenah hlawh pun an dil a, Pu Phaisama chu Pu Saphluia betu berah an hmang a, “Ka pu, Chhuahkhama pawh cheng sawm in hlawh tir a, engati nge keini hi cheng thum chauh min hlawh tir?”, tiin a han sawi a. Pu Saphluia chuan, “Well, Chhuahkhama chu Cherra-ah a zir alawm, a hlawh pawh a tam ang chu” a ti a. Phaisama chuan, “Peter-a te pawh Cherra-ah an zir hleinem, Chhuahkhama hi a hlawh a tam si, kan zinna ah te zin ve ṭhin sela” tiin a chhang niin an sawi thin.
                Heng Pastor hmasa te pawh hian hotu enin an en deuh reng reng bawk a, bial fanga an zin report pawh ahnenah hian an pe thin ni awm tak a ni. Tumkhat chu Dokhama’n Pastor Chhuahkhama (1885-1949) hnenah a zin thu a va report ti hian a va report a, “Ka pu, tun ṭum ka zin chu inkhawmnaah thu ka sawi zel a. Inkhawm bana inkawmkhawmnaah Pathian thu ṭhenkhat min zawt ṭhin a, ka thiam ang angin ka chhang ve ṭhina, ka lawm ve viau asin” a va ti a. “Engte nge an lo zawh che?” a lo ti a. “Min lo zawh pakhat chu, paradis hi eng nge maw ni le?” tih te hi. Rev Chhuahkhama chuan “Engtin nge i chhan?” tiin a zawt a, Dokhama chuan “A…Paradis chu thlai chi khat, chawhmeha hman chi ani awm e”, ka ti a” tiin a chhang a, Pastor Chhuahkhama chu a nui teuh teuh e, an ti.
                A mizia: Rev Chhuahkhama hi mi ropui a tling a, Zofate zingah hmasa ber nihna a ngah hle bawk. Lower Primary Pass hmasa ber, Upper pass hmasa ber, Tangkapui hmu hmasa ber, Dak Overseer hmasa ber, Sikul Inspector hmasa ber, Theological College kal hmasa ber, Pastor hmasa ber a ni hial a n. Amah hi fing tak, hawihhawm thiam tak, mi zah der thiam si anih avangin hotu dangte pawhin an zah let a, kalkawngah tu pawh tawk sela “Khawi lamah nge?” ti tala be lo chuan a kal pel mai mai ngai lo.  A in vawng up thiam em em a, hei vang hian sap ho pawh khan an ngaisang a, Sandia Sap-in an rama Mizo Kristiante chanchin a report naah pawh Rev Chhuahkhama hi “Refined Christian Spirit” tiin a sawi nghe nghe a ni.
                Amah hi mi thiam, inpe bawk si ani a, a mawng a zangin a viak a tha a, hei vang hian khawmpui rorel nikhuaah te pawh a thu paihthla zo an awm mang ngai lo a, sap ho pawhin Mizo chungchanga an biak rawn ber a ni reng thin a ni. A nungchang a thain a hmel a tha bawk a niang tum khat chu a Bial chhunga a len velnaah, in pakhatah hian a lut a. thutna pindanah chuan naupang a lo thu a; ani pawh chu a thu ve a. Naupang chuan tu tih a hre lo va; a hmel a enin a zahawmin a thianghlim si. Chokaah a lut a, a nu hnenah, “Ka nu, saw, tu emaw kan inah a lut a, a zahawmin a thianghlim si, Pathian a ni ang,” a ti hial a ni. Khaw pakhata Sacrament a buatsaih lai chu mi pakhat hian, ‘Van mi hmel a pu’ a ti hial bawk.
                Rev Chhuahkhama hi mi thiam hmasa tih takah kawng hrang hrangah sulsutu a lo ni a. Kum 1935-a Pi Zaii bangla-a Young Lushai Association (YMA) din anih pawh khan a dintu zingah telin Committee Member zingah a tel a, Competition Sub Committee-ah member a ni bawk. Mizo Bible lehlin a nih pawh khan mi tangkai tak niin Ephesi leh Thesalonika Lehkhathawn hrilhfiahtu zinga mi a ni.
                Tin, hla lehlin lamah a inhmang viau bawk a, Mizorama kohhran hlabu lar ber Kristian Hlabu-a hla tha tak tak  engemawzat hi a lehlin niin chungte chu KHB No 131, 135, 172, 173, 228, 244, 324, 361, 389, 405 leh 543 te an ni. Hetia Pastor hna a thawh paha rawngbawlna kawng hrang hranga inhmang chung hian Tlangau Bu a enkawl thin a, Aijal Theological School ah a zirtir bawk thin a ni.
                Hun tawpna: Rev Chhuahkhama hian sulhnu ropui tak tak a nei a, a zavai chuan kan sawi seng awm lo ve. Kum 36 chhung zet rinawm taka Pastor hna a thawh chhungin mi 4634 zet a Baptist a, nupa tuak 748 a inneihtir bawk.  Tichuan, kum 1949 February ni 16 khan kum 65 mi niin a thi a, a thih ni thleng hian Kohhran pa ber anih avangin a ruang chu ropui takin Mission Veng Biak in tualah phum a ni ta a ni.
Bibliography: 
Mizo Varparh Arsi Pasarih - Rev. Z.T.Sangkhuma
Krista Rawngbawltute Chanchin- Pastor Pension Fellowship
Zoram Nghahchhan - Kristian Puipate sulhnu leh an thukhawchang by Rev. Lalnghinglova –II
Misual.com & Lawrkhawm.com

               
               
                

1 comment:

  1. Rev Chhuahkhama chanchin kimchang i blog ami ka lo hmu a lawmawm hle mai..i thuziah behchhan hian Documentary siam i rem ti em?

    ReplyDelete