GEORGE MULLER

Tawngtai mi leh Fahrahte PA

George Muller

       George Muller hi Prussia rama Halberstadt khaw kiang lawka Kroppenstaedt-ah September 27, 1805 khan a piang a. Kum 1810-ah an khaw bul lawka Heimersleben khuaah pemin hetah hian a pa chuan chhiahkhawn hna a thawk a ni.

            Pa ngaihsanawm tak ni chho mahse a naupanlai hian Muller-a hian nun duhawm tak a nei bik lova, rukruk a ching a, dawtsawi leh pawisa khelh a ching hle bawk. Kum 10 mi lek a nih laiin a pa chhiah khawn sa, sawrkar pawisa a ru chhuak tawh a, kum 14 mi anih laia a nu thih dawn lai pawhin a thiante nen zu in chungin pawisa a khelh san daih a ni. Hetianga a nun tawp leh tenawm tak hi sawitur tam tak a awm a, kan sawi zui lo ang.

            Hetiang hian sual mahse a pa hian Pathian thu zirtira Pathian rawngbawltu a nih theih a beisei pui tlat a. Tichuan Muller-a chu kohhran sikul, Cathedral Classical School, Halberstadt-ah a luh tir a, kum 10 mi anih atanga kum 16 anih thleng he sikul-ah hian a zir a ni. Kohhran sikulah kaihhruaina tha tak dawngin zir mahse a nunin hmasawnna a neih phah lova, a dan ngaite in mi hrang hrang a bum kual a, naupang sual tak a ni.

            Tichuan University of Halle-ah Divinity zir turin a pa thurawn angin a lut leh a. Halle University-ah hian Lutheran kohhran tana rawngbawltu ni turin zirlai 1,260 zingah Divinity subject zirlai 900 chuang an awm a, Muller-a pawh hi heng zinga pakhat hi a ni. Halle-ah hian thian hlui pakhat Beta nen an inchhar hlauh mai a. Beta hian Muller-a hi he university-a Kristian te tawngtai inkhawm neih thinah telve turin a sawm ta a. Chu sawmna chu Muller-a pawhin pawmin he inkhawmnaah hian regular takin a tel ve ta. Chu inkhawmnaa ringtu tha tak takte’n tih takzeta Pathian chibai an buk a hmuh thin chuan zawi zawia a Muller-a nun siam thain Bible pawh a chhiar nasa ve ta hle a, inkhawmnaa Pathian thu sawihona te pawh a hlutin nuam a ti chho tan hle. Kum 1825 November thlaa Inrinni zan inkhawmah chuan pa pakhat hi thingthi chungin tihtak zetin a lo tawngtai a, chupa tawngtai a hmuh chuan Muller-a rilru a khawih nasa hle. A inkhawmna hmuna tawngtai mi te nun leh ama nun chu a tehkhin a, a insit hle mai. Thil tam tak ngaihtuahin chhandam a la ni lo tih te a ngaihtuah chhuak a, chhandamna chan chu atan thil pawimawh hmasa ber a ni tih hrechhuakin a inah a haw a, a khum kianga chuan thingthiin a tawngtai ta a. Pathian hnenah chuan a nun tawp tak laka chhanchhuak tur leha sual te ngaidama amah chu malsawm turin a dil ta a. Kum 1825 November thla Inrinni zan Pathian hnathawh ropui tak chuan he misual nun hi thlak danglamin he zan atang hian a zuin thin te a bansan ta a, dawt sawi leh rukruk te pawh bansan ta hmak a ni. Kum 1826, January thla atangin Missionary te thuziak chhiar a ching chho tan a, chu’ng missionary te kam chhuak chuan a rilruah nasa taka thusawiin Muller-a chuan Missionary nih chu a tum ta hle. Missionary hnathawh a tum thu a pa a hrilh chuan a pa chuan Pastor hna la thawk se a duh avangin a remtih pui lo hle mai a. Mahse Muller-a rilru-ah Missionary hnathawh duhna lian tak a awm avangin a pa pur buai lova a zirlaiah pawh amah leh amah inchawm mai a tul ta. Tichuan Halle University-ah chuan American College Professor te German tawng zirtir leh an tawng lehlin sak hna a thawk ta a, a hlawh pawh a tha thawkhat hle.

Muller-a hian a pianthar atang hian kohhran hrang hrangah thusawina hun te a hmang thin a, a sermon hmasa ber chu Halle University atanga mel 6-a hlaa khaw pakhatah August 27, 1826 khan a sawi a ni. Hetih hunlai hian Halle University-a Divinity zirtirtu August Hermann Francke-a’n fahrah chawmn In a din-ah thla hnih chhung chengin hna a thawhpui a. Hei hi a hnu zela a hmingthanna, Bristol khawpuia fahrah chawmna in lian tak a din chhoh nana thil tangkai tak leh puitu tha tak a ni. Kum 1828-ah Halle University atang hian a inzir zo a, theihtawpin rawngbawlna lamah a inhmang chho ta zel a ni.

            Hetianga rawngbawlnaa a inhman chhoh lai hian kum 1828 khan Muller-a chuan London-a Juda sakhaw vuantute zinga rawngbawl tu pawl London Society for Promoting Christianity Amongst the Jews (LSPCAJ) hnuaia thawk turin a inziak lut a. He hna thawk tura London a thlen hlim hian nasa takin a damlo ta a, amah phei chuan a damchhuah pawh a inring tawh lo hial a ni. Tichuan inenkawl turin Teignmouth-ah a kal a, hetah hian a damchhunga a thian tha tak ni zui ta Henry Craik nen an intawng a ni. A damchhuah hnu hian Juda ho zinga rawngbawl hna thawh a tum hi Pathianin rem a ti lo nia ngaiin a bang ta a, Exmouth, Teigmouth leh Shaldon khua vela kohhran hrang hrangah Pathian thuchah sawiin hun a hmang ta zawk a. Kum 1830 khan a thian chhar thar Henry Craik-a sawmna angin member 18 lek awmna Ebenezer Chapel, Devon-ah Pastor hna a thawk ta zawk a ni.

Devon-a a awm lai hian Exeter khaw daifema kohhran pakhatah thusawina hun a hmang thin a. Hetih hunlai hian rualbanlo pakhat Mrs Hake-i nen an cheng dun thin a. Chutih laia an in enkawl thin tu kum 29 mi, Mary Groves nen chuan an in ngaizawng ta a. hetih lai hian Muller-a hi kum 24 mi chauh nimah se a rawngbawlnaa puibawm tu tur nupui a mamawh nia a inhriat avangin Mary Groves nen hian October 7, 1830 khan St. David’s Church, Exeter-ah an innei ta a ni.

Muller-a hian pastor hna a thawh chhung hian kohhran siamthatna lamah hna nasa taka thawkin kalphung tam tak a thlak a. kohhran member ten thawhlawm hi Pathian ram tana an inphalna vang nilova an tih tur hrim hrim (duty) nia an ngaih palh hlauvin hlawh pangngai pawh a la duh lo a ni. Hei bakah hian hetih hunlai hian kohhran member ten Biak inah thutna bik neiin chu chu sum hmangin an hawh thin a. Hei pawh hi mi hausa leh rethei te inkar tizautu ni a ngaiin Biakin thuttleng, sum peka hauh lawk (renting of pews) chu a ti tawp nghe nghe a ni.

            Kum 1832-ah Bristol-ah a insawn a, hetah hian a thih thlengin Bethesda Chapel-ah rawngbawl hna a thawk a ni. Muller-a hi rawngbawlna kawngah hian a kaltluang ang reng hle a, kum 1834-ah Scriptural Knowledge Institution for Home and Abroad dinin he mi hmang hian Bible leh Bible Tract te an sem a, Sunday school, puitling school leh sikul pangngaite he Institution hnuaiah hian a din a ni. Kum 1935-ah chuan sikul panga he Instittution hnuaiah hian a ding hman a, sawrkar atanga tanpuina hmu lovin mi hrang hrang thilpek tlingkhawm ringin an kal a, thilpek pawh an dawng nasa hle.

            Sept 17, 1832 khan an fanu hmasa ber Lydia chu a piang a, a hmaa kan sawi tawh angin Feb 25, 1834-a The Scriptural Knowledge Institution for Home and Abroad a din hnuaiah hma nasa taka lain he institution hnuaiah hian School hrang hrang bakah Sunday School leh puitling school te din a ni a. Man tlawm zawka Bible te zuarin pawisa neilo hnenah te an sem a, Missionary hrang hrang an chawm bakah tawng hrang hrangin Pathian thuziak an sem bawk a. Tin, an hmalakna lian ber Fahrah chawm chuan hriat a hlawh zuiin Muller-a pawhin he hi a buaipui zui ta ber a ni.

            March 19, 1834-ah an fapa Elijah chu a piang a, mahse Elijah hi kum 1 lek anih laiin Pneumonia natna avangin a thi ta mai a. Hetih lai vek hian Muller-a hriselna pawh a tlahniam em em a, rawngbawl hna pawh a hahchawlh san lailawk rih nghe nghe. Hetih lai hian Muller hian amah leh Pathian inkar chanchin a ziahna ‘The Narrative of the Lord’s Dealing with George Muller’ tih lehkhabu chu a ziak thung a ni.

            Fahrah te pa: Hetianga hrisello taka hun a hman lai hian a rilruah fahrahte enkawlna hmun Bristol khawpuia din chu a lian hle mai. Dec 9, 1835 khan a rilru-a awm te chu an inkhawmna hmunah a puangchhuak ta a. Thu a sawi zawh chuan fahrah chawmna din nan mi pakhat hian Shilling 10 lek a pe ta a, nu pakhat chuan thawhpui a inhuam thu a sawi bawk a. Pawisa an nei si lo, din ngei a duh bawksi, Muller-a chu a tawngtai ta ngat ngat mai a. Ni 5 chhung zet Pathian hnena an dil hnuah Dollar 300 lai mai a dawng ta hlauh mai, fahrah chawmna in an luah thei dawn ta a, thawk tura inpe pawh a hmu zel mai. Pathianin a tawngtaina a chhang tan ta.

            Tichuan April 11,1836 khan a nupui nen Number 6 Wilson Street-ah in an luah ta a, fahrah 26 enkawl nghalin heng mite hi hmeichhe naupang vek, kum 7 atanga kum 12 inkar an ni. Tichuan Nov 28, 1836-ah nausen atanga kum 7 mi thleng enkawlna tur fahrah chawmnain pahnihna an din leh a, kum 1837 September thla khan a pathum nan fahrah chawmna in dang, mipa naupang kum 7 chin chunglam enkawlna tur an din leh a ni. Naupang a enkawl tam zel a, hmeichhe naupang enkawlna tur in dang luah belh tulin a hria a, tichuan, July 1844 khan fahrah chawmna in palina chu Wilson Street-ah a luah leh a, naupang 130 chuang a chawm ta. Naupang ho chu an bengchhen leh ninhlei hlawm em avangin chulai hmuna chengte chuan thuneitu te hnenah an sawisel ta a, Muller-a pawh chuan hmundang a ngaihtuah a ngai dawn ta.

            A inluah lai atanga a chhuah chuan Muller-a hian naupang 300 chenna tur in Dollar 60,000 man lai a sak a ngai dawn tih a hria a, neih a nei si lo. Mangang takin Pathian hnenah a tawngtai leh ta ngat ngat mai a. Ni 36 zet a tawngtai hnu chuan $6,000 a dawng ta nawlh mai. Mi hrang hrang rilruah Pathianin hna a thawk a, Muller-a chuan fahrah chawmna in sakna turin mi hnenah sum dilkual lo mahse a harsatna chu an hmuhpui a, June, 1848 a lo thlen chuan fahrah in a sakna tur atana a sum mamawh $60,000 chu a nei ngah ta.

a fahrah chawmte

            Tichuan July 5, 1847 atangin Ashley Downs-ah in a sa tan a, building hmasaber chu June, 1849-ah hawn niin naupang 300 leh a enkawltu te chu Wilson Street-a an inluah atangin an insuanlut ta a ni. He hmunah hian kum 3 vel chauh an awm tihin Muller-a hian fahrah in dang sak leh tulin a hria a. Mak tak maiin thilpek hmun hrang hrang atangin an dawng a, Nov 12, 1857-ah building pahnihna chu $1,26,000 senga sa zo vin chu hmunah chuan fahrah 400 lai an enkawl leh thei ta. March 12, 1862-ah Building 3-na sa lehin naupang 450 hetah hian an enkawl leh a, building 4-na chu Nov 5, 1868-ah sa zo lehin Building 5-na pawh Jan 6, 1870-ah an sa zo leh a, a hnuhnung pahnihah hian naupang 450 ve ve an enkawl a ni. George Muller-a’n Ashley Downs-a kum 1948-a naupang 130 lek a enkawl kha kum 1874-ah chuan naupang 2,050 lai a enkawl ta a, nikhata an ei leh in ringawt pawh a tam tham si, Pathiana innghat tlut mai chi nilo se zawng he hna ropui leh hahthlak tak hi Muller-a hian a kengkawh zo hauh lo ang le. Heti hian a hnathawh dan chanchin a sawi-

            “Pathian, ka Treasurer rinawm hian min awmpui reng a, min awmpui lo se chuan kumtina $2,64,000 sen ngai rawngbawlna hi ka kengkawh zo hauh lo ang.  Pathian chu fakin awm rawh se. Nitin naupang 2100 lai mai chu an eitur mai bakah an mamawh tinreng pek a ngai a, missionary 189 lai chawm a ngai bawk. School 100 chuang naupang 9000 chuang zirna enkawl a ngai a, Pathian thu ziak maktaduai 4 chuang semchhuah a ngai bawk nen . Heng ka hna zawng zawng hi amahah ka nghat a, ka mamawh chu aman min pe mai thin.”

            Hetianga fahrah tam tak a enkawl chhung hian George Muller-a hian sum lama regular taka tanpuitu bik a nei ngai lo va, leiba pawh a nei ngai hek lo. Pathian a ring tawp a, a rin Pathian chuan a mite kaltlangin Muller-a hi a tanpui mai thin.

            Tuk khat chu Muller-a leh a fahrah chawmte chuan chaw eitur an nei lo va, a leina tur an nei hek lo. Chutih lai chuan naupang ho chuan riltam takin an tukthuan eitur chu an nghak thap mai a. Muller-a chuan naupang ho hnenah chuan, “Naute u, hei in sikul kal a hun dawn tawh a nia,” ti a sawiin a ban chunglamah a phar a, “Ka pa, tukin zingah hian eitur chaw min pek dawn avangin kan lawm e,” tiin a tawngtai ta. A tawngtai zo chiah tihah chuan tu emawni hian kawngkhar a rawn kik a, chhangurtu a ni. Chu pa chuan, “Pu Muller, eitur in nei lo ni a ka hriat avangin nizan ka mu thei reng reng lo mai a, zing dar 2-ah thovin in chhang ei tur ka lo ur sak che u a sin,” a ti a, chhang a rawn pe teuh mai a. Muller-a chuan lawmthu a hrilh zo chauh tihah chuan kawngkhar an rawn kik leh a, chu chu bawnghnute semtu a niin Muller-a fahrah enkawlna in kawtah chuan a bawnghnute phurhna tawlailir hi a lo chhia a, a tawlailir tiruak a a chhelai a siam theih nan Muller-a naupangte chu a bawnghnute chu a pe ta vek a. Chumi tuk chuan puar takin Muller-a rin, Pathian ngei chuan hmanraw hrang hrang hmangin Muller-a leh a fahrah te chu a hrai puar ta a ni. Muller-a hian Pathian a rinna avanga mak tak taka thilpek a dawn thin avangin a hnu a rawngbawla a vahchhuahnaah te chuan ‘the man who get things from God’ (Pathian hnen atanga thilpek dawng thin mi) tiin sawi a ni ta fo reng a ni.

            A rawngbawlna atana thilpek (donations) a dawn reng reng hi fel takin a ziak lut thlap thin a, receipt fel tak siamin buhfai tham khat petu atanga pawisa tam tak pe tu thlengin a chhinchhiah a, thilpek petu te hnenah hian a kum leha an pawisa hmandan (annual report) an siam nen en mila, an pawisa pek chu tha tak a hman a ni tih an hriat theih ngeina turin an receipt chu dahtha a, annual report nen lo enmil ve turin ngenna a siam thin. George Muller-a hian fahrah enkawl hna hi a uluk em em a, tuktin Pathian thu chhiar a tawngtaihona neih pui thinnin Fahrah chawmna in chhuahsan tur apiangte chu Bible, thingrem leh thawmhnaw pair hnih nen a chhuah tir thin. Fahrah naupangte chu zahawm takin thawmhnaw a inbel tir a, lehkhathiam takin an chhuak thin a, zirna quality a that theih nan School Inspector hran a dah hial a ni. Hei vang hian Bristol khawpui chhehvela Industry te chuan hlawhfa chshawr tur an duhkhawp an hmu thei lo hial a ni.

Muller-a fahrah chawmna vawinah

            Muller-a hian kum khat chhungin Dollar 12,000 vel dawn a la lut ve a, sawma pakhat chuang chauh aman changin sawma pakua chu rawngbawl nan a pe chhuak thin. Kum 1870 Feb 6 khan a nupui kum 72 mi Mary Groves chuan Rheumatic Fever avangin a thihsan a. Hemi hnu lawk kum 1871-ah a hnuaia thawk James Wright chu Mullera fanu Lydia nen an innei a, Wright hian Muller-a thian tha tak leh a thawhpui Henry Craik-a ai a awm ta a ni. Muller-a pawh hi Nov 30, 1871-ah nupui thar, kristian tha tak mai Susannah Grace Sagar chu a rawngbawlpui atan Pathianin a pe leh a, hetih hunlai hian Muller-a hi kum 66 mi niin anupui hi kum 40 bawr vel niin Muller-a rawngbawlna atan puitu tangkai tak a ni.

            Khawvel ram zau zawka rawngbawlna: Kum 1870 chhoah chuan Muller hi khawvel huapin a lar hle tawh a. Rawngbawlna nei tura sawmna tam tak a dawng reng a ni. Heng sawmna te hi tih hlawhtlin ngei a duh a, tichuan kum 1875 – 1892 chhung khan Scriptural Knowledge Institution for Home and Abroad hnuaia a hna zawng zawng chu a makpa James Wright-a kutah dahin ram hrang hrangah rawngbawlin a vakchhuak ta. Ram hrang hrangah sawm anih angin a kal zel a, ram 42 chuangah rawngbawlna a nei a ni. Rawngbawla a zin kawng thui zawng hi Mel 200,000 chuang a ni a, he kum 17 chhung hian mi maktaduai 3 chuang hnenah thuchah a sawi a ni. Rawngbawla a zinchhuah tan  hian kum 70 mi a ni tawh a, kum 87 mi anih thlengin khawvel hmun hrang hrangah rawng a bawl a ni.

            Hun tawp lam: Ram hrang hranga kum 17 chhung teh meuh an nupaa rawngbawla an zinkual (missionary tour) hnu hian Muller-a pawh kum 90 a lo chuang ve ta. January 13, 1894-ah a rawngbawlpui leh a nupui pahnihna Susannah chuan a thihsan a. Upa tak leh khawhar tak chungin a fahrah chawmna inah chuan hna a la thawk tauh tauh peih a ni. March 10, 1898 khan a sermon hnuhnung ber ‘Isaia Inlarna’ chu  Alma Road Chapel, Clifton-ah a sawi a. Chumi atanga ni lina March 10, 1898-ah chuan a awmpuinu chuan a khum sir a a lo thi khawng reng mai chu a va chhar ta a ni.

            Muller-a hi March 14, 1898-ah Bristol-ah vui a ni a, a nupui pahnihte ruang zalhna kiangah phum a ni. Muller-a vuini hian Bristol kawtthler chu amah vuitu mipuiin a khat a, a fahrah lo enkawl seilen tawh sing chuang te chuan an tah hawm hawm mai a ni.

            Tawngtai mi Muller-a: Khawvelin George Muller-a a hriatrengna chu Fahrahte pa anihna leh tawngtai mi a nihna hi a ni awm e. Muller-a chanchin sawi reng rengin tawngtai mi a nihna hi hmaih phal chi a ni lo reng a ni. Muller-a hian engkim mai hi tawngtaina hmangin Pathian a hrilh a, lawmthu hrilhin a manganna apiang Pathian hnenah thlenin a chhanna hmuh ngei a beisei tlat thin. Muller-a hian a tawngtai chhanna a hmuh te hi a diary-ah achhinchhiah thlap zel a, a tawngtai chhanna atangin Pathian rinawm zia a hmuh chian zia a sawi chamchi reng a ni. A diary-a a ziak danin a tawngtaina hmuh theihin Pathianin vawi 50,000 chuang a chhang a, heng zinga vawi 30,000 zet chu darkar 24 chhunga Pathian chhanna a hmuh te an ni.

            Muller-a tawngtaina Pathianin a chhan nghal tlem azawng i han ziak teh ang-

            Tumkhat chu a fahrah chawmna ina tui tih lumna (boiler) chu a chhe hlauh mai a, khua lah chu a vawt si, tui lum tel lo a khawsak chi zia zang a ni si lo. Chu a chhapah khua chu a vawt tulh tulh mai bawk a.Tahchuan Muller-a chuan Pathian hnenah thil pahnih a dil ta- pakhat chu a siamtu tur ten zankhuaa chawl lova hna an thawh duh nan leh pakhat dang chu khua a that theih nan a ni. Tichuan a tawngtai ta, a tuk zingah chuan khua a rawn tha ta uar a, thli lum a rawn thaw zui ta bawk. Chumi tlaiah chuan a siamtu tur te an lo kal a, hna hmanhmawh thlak a ni tih hriain an hotupa chuan a mechanic te chu chawl lova siam char char turin thu a pe a, zankhua chuan an thawk a, Boiler pawh chu darkar 30 chhungin chawl miah lovin an siam a, an siam tha thei ta a ni.

            Jan 14, 1865 khan thli na tak maiin Bristol khawpui a nuai a, Mullera fahrah chawmna in chung pawh hmu 20 chuang laiah a chhem pawpin tukverh pahnih a chhe bawk a. A siamtu tur an ko a, mahse ruah a sur nasat avang leh thli a la tleh reng avang chuan a siamtu tte chuan an Thawhtanni hma chuan a siam theih an ring lo. Siam a nih loh chuan fahrah chawmna in chu a chhiat belh zel dawn a, mutbu leh lehkhabu etc te chu a chhe nasa dawn hle tih Muller-a chuan a hrechiang em em a, tichuan Pathian hnenah a khaw tha dilin a tawngtai ta. A tawngtai zawh hnu lawkah chuan thli thaw vur vur chu a reh a, ruah a bang a, inchung an siamthat chhung zawng chu a sur leh ta miah lo a ni.

            Tumkhat leh pawh Atlantic tuifinriatah SS Sardinian lawng hmangin an zin a. Tuifinriat lailia an thang lai chuan chhum chhah em em mai hi a zing ta mup mai a, lawng pawh chu a kal chak tir chi a ni ta lo. Muller-a chuan chu lawng captain Joseph E dutton-a hnenah chuan Australia khawpui pakhat Quebec-ah rawngbawlna tur pawimawh tak a neih avangin a hmanhmawh hle tih a hrilh a, mahse captain chuan afimkhur angaih avanga tlan chak chi a ni lo tih Muller-a chu a hrilh a. Chutah Muller-a chuan lawng captain hnenah chuan lawng chhunga room pakhat Chartroom chu Pathian hnenah chhum kiam tir tura dila tawngtai nana hman a dil ta a. Phalsak anih hnuah Mullera chu a kal ta. Captain pawh chuan hun khawhralna mai mai ti nuah nuah chungin Muller-a chu room chhungah chuan a zui lut ve a. Muller-a a han tawngtai hnu chuan Captain pawh chu a tawngtai ve ta a, mahse Muller-a chuan chu Captain chuan ring tak tak lo chunga a tawngtai avang chuan tawngtai ve lo turin a khap a, amah chuan a tawngtai ta. Chartroom atanga an  chhuah leh hnu chuan Pathianin Mullera tawngtaina a chhanna chu an hmu nghal, chhum chu a lo kiang vek mai. Heta tang hian he lawng captain Joseph E. Dutton-a pawh hi a pianthar phah ta a ni.

            Muller-a hian a thian hnai tak fate, mi panga chu piangthar se atih em avangin Nov 1844 atang khan nitin bang lovin a tawngtai sak ta ngat ngat a. Thla sawm pariat a tawngtai sak hnua pakhat chu a piangthar ta. A la piangthar lo mi pali dang tan a tawngtai leh ngat ngat a, kum 5 hnuah a pahnihna a piangthar ve leh. Kum ruk a tawngtai leh hnuah a pathumna a piangthar ve leh a. Midang pahnih erawh an piangthar mai lo. A thih thlengin heng midang pahnih te hi a tawngtai sak a, a thih hnuah an piangthar ta ve ve niin sawi a ni.

            Muller-a hian Pathian a ring a, a rin Pathian chuan a mangan apiangin a tanpui a, chawpleh chilh tak pawhin a chhang mai thin. Muller-a Pathian hi kan Pathian tho a ni a, Muller-a anga amaha rinna nghat chunga kan mamawh te ahnena kan thlen chuan kan chunga tha tur angzela min chhan hi Pathianin a inpeih reng ani tih Muller-a chanchin atang hian i chiang thar leh ang u.

            (Muller-a thih hnu hian The George Muller Foundation chuan a hnathawh ropui tak te an enkawl chhunzawm a, he pawl hi a hnuah The George Muller Charitable Trust tiin a hming thlak a ni. He pawl hian Bristol leh a chhehvelah thalai leh naupang te enkawlin tisa leh thlaraua an mamawh hrang hrang an pe thin a ni)