• X Factor
Chhiartu tam takin X factor hi enge anih, enge tuna a dinhmun tih hriat chakin zawhna in rawn siam a, chhan han tum teh ang. X Factor hi zaia intihsiakna, American Idol judge Simon Cowell-a dinchhuah niin buatsaihna hmasa ber chu UKah a ni a, kum 2004 atanga buatsaih tan niin hetih hunlaia inzaisiakna Pop Idol thlak tura ruahman a ni. X Factor hi ram hrang hrangin anmahni style in an ka
lpui nual a, a bul tanna X Factor UK hi zaithiamlar Leona Lewis leh tunlaia hit tak One Direction te larchhuahna a ni.
Tunah hian X Factor hi ram 40 chuangah kalpui a ni a, heng ram hrang hrang atang hian X Factor winner 70 chuang an awm tawh a ni. Awle X Factor zinga ngaihven hlawh bik tlem i lo chhui bing dawn teh ang.
X FACTOR UK: he show hi kum 2004 september thla khanSimon Cowell-a kaihhruaina hnuaiah neih tan a ni a, tunah hian season 9-na neih mek a ni. A tira judge te chu Simon Cowell, Sharon Osbourne leh Louis Walshte an ni a, Season 4 naah Danii Minogue chu judge atan rawn tangin season 5 naah Cheryl Cole chuan Sharon osbourne chu a rawn thlak a ni. A tir atanga he X factor winner techu Steve Brookstein, Shayne Ward, Leona Lewis, Leon Jackson, Alexandra Burke, Joe McElderry, Matt Cardle leh Little Mix te an ni a, he X factor-a winner te hian Judge Simon Cowell-a company Syco Music recording contract 1 Million Pound man hu an dawng a, hei bakah hian pawisa fai leh hamthatna hrang hrang an dawng teuh bawk a ni.
He show hi Europe ah chuan a hlawhtling ber pawl a tih theih awm e. Series 6 neih tawhah mi nuai 2 chuangin tel tumin an zaichhin (auditioned) tawh a, mi 19.7 million chuangin an en thin bakah series 6 final ahphei kha chuan Vote million 10 chuang a tla a ni.
X Factor US: Europe-ah hlawhtling taka he show an kalpui ang hian Entertainment khawpui ber US-ah pawh he show hi a hlawhtlin theih a siamtu, Simon Cowell hian a ring tlat a. Tichuan kum 2011 atang khan SYCOtv leh Sony Music tangkawp chuan US-ah X Factor hi an kalpui ve ta a, hei hi kan entam zawk ani bawk a, chipchiar deuh hlekin i han sawi teh ang.
He X Factor hi khawvela Reality show hlawhtling ber pawl American Idol leh Show thangduang tak The Voice te tluk pha thuak khawpin mipuiin an ngaihven a, a chhan chu he intihsiaknaah hian solo bakah group ang pawha a zai theih avang leh a behbawmah hian Celebrity tam tak an inrawlh vang a tih theih awm e.
Judges and Mentors: He show tan tirha Judges te chu Simon Cowell, Pop star leh Girls Aloud member hlui Cheryl Cole, American Idol judge hlui leh hranghlui zaithiam Paula Abdul leh Record Producer hlawhtling L.A. Reid te an ni a, Pussycat Dolls zaitunu ber thin Nicole Scherzinger leh Steve Jones te chu co-hosts an ni. Show an han tan a, Audition set 2 lek an nei chauh tihah Cheryl Cole chu a ban tak avangin a ai hi Nicol Scherzinger chuan a luah ta a. Tluang taka show kalpui anih hnuin January 2012 khan Paula Abdul, Nicole Scherzinger leh Steve Jones te chuan he show hi an chhuahsan tak avangin Demi Lovato leh Britney Spears te chu lak luh an ni ve leh ta a ni.
He show a tel te hi group 4 (kum 12-16, kum 17-24, kum 25 chin chunglam leh Group) ah then hran an ni a. Judge te chuan heng group hrang hrangte hi in chan semin an group chan te theuh kaihruaitu (mentor)ah an tang nghal ta thin a. Judge te hi zai lama sulhnu lian tak tak nei an nih avangin an group chan amite hla sak tur, zai dan tur, stage-a an chet tlat dan tur etc-ah zirtirna pein an kaihruai a, hetih rual hian Group dang amite zai an endik leh theuh bawk a. An group chan amite an tlin chhoh zel theih nan hma lain hnehna changtu Mentor (Winning Judge) nih an tum tel bawk thin a ni.
Lawmman: He competition-a pakhatna lawmman hi khawvela inzaisiak lawmman tam ber tiin a siamtu Simon Cowell chuan a sawi a. Recording Contract Syco Music leh Sony Music Entertainment hnuaia a hmuh dawn mai bakah US Dollar Million 5 a dawng dawn bawk a ni. Mahse Dollar Million 5 hi installment in kum khatah Million 1 te tein kum 5 chhung a dawng dawn a ni.
A kalphung: X Factor US-ah hian stage hrang hrang inchhawrdawh a awm a, pakhatna ni tur chuan heng stage hi paltlang vek a tul a ni. Heng stage te hi a hnuai ami ang hian then hran an ni:
Stage 1: Producers' auditions (hetah hian judge te hmaa zai tur thlan an ni)
Stage 2: Judges' auditions
Stage 3: Boot camp
Stage 4: Judges' houses
Stage 5: Live shows (finals)
Producer Audition paltlang Contestant te hian Audition an hmachhawn a, hei hi solo leh Group angin kum 12 chunglam tan a ni. Heng zaithiamte hi Judge te hmaah zaiin an tlin theih nan an zai chuan judge te atangin vote tam zawk an hmuh angai a, Judge pathum talin amah ti tling tura an remtih a ngai a ni.
Heta tlingte han Boot Camp leh Judge Houses stage an kai leh a. hetah hian group hrang hrang (ahmaa kan sawi tawh) atangin contestant 8 theuh, mi 32 an thlang chhuak leh a, heng an thenhran teah hian Judge te chu anmahni chanpual theuh an kaihhruai (mentor) tir ta thin a ni. Hemi level hi chu hmun hrang hranga in leh compound nuam tak takah te neih thin niin Judge te pui turin celebrity dangte pawh an ruai thin a ni.
Heta tanga tling lehte hian Live Show stage an hmachhawn leh a.. A hmasa berah X Factor Digital Expirience hmachhawnin hetah hian a thlirtu te tan tunlai thiamna hrang hrang hmanga an tel ve theihna chance siam sak an ni a. Judge te leh Host ten Contestant te chungchang an sawiho a, an chetthatna lei leh chetchhiatna lai te, an incheidante thlengin. Heng an sawikhawmnnah hian Contestant te chu Twitter hmangin zawhna leh an ngaihdan sawi theihna pek an ni a, fans thlanbik te pawhin Skype hmangin he round hi an telpui thin a ni.
Heta tang hian Final 16-a tel tur thlan chhuah leh niin chung mite chu Live performance hmangin an in el ta a. A kar hmasa berah mipui vote larih loin anmahni group theuh atangn Judge te chuan mi pakhat an ti tla (eliminate) a, mi 4 an paih hnuin Final 12 tur an thlangchhuak leh ta thin a ni.
Final 12 te hi an in el leh a, heta tang hian mi 2 zelin an ti tla chho ta a, Final 4 chauh an awm thlengin an paih chho ta a. Chuta tling chho zel mi pali te chuan Final pui ber Final 4 an thleng chho ta thin a ni.
Tunah pawh XFactor hi neih mek a ni a, American Idol style ngai pet pet ning tawh tan chuan a kalphung hi a hmuhnawm viau a, The Voice nen hian American Idol lehpel turin an rawn in um nasa hle mai. Nikum season-ah khan Melanie Amaro chu pakhatna niin Josh Krajcik chu pahnihna a ni a. Keima mimal favourite, drug addict sim ta leh bawlhhlawh paiha inhlawhfa thin Chris Rene chu pathumna a ni. Chris Rene hi a inspiring em em mai a, judge te pawhin an duh hle. Pathumna ni mahse a singles tihchhuah “Young Homie (Whatcha Trippin On)” tih chu a lar hle a nih hi.
Awle, a kalphung tlangpui chu kan hre ta bawk a, tui takin XFactor kan en thei ruak awm e. Tuna neihmek hi chu nidangah news item angin tihchhuah kan tum thin dawn nia.
No comments:
Post a Comment