America's Beloved Singer
GEORGE BEVERLY SHEA
Mizo mi ropui tak tak te chanchin kan ziak ta nual a, tun tum atan chuan Billy Grahama rawngbawl pui thin, zaithiam lar tak, George beverly Shea chanchin i han thlur bing ve leh dawn teh ang.
George Beverly Shea hi February 1, 1909 khan Winchester, Ontario, Canada-ah a piang a, Wesleyan Methodist Church pastor, Rev Adam Joseph Shea leh a nupui Maude Theodora Shea te fa pariat zinga palina a ni. Kohhran hruaitu chhungkua atanga seilian tih takah naupangte anih lai atangin a zai tan tawh a, a pa hian Violin tum a zir tir thin bawk bakah a nu hian Piano leh Organ tum te a zirtir thin a ni. A tleirawl chhoh tirh atanga a aw thum tak mai chuan mi ngainat a hlawh em em a, a pa kohhran enkawla zaipawlah te regular takin a tel chho a, mipui hmaa a zai hmasak berna chu Ottawa Valley-a inkhawmpuia a zai kha a ni awm e.
Ama sawi danin George Beverly Shea hian kum 5 anih laiin Lal Isua Krista hi Lal leh Chhandamtua pawmin a piangthar tawh a, tleirawl sual em em nei lo mahse midangte ang bawkin a tleirawl nunah Pathian ngaihsak tawk loh hun te a nei chho ve a, kum 18 mi anihin Sunnyside Wesleyan Methodist Church, Ottawa, Canada-a a pa rawngbawlnaah Krista tan a inhlan thar nawn leh ta a ni.
“Ka thlarau nun chau tak avangin Krista hnena inhlan thar leh tul tihna lian tak ka nei a. Kum 18 mi ka nih lai, ka pa in Ottawa-a kohhran a enkawl laiin ka pa chuan rawngbawlna a nei a. Zirtawp zan a ni a, chumi zan chuan ka pa thusawi lai chu Pulpit atangin a rawn chhuk a, zawi sap hian, “Ka fapa, zanin hi lalpa hnena i lo let leh hun tur a ni,” tiin min rawn hrilh a. Ka pa sawi vang pawh ni chuang lo chuan khami zan khan ka nun chu Lalpa tan ka hlan thar nawn leh ta a ni.”
Zirna lam: Shea hian Annesley College, Ottawa-ah lehkha a zir thin a, kum 1928-ah Houghton college, New York-ah insawnin hetah hian a zir lai pangngai bakah a tuina ber zai a zir chho ta a. Houghton College-a a zir lai hian Houghton College Glee Club-ah a zai ve lauh lauh thin a, mahse sum lama harsatna a tawh avangin zirna chu a chhunzawm thei ta lo. Tichuan kum 1929 khan zirna chu chawlhsanin New York Life Insurance Company-a medical department-ah Clerk hna a thawk ta a, he hna hi kum 9 chhung zet a thawk a ni.
Nupui fanau lam: George Beverly Shea hian a tleirawl lai atanga a ngaihzawn tawh Erma L. Scharfe chu June 16, 1934 khan nupui atan a nei a, Erma nen hian fa pahnih Ronnie leh Elaine te an nei a ni. Shea leh Erma te hian Kristian chhungkaw duhawm tak dinin an fate pahnih pawh hi Billy Graham-a rawngbawlnaah naupangte an nih laiin an piangthar ve ve a ni. A nupui Erma hian September 1976-ah a thihsan a, hemi hnu hian Dec 19 1985 khan Shea hian nupui atan Karlene Aceto chu a nei leh a ni.
Rawngbawlna lam: Awle, khawvelin George Beverly Shea a hmelhriatna, zaia rawngbawlna lam i han luhchilh ve leh dawn teh ang.
Amah hi zaithiam tak, a aw thum tak mai pawh lar pui ve hat thin a ni kan tih tawh kha. Shea-a talent ropui tak mai hi a lo hriatin zaithiam John Charles thomas chuan Gino Monaco hnena zai zir turin Shea hi thurawn a pe a. A thurawn ang hian a inzir chho ve ta.NBC radio-a inzaisiakah te a tel a, chubakah radio program hrang hrangYour Hit Parade tih te,WHN te, Young Person’s Church of the Air radio ah te leh Radio programme hrang hrangah a zai chho a, hriat pawh a hlawh chho hle. Tichuan kum 1939 khan Ruth Crawford nen “Jesus Whispers Peace” “Lead Me gently Home, Father” “I’d Rather Have Jesus” leh God Understands” tih hla te chu Decca Records hnuaiah a record ve ta a, copies 7,000 lai hralh a ni ve nghe nghe a ni.
Hemi hnu hian kum 1939 khan Dr Will Houghton, Moody Bible Institute-a President chuan Moody Bible Institute in Radio station an siama thawk turin Shea hi a sawm a. He sawmna hi pawmin Shea pawh chuan a hna chu a zawm ta. Tichuan he radio station atanga programme pekchhuah “Let’s Go Back to the Bible” ah Shea hi a zai tan a, heta tang hian US radio station 67-a pek chhuah Miracles and Melodies programme-ah a thawk leh a, he programme hi a hnuah phei chuan ram 187 laiah pekchhuah a ni nghe nghe a ni.
Hetiang hian radio lar tak takah a thawk kual a, a zai te chu heng radio programme hmang hian thehdarh a ni a. Hetih laia hmanraw lar ber Radio hi George Beverly Shea-a larna kawng hawnsak tu leh rawngbawlna zau zawk a kal pui theih nana kawng hawn tu a ni bawk a ni.
Billy Graham-a nen: Billy Graham-a rawngbawlna tihlawhtlingtu pakhat chu a
“Tuk khat chu, mi pakhat hian ka office kawngkhar hi a rawn kik dawt dawt mai a. Kawngka ka va hawn chuan pa sang lam, sam buang hi a lo ding a. A ni chu kum 21 mi a ni a, kei kum 31 mi ka ni tawh. Chu pa chu Billy Graham-a a ni a, Wheaton College atangin min hmu turin a lo zin vang vang a ni. A ni chuan “Hymns from the Chapel” tih radio programme-a ka zai a ngaihtlak thin thu leh ka zaiin amah a hneh thu min hrilh a. Chu chu kan intawn hmasak berna a ni. Phone leh lehkha thawna kan inbiak zui zel hnuin kum 1947 khan a rawngbawlnaa zai thin turin min rawn sawm a, a sawmna chu November kum 1947 khan ka pawm ta a, chuta tang chuan kan thawk dun kumtluan ta a ni,” tiin a sawi.
Heta an intawn hnu hian kum 1944 jan 2 atang khan Shea hi Billy Graham-a radio Programme “Song’s in the Night” ah a zai chho tan a, hetia Shea-a zai a tihchhuah ve atang hian he Songs in the Night programme pawh hian amah inchawm theihna tur sum a huilut ve tan leh ta a, an hlawhtlin phah hle a ni. BGEA an din hnua an inkawp tak tak hma pawh hian Billy graham leh George Beverly Shea te hian rawng an lo bawl dun zauh zauh thin a, Youth for Christ ministry rawngbawlnaah te pawh George Beverly Shea hi soloist pui ber niin Billy Graham-a leh speaker dang ten thuchah an sawi thin a ni.
Kum 1947atanga Billy Graham-a nen an inkawp tak tak hnu hian a vawikhat nan Billy Graham-a Crusade Armory, Charlotte, north Carolina-ah Shea hi a zai a, hemi tum hin Rev Francis H. Rowley-a hlaphuah “I will sing the woundrous story” tih kha a sa nghe nghe a ni. An pahnih hian an inkawp nghet tulh tulh a, kum 1948-ah pawl anga mumal zawka dinga rawngbawl dan tur an ruahman chhova, tichuan kum 1950-ah Cliff Barrows, Grady Wilson leh Billy Graham te nen Billy Graham Evangelistic Association (BGEA) an din ho ta nghe nghe a ni.
Billy Graham-a rawngbawl tan tirh atang tawh hian George Beverly Shea leh Cliff Barrows te hi zaia rawngbawlnaa a laimu pawimawh tak an ni tawh a, kum 1950-ah anni pahnih hi pianist, Tedd Smith-a’n rawn zawmin hemi hnu hian Don Hustad leh John Innes ten an rawn zawm veleh a, an inkawp rem hle mai.
Billy Graham-a rawngbawlnaa ropui tak leh thlaraua thuam tih hriat taka Pathian fakna hla a sak thin te chuan George Beverly Shea hi a vawrh lar em em a, “America’s Beloved Gospel Singer” ti hialin koh a ni thin. Billy Graham-a crusade programme reng rengah hian Pathian faka zai ho hi a lar em em thin a, mipui te an zai ho hup hup hnu hian Shea hian lungkuai raih mai leh Billy Graham-a sermon tur behchhana hla thlan chu a rawn malzai chhunzawm thin a, chu chu Billy Graham-a sermon in a rawn chhunzawm leh nghal zat thin a ni. Hetianga zaihona leh Billy Graham-a sermon inkara a zai thin hian mi tam tak thinlung a lo keu hawn sak sa a, chutah chuan Billy Graham-a’n Pathian thu tak a puanchhuah chu awlsam takin a lut thin a ni. Billy Graham-a pawhin a sermon aiin Shea-a zai hian thil a ti thei zawk niin a sawi thin.
Recording lam: George Beverly Shea hian hla 500 chuang amahin a record a, album 70 chuang RCA leh World Labels hnuaiah a siam bawk a ni. Kum 1951-ah a zaithiam zia Paul Barkmeyer-an a hmuhchhuah hnuin recording label lar tak RCA records hnuaiah contract a ziak a, hemi hnu hian a album hmasa ber “Inspirational Songs” tih chu a tichhuak a, RCA nena an thawhdun tirh hi chuan a album hralhna hian a hla recordna leh a buaipuina man pawh a hmu chhuak zo lo va, mahse kum 1958 chho vel atang kha chuan a hlawhtling chho ta hle.
Zaithiam reng reng hian hla, han lar pui deuh bik hi an nei chawk a. CHutiang chiah chuan George Beverly Shea-a larpui ber hla chu “How Great Thou Art” (Aw ropui ber) tih hi a ni awm e. Zaimi anih avang hian hla a phuah tam lo va, Home Coming video vela an sak lar tak, “The Wonder of it All” tih hi kum 1955-a a phuah a ni. Hetihlai hian a thluk siam erawh a siam fo va, Kristian hla lar ber pawl, Mizo kristiante pawhina kan ngainat em em, Mrs Rhea F. Miller-in a phuah, “Isua neih ka duh zawk” (I’d rather have Jesus” tih thluk hi George Beverly Shea-a’n kum 1935 daih tawha a siam a ni a, RCA nena thawhdunna thuthlung an siam tirh pawh khan RCA records lam hian he hla hi a sak atan an thlan sak chat a, a salar tu hmasa ber a ni nghe nghe a ni.
Zai ringawt hi a hna a ni bik lo va, zaia rawngbawlna a neih chhung hian George Beverly Shea hian ama mi mal chanchin (Autobiography) bakah lehkhabu engemawzat a ziak a, heng zinga a lar deuh te chu- “Then Sings My Soul” (1968) te, “Songs That Lift The Heart” (1972) te, “How Sweet the Sound” (2004) te leh “Stories Behind 50 Southern Gospel Favourites Vol 1 & 2 (2005) te an ni. Hetih rual hian lehkhabu lar tak ama chanchin Paul Davis-an a ziak “George Beverly Shea: Tell Me the Story” tih chu April 5, 2009 khan tihchhuah a ni bawk.
Lawmman leh chawimawina: Zaia rawngbawla Pathian a chawimawi lai hian Pathian pawhin rinawm taka a rawngbawl saktu George Beverly Shea hi nasa takin a chawimawi let ve a tih theih awm e. George Beverly Shea hi rimawi huangchhunga chawimawina ngaihhlut ber Grammy Awards dawng tura thlan (nominationsa)ah tum 10 ngawt mai a lang tawh a, a album “Southland Favourites” chuan March 15, 1966 khan Grammy Award category pakhat 1965 Best Gospel or Other Religious Recording (Musical) category-ah Grammy Award hi a lo dawng tawh a ni.
Kum 1978-ah Gospel Music huangchhunga mi bikte chawimawina Gopel Music Hall of Fame-ah a hming ziak luh a ni a, Feb 18, 1982 khan Gold Angel Award for Country Music chu hlan a lo ni tawh bawk a ni. A zai hunchhunga hlawhtlinna ropui tak tak a lo tawn tawh avangin Gospel Music Association chuan September 1, 1999 khan Lifetime Achievement Award an lo hlan tawh bawk a. February 12, 2011 khan Grammy Awards-ah Lifetime Achievement Awards hlan a ni leh bawk a ni.
Kum 1956 khan Houghton college chuan honorary doctorate degree (Doctor of Fine Arts) an lo hlan tawh a, kum 1972 khan honorary doctorate degree dang dawng lehin Trinity International University, Illinois chuan Doctor of Sacred Music (D. Sacred MUS) chu an hlan leh bawk a ni. George Beverly Shea hi Guiness Book of Records chuan mi hrang hrang hnena zai hnem ber niin a record a, an record-a a lan danin mihring million 220 hmaah a zai tawh a ni.
Chawimawina leh lawmman tam tak George Beverly Shea hian a dawng a, a zavai chuan kan sawi seng awm lo ve. “Bev hi ka rawngbawlnaa min tawiawm tura ka sawm hmasak ber a ni a, Bev-a a zai hmasak phawt loh hi chuan sermon sawi hi ka tim riau thin. Kum 50 chuan a zai hi ka lo ngaithla tawh a, zaithiam dangte aiin George Bev-a zai hian ka nun a chawm bik a, ka la ngaithla chak reng a ni,” tia Billy Graham-a’n a sawi George Beverly Shea hian a thatlai hun zawng zawng Pathian tana hmang zawh hnuin Kum upa tawh tak a ni chungin mite ngaihsan a hlawh reng a, taksa hrisellohna hrang hrangin a tlakbuak ve reng bawk nen, a chak lo telh telh a, tichuan April 17, 2013 khan a aw mawi taka a lo chawimawi thin Pathian hnenah chawl tawh turin a lei taksa chu a kalsan ta a, a nupui Karlene leh a fa Ronald leh Elaine te leh khawvel mipui maktaduai tam tak, amah ngaisanga a zai lo ngaithla thin te chu a kalsan ta a ni.
I am sure this post has touched all the internet visitors,
ReplyDeleteits really really fastidious post on building up new blog.
Feel free to surf to my blog post ... passwords
Post tha hle mai. Keimah pawhin ka la tangkai-pui viau dawnin ka hria. I ti tha e.
ReplyDelete