HLA LEH A PHUAHTU

IT IS WELL WITH MY SOUL 

- Horatio Spafford

Pathian fakna hla ropui tam tak hi harsatna nasa tak kaltlanga Pathianin hlaphuahtute

a pek a lo ni chawk thin a. Harsatna namen lo an tawh atanga Pathian an fakna hla an lo phuah tawhte hian vawiina Kristian tam tak nun a chawm nasa hle a nih hi. Harsatna kal tlanga hla phuah ropui tak mai, “It is well with my soul” chungchang hi tun tum chu han ziak ve leh dawn thung ila. He hla hi zaithiam tak tak ten an sak kan hre tawh ang a, hemi hla thluk hmang hian Rev Edwin Rowlands khan Mizo tawngin hla a lo siam a. Chu chu “Khawvel hrut chhuak ila, Lal Isua ang hi,” tih hi a ni. Rev Edwin Rowlands hian “It is well with my soul” tih hla hi letling lovin a thluk (Ville du Havre) hmanga hla dang diai a phuah avang erawhin he hla ropui tak a phuahtuin a phuah chhan leh Mizo tawnga he hla thluk kan lakna “Khawvel hrut chhuak ila,” tih hla hi en kawp a rem lo va, a inmil lo tih hriat hmasak a tha awm e. Chuvangin a sap hla hi engvang leh eng atanga a phuahtu hian a lo phuahchhuah tih kan sawi dawn a ni.

            A phuahtu: He hla ropui tak mai phuahtu hi Horatio Spafford niin Spafford-a hi Sept 5, 1861 khan Chicago, US ah a piang a. Amah hi lehkha thiam tak niin dan lam a zir a, a hnu phei chuan Chicago khawpuia dan hremi (lawyer) lar ber pawlah a invawrh chho nghe nghe a ni.

            Kum 1861-ah Horatio Spafford hian Norway mi Anna Larsen chu nupuiah a nei a, Spaffors-a hi evangelist lar tak D.L. Moody-a thian tha tak a ni nghe nghe. An nupa hian DL Moody-a rawngbawlnaah an pui nasain an tawiawm nasa hle thin a ni.

            Lungngaihna: Tluang taka chhungkua dinchhoh tuma hma an lak laiin kum 1870 atang khan lungngaihna thuah chhah tak tak mai Spafford-a hian a tawng chho tan ta. A hmasa ber atan kum 1870-ah Spafford-a te fapa hmuh hmasak ber leh an nei chhun la ni chuan kum 4 mi lek niin Pneumonia natna avangin a thihsan ta thut mai a. An fa hmuh hmasak ber an han chan ta chu an rilru a na ngei mai.

            Spafford-a hian Chicago-ah hian real estate hmangin sum tam tak a dah kham a. Chutia an fapa sunnaa an mittui pawh a hul fel hma chuan kum 1871-a Chicago khawpuia kangmei rapthlak tak, Great Fire of Chicago an tih a chhuah tum khan Spafford-a ro leh in tam tak chu a kangral leh ta vek mai a. An rilru a buai hle mai a, an channa nasa inthuah nasa tak chuan Spafford-a t chhungkua chu lungngaiin a kkun tir tlawk tlawk mai a ni.

            Chutianga hun lungngaihthlak tak an tawn lai chuan kum 1873 khan nipui chawlh hmang turin an chhungkua chu Europe lama zin an tum a. Hemi tum hian a thianpa DL Moody-a chuan England-a rawngbawlna a neih dawn avangin chumi tawiawm tur chuan England lama chawlh hman chu an tum a. A hna thila tih tur neuh neuh a neih avangin Spafford-a chuan a nupui leh a fanu pali te chu England pana kal hmasa turin meilawng Ville Du Havre hmang chuan a tirliam ta a, November 22, 1873-ah chuan England pana Atlantic tupui chunga zin, Ville du Havre lawng chu Thir phur lawngin a sut avangin a pil ta hlauh maia. A hmunah hian mi 266 thiin chung zingah chuan Spafford-a fanute pali-  Anna (11), Margaret Lee (9), Elizabeth (5)leh Tanetta (3) te chu an tel a, vanneihthlak takin a nupui erawh a him hlauh thung.

            A nupui Anna Spafford-i hian England a thlen hnuin thirhrui hmangin an pa chu an fanu te thih vek thu dengkhawng tak mai chu a thawn ta a. Chuveleh rang takin Hotario Spafford-a chuan England chu a pan zui ve nghal a. A fanu pali te thihna avanga rilru na em em chungin a fanu te lem zotu Atlantic tuipui chunga a zin lai chuan he hla “It is well with my soul” hi a phuah ta a ni

            An fanu palite an chan hnu hian nun thar nun tumin Haratio Spafford leh Anna te chu Chicago-ah an let leh a. Relote hnuah fapa Horation II chu an nei leh hlauh mai a. An lungngaihna te hnem tura fapa an han nei chu an lawm tehreng nen, an fapa chuan kum 4 mi anihin Scarlett Fever vangin a thihsan leh hlauh mai a. Hetih lai hian Hotario Spafford chuan Pathianin a hrem ta nge, a hmangaih ve tawh lo tiin a rilru a inzawt hial a, Pathian a rinna chu a hloh a hlau em em a, mahse Pathian a fak zawk thung hlauh a ni.

            An fapa a thih leh hnu hian Spafford-a te nupa chuan fanu pahnih Bertha leh Grace-i te an nei leh a. A naupang ber Grace-i pian hnu lawk hian an chhungkua te chuan Jerusalem-ah an pem ta a, hetah hian rawngbawl hna thawk chhunzawmin fahrah chawmna te, damdawiin te an din a, an hmingthat pui hle.

            Vanduaina leh lungngaihna nasa tak tuar chunga Pathian fakna hla ropui tak phuahtu Horatio Spafford-a pawh hi vanduaina chuan a la chimbuai fo va. A hun tawp lamah a rilru a buai a, tichuan October 16, 1888 khan malaria natna avangin Jerusalem-ah a thi a, Mount Zion Cemetery, Jerusalem-ah phum a ni ta a ni.

PP Bliss

            A thluk: He hla thu hi a lo hmuhin hla phuahthiam lar tak Phillip Bliss chuan a thluk siam a duh ta a. Tichuan uluk leh a amawi thei ang ber tura duangin kum 1876 khan he hla thluk hi Phillip Bliss hian a siam ta a, a hla thluk hmingah hian Spafford-a fanute chetsualna lawng, “Ville du Havre” tih chu a vuah a ni. He hla thluk a siam hnu hian a vawikhat nan amah PP Bliss hian DL Moody-a rawngbawlna Chicago's Farewell Hall-ah a sa nghal a, heta tang hian a lar zuiin mi nun chawmtu hla tha tak a ni zui zel a ni.

            Job-a ang maia a rinna fiaha a awm chung pawha Pathian phatsan duh hauhlo tu, lungngaihna thuah engemawzat (a fate parukin an thih san a, a ro khawl khawm tam tak a kangral vek bawk) a tuar chung pawha Pathian rawng bawl tlattu Horatio Spafford-a hla phuah “It is well with my soul” tih hla hi zaithiam lar tak tak PP Bliss, Ira D. Sankey, David Phelps, Guy Penrod, Bill & Gloria Gaither etc ten thiam takin an sa a, Kristian hla lar ber pawl a ni.

           

When peace, like a river, attendeth my way,

When sorrows like sea billows roll;

Whatever my lot, Thou hast taught me to say,

It is well, it is well with my soul.

It is well (it is well),

with my soul (with my soul),

It is well, it is well with my soul.

Though Satan should buffet, though trials should come,

Let this blest assurance control,

That Christ hath regarded my helpless estate,

And hath shed His own blood for my soul.

My sin, oh the bliss of this glorious thought!

My sin, not in part but the whole,

Is nailed to His cross, and I bear it no more,

Praise the Lord, praise the Lord, O my soul!

For me, be it Christ, be it Christ hence to live:

If Jordan above me shall roll,

No pang shall be mine, for in death as in life

Thou wilt whisper Thy peace to my soul.

And Lord haste the day, when my faith shall be sight,

The clouds be rolled back as a scroll;

The trump shall resound, and the Lord shall descend,

Even so, it is well with my soul.

A video