Gilbert Renthlei

DISTRICT PARK SWIMMING POOL KAN ENKAWL DAN HI

- Gilbert Renthlei

Electric Veng, Lunglei

Mihring zingah hian tuichen nuam tilo hi an vang hle awm e. Tui thiamin a thuk poh leh nuam an ti a, sang tak tak atanga zuan thlak te, han in vawrhbin te, han liluh vang vang mai te, tuidungchhir leh sakhi tui hleuh te, zangthal tuihleuh te chu a thiam tan chuan nuam tak a ni reng a ni. Khawlum laia tui dai nuam tak maia han dive luh bawrh tluka lum tihna hnawt kiang chiang a awm lo va, nuam fi fia tak a ni.

Amah Pu R. Saptawna’n kan naupan laiin “Kei chu tui lai thiam ka ni,” a ti teh fo a. Enge Tui lai thiam awmzia kan han zawh chuan a ni chuan, “Tui ka hleuh hian lan ka tumin ka pil a, pil ka tumin ka lang zel thin. Chuvang chuan Tui lai thiam ka ni,” tiin min chhang a, kan nui dar dar thin. Ni, Pu R. Saptawna anga tui thiam lo pawh hian tui hleuh hi an lawm a, a pawn lai deuh, thawk buai lohna chinah tal in nem khalh chungin an in chhek kal zut zut thin. Tui chen hi chu a nuam a ni.

Lunglei leh a chhehvelah pawh hman atangin thalai leh naupang te tui cheng turin Sipai lui te, Nghasih leh Sawrkar huan, Hmawngva lui etc-ah school chawlh apiangin an liamthla sung sung thin. Tunlaiah erawh pollution nasa tak avangin heng kan chhehvel hnaia lui te hi chenna tlak a ni tawh meuh lo va, a lui dung a tawp bawk nen. Tin khawvel changkang chho zelah naupang ten luikal ai chuan computer games khelh leh infiamna dang khelh an ching ta a, tui chenna hmun pui ber swimming pool awmna District Park-a tuichen chu Lunglei naupang leh tleirawl tam zawk te chin dan a ni ta.

Awle kan kual thui ta, thupuiah lut dawn ang. District Park-ah sawn kan hriat theuh angin Swimming Pool zau leh thuk tak mai sawrkarin min siam sak a, a bul lawk ah naupang chenna tur a thuk lo zawk a awm bawk. He swimming pool hi District Park ti hlu tu ber a ni ti ila kan sawi sual tam pui awm lo ve. 

Tun hnaiah District Park Swimming Pool-a tlahlum thawm kan hre ta zeuh zeuh a, a va lungchhiatthlak em. Thalai duhawm tak tak an tlakhlum zeuh zeuh lai erawh hian Sawrkar leh a enkawltu Department lam erawh an ngawi vung vung mai si. Se bo hnu a se kawng khar an tum awm thawm reng mipui lamin kan hrelo hi a lungchhiatthlak hle a ni. Se bo hnua se kawngkhar hian se dang a bo belh lo va, khar loh ngawt ai chuan la hlawk thlak tak a ni. Se bo hnua se kawngkhar loh erawh chuan a bo pheuh pheuh a, ngaihsak loh phei chuan a bo vek thei. Chuvangin a enkawltu department hian se bo hnua se kawngkhar nachang hi hria se ka va ti em.

District Park Swimming Pool hungchhunga lut tur sawn mi pakhatin Rs 5/- zel kan chawi angai a, School leh thalai pawl hrang hrang te picnic te phei chuan sum tam tak a lut a ni. Heng pawisa kan chawi hi sawrkar sum tur niawm tak a ni a, chutih laiin mak ka tih thin chu, sum kan chawi hian a lo dawngtu te hian Receipt engmah min pe chhuak ngai lo hi a ni. Receipt engmah pe chhuak lovin pawisa an dawng tawp mai a, heng kan sum chawi hian khawi hmun nge a thlen le? Nge a enkawltu department hian District Park enkawltu te hlawh atan Swimming Pool hungchhung luh man hi a dah a, an sum hmuh apiang hi an lo ak tha hmak hmak mai thin zawk? Chu chu sawrkar kalphung niin ka hre lo va, sawrkar sum chu receipt leh voucher fel tak nen chheprelh a awm loh nan fimkhur taka dawnga pek chhuah tur niawm tak a ni.

Rawtna kan siam teh ang. District Park enkawltu Department hian MR in tuihleuh thiam tak Swimming Pool enkawltu tur leh lifeguard tur ni bawk hi la ta se. A gate bulah sawn cabin ang reng deuh, chu MR lo duty na tur leh ticket a pekchhuahna tur siam ni bawk se. A lut tur reng rengin ticket cut ngei bawk ila. Ticket duplicate chu audit leh theih tura vawn that ni ngei bawk se. Tin Swimming Pool-a chesual palh reng rengin an koh mai theih turin in ring reng chungin Ticket counter-ah chuan awm ta se. Ticket atanga sum lut chuan chu MR hlawh chu a tum theih mai dawn bakah tun aia kimchang zawkin sawrkarin sum a hmu let thei ang a, chetsual palhah pawh lifeguard cum gate duty chu koh mai theih a a awm dawn avangin nunna hloh tur chhanhim a awlsam zawk ngei ang.

Tuna kalphungah hian Gate bula pawisa lo dil thin te hian an eiru then ang chu ka ti hauh lo. Mahse Receipt mumal taka pekchhuah loh chuan engchen nge pawisa an dawn tih an hre kilh kelh bikin ka ring lo va, hman pawlh mai mai, tihbo etc a awl hle ang.

Tin, he swimming pool hi fai deuh zawk a enkawl atan a va tha em. Lui kam maia awm a ni bawk a, lui tui awmlai tal hi chuan regu taka thuah fai thin nise. Tin a cheng tur te pawh an chen hmaa inbual fai hmasak theihna turin ruahmanna siam nise thianghlimna kawngah hma kan sawn ngei ang. Tuna kan kalphungah hi chuan mi invawng leh duhtui tan chuan he swimming pool hi chenna tlak a ni lo. Hnahthel leh pangang, sazu, chips kawr etc nen a lang nuai nuai mai a, a tui a uih hmun thin mai bawk nen. Chenna tlak a ni mawlh lo.

Kum 1998 khan National Children Science Congress ah Young Scientist pakhat ka nih ve angin Chennai khawpuiah Project Paper present turin ka kal a. Chumi tum chuan Sightseeing kan neihnaah Golden Beach kan tlawh a. Tuifinriata duh tawka tuifawn kan in len kual tir hnu chuan Swimming pool a cheng turin pool lam chukan pan ta. Ticket fel taka kan lak thlap hnuah ka kal phei tawr tawr a, swimming pool-ah chuan ka han dive thla pawm mai a. Chulai hmuna lo duty chuan min khai chhuak rang ngei mai. Tichuan a bul lawka bathroom-ah chuan inbual turin min hrilh a, ka han inbual fai hmasa te te a, tichuan tui ka chen chu min phalsak ta chauh a ni.

Hetiang hian uluk takin kan swimming pool neih chhun hi i enkawl teh ang u. Tunah chuan addict vung ber bur te, tangseh bawl ter tuar te, hmeichhe thi nei lai te, hnathawk zo hlim bal tak tak te nen tui thuhmunah kan inchiah luai luai a, kan hak a, a tui kan lem tel zeuh zeuh bawk nen. Tui hri leh tui thak kan vei haw zel lo hi kan vannei hle zawk a ni.

Tin, sawlai hmun khawhar taka hnathawk te pawh sawn a enkawltu department in hmu pha lo mahse taima tak leh thahnemngai takin swimming pool bakah district park leh a chhehvel saw enkawl se, mahni hna rinawm taka thawh hi Pathian rawngbawlna pawimawh tak a ni tih i hre thar teh ang u. Heng ka rawtna te hi kan tihlawhtling mai thei lo anih pawhin chetsual thulha in puihna tur mautlawn leh bladder pump puar sa te, life jacket te dah belh ni bawk teh se. Khua a lum leh ta, se dang a bo hma hian se kawng i khar vat teh ang u.