Gilbert Renthlei

Pathian tana engkim pe phal

CT Studd

                Khawvel pum huapa lar hi thil harsa tak a ni a, kawng chi hnih a khawvel hriat hlawh phei hi chu mi tlemte chauh an awm. Tuna a chanchin kan sawi tur C.T. Studd hi  khawvelin Cricketer lar leh Missionary anih angin a hria a, mi ropui tak a ni

Pianna: CT Studd hi December 2, 1860 khan Spratton, Northamptonshire, England-ah a lo piang a, a pa hi India leh ramdanga Indigo (Ting) chingtu hlawhtling, sumdawng hausa tak Edward Studd niin kum 1877 khan an chanchin kan lo ziak tawh DL Moody leh Ira D. Sankey te inkawp rawngbawlna atanga piangthar a ni a, a pianthar atang hian a atchilh em em sa pela ram vah leh sakawr intlansiak te chu bansan nghal hmakin Tidworth, Wiltshire-a a in chu Kristian te’n a Pathian an pawl nan leh inkhawm nan a hmang nghal a ni.

            Hetianga a pa Edward Studd a pianthara rawngbawlna lam ngawt maia a tui em em lai hian CT Studd-a leh a nuta pahnih George leh Kynaston te chu Eton College-ah lehkha zirin an awm bo va, a pain piangthar ve tura a duhna erawh chu an thinlung lam chuan a hlat hle. Hetih lai hian a pa chuan a fapa te pathumin Krista an neih theih nan bang lo va tawngtai sakin chu a tawngtaina chu Pathianin a chhansak ta a. Kum 1878-a nipui chawlh an neih laiin Evangelist pakhat chu an chhungkaw bula khawsaa thlarau lama intuaitharna neih pui turin an sawm a. Chu Evangelist rawngbawlna kaltlang chuan CT Studd-a te unau chu an piangthar ve ta a, CT Studd hian a pianthar chanchin hetiang hian a sawi-

            “Evangelist-in Pathian thutiam leh keimaha a tum te, min chhandam thu te chiang taka min hrilh hnu chuan ka thing thi a, ‘Lalpa, ka lawm e’ ka ti a. Chu veleh hlimna leh lawmna nasa tak chu ka thinlungah a lo awm ta a ni. Heta tang hian ‘Pianthar’ awmzia ka hre ta a, a hmaa engahmah ka lo ngaih loh ‘Bible’ chu ka tan engkima engkim a lo ni ta,” tiin.

CT STUDD CRICKET KHELH LAI

            Hetia a pianthar hnu hian a lehkha zir chhunzawm zelin an unau hian Cricket khelh thiam tak an ni a, helamah hian an inhmang nasa hle. Amah Ct Studd ngat phei chu leadership quality nei tak a ni bawk a Eton College leh Cambridge University cricket team-ah captain hial a ni a, kum 1882 khan England ram aiawha khel tura koh niin a khelh hnu hian a hma lawka England in an lo hneh loh Australia chu an hneh leh a, CT Studd pawh a lar tawh ngei mai. Hetianga lehkha zir chunga hun a hman lai hian Eton atangin Trinity College, Cambridge-ah a insawn a, Trinity atang hian kum 1883 khan a graduate ta a ni.

            Kum 1884 khan a unaupa George chu a damlo chau hle mai a, chutianga a unaupa khumbeta na a awmpui lai chuan Studd-a rilruah chuan zawhna pakhat, “Mihringin chatuan rorelna a hmachhawn dawn hian enge hmingthanna leh ropuina hian hlutna a neih?” tih chu a rilruah a rawn thum nawn tluk tluk mai. Hetih lai hian Cricket lamah a inhmang nasain player ropui tak a ni a, ngaihsan leh chawimawi a hlawh nasa hle bawk. CHutih rual chuan a thlarau nun chu a hnungtawlh nasa em em a ni tih chu phat rual a ni lo. A hringnun a han chhuilet a, a game ngainat tak Cricket te leh ropuina, hmingthanna te chuan hlimna a pe lo tih a hrechhuak a, tichuan Studd-a chuan, “Cricket hian rei a daih lo, ropuina leh chawimawina pawhin rei a daih hek lo, he khawvel leh a chhunga awm engmah hian rei a daih dawn lo a, innghahna tlak engmah a awm lo. Mahse he khawvel a ral hnu pawha kan awmna tur chatuan hmun chang thei tura inbuatsaih hi a va tul em!” tiin a rilru a siam thar leh ta a ni.

            Heta tang hian Studd-a hian Krista chanchin tha chu a thiante leh Cricket players dangte hnenah a puangchhuak tan ta nghal a, a unaupa Kynaston-an an college-a zirlai te zinga rawngbawlna a lo kalpui pawh chu a tanpui bawk a, Pathian hnena midangte hruai chu nuam a tiin Chanchin tha puangchhuak tura chakna pek belhchhah turin Pathian a dil tlauh tlauh thin. A phur em avang esrawh chuan hma a sawn phah lutuk lo va, mahse Tirhkohte Thiltih 1:8 ‘Nimahsela Thlarau Thianghlim chu in chunga a lo thlen hunah thiltihtheihna in la nei ang.... kawlkil thleng pawhin ka thuhretute in ni ang,” tih a chhiar atang chuan ama phurna leh chakna te chauh chu a tawk lo tih a hria a, Pathiana innghah tawp mai chu a chakna a ni tih a hre thar tain a thiante leh a inkhelh pui thinte hnenah chuan Pathiana innghat chungin rawng a bawl ta sauh sauh mai a ni.

            Hetianga phur taka rawng a bawl lai hian tum khat chu missionary pakhat hian China rama rawngbawl a la tul zia a sawi chu a ngaithla fuh ta a. A rilruah chuan Sam 2:8 ‘Mi dil rawh, tichuan i rochun atan hnam tin ka pe ang chia, Kawlkil tawp thlengin i ro atan ka pe bawk ang che’ tih chu a lo lut a, chu chuan rawngbawl tura foreign rama zin tur chuan chona nasa tak a pe ta. A thiante leh a chhungte’n  a thil tum thulh tir an tum mahse Studd-a chuan, “Mi thenkhat chuan Biak In thawm leh a dar ri hre phaa rawngbawl duh mahse keichuan hremhmun kawngka bulah chhandamna dawr hawn hial ka duh a ni,” tiin a thil tum chu kaltlang pui a tum ruh hle. Tichuan, rawngbawl tura kohna chiang tak a dawn miau si avangin China Inland Mission Director (a chanchin kan chhuah tawh) Hudson Taylor a hmaah a interview ta a, China rama rawngbawl tur chuan lak a ni ta a ni.

CAMBRIDGE SEVEN

            Studd-a rual hian Cambridge-a zirlai dang paruk pawh China rama rawngbawl tur hian lak an ni a, an pasarih hian ‘Cambridge Seven’ tia inkoin China rama kal tura an inbuatsaih lai hian England ram hmun hrang hrangah rawngbawlna an nei a, an hlawhtling hle. Mi tam takin an rawngbawlna kaltlanga piantharna an chan bakah missionary-a kal chhuak tur phurna leh chona nasa tak Edinburgh, London, Oxford leh Cambridge-a zirlai te hnenah a pe a, hei hian a hnua khawvel hmun hrang hranga missionary rawngbawlnaah nghawng a nei nasa hle.

            Tichuan, February 1885 khan China panin an chhuak ta a, thla khat chuang mah an thang hnuin March 18, `1885-ah Shanghai an thleng a, Shanghai an thlen hnu hian tawng an zir ta char char a, nikhatah darkar 7 atanga darkar 10 te Mandarin tawng zirin hun an hmang thin a, Chinese ho chaw ang eiin an nundanin an nung ve ta nghal a, rawngbawl hna chu an thawk ta nghal char char a ni.

            Hetianga China rama rawngbawl hna an tan dawn hian Cambridge Seven te chu Hudson Taylor-an rawngbawl dan tur a kawhhmuh a, China rama European ho awmkhawmna an fang ta a, mi engemawzat Krista hnenah an hruai a ni. Chinese tawng an han zir ta chu har a ti ve hle mai, rawngbawlnaah thahnem an ngaiin an hmanhmawh si a. Tichuan CT Studd-a leh a thiante chuan Pathian hnenah a thiltihtheihna an chunga lan tira thawk lehkhata Chinese tawng thiam tir turin chawngheia tawngtaiin an dil ta a. Mahse an dilna chu Pathianin a chhang lo. Hmanhmawh lova Chinese ho culture zir chung zela an tawng pawh zira, a rammi te mizia leh duhzawng te zir chho zel turin Pathianin CT STudd-a leh a thiante ‘Cambridge Seven’ te chu a duh zawk a lo ni.

            Rawngbawlnan a ro a pe: CT Studd hian rinnaah a nun a nghat nasa hle a, Kristian dik tak chu Pathianin a mamawh tawk a pe mai thin niin a ngai. Hei vang hian England-a rawng a bawl lai pawhin piangthar dik tak te chu Pathian tana pen chhuak ngam tura fuihin Pathianin an mamawh chu a mite kaltlangin a pe mai dawn tih a hrilh thin. Hetiang bawk hian amah pawhin a pe nasa hle. China pana a kal hma khan kum 23 mi chauh a nih laiin dan angin ro a la khawm thei si lova, kum 25 a tlin huna a pa ro a khawm tur zat leh a hman dan tur a in khap nasa hle. Chutih lai chuan Bible chang Marka 10:21 “Kal la i neih apiang hralh la, pachhiate hnenah pe rawh, chutichuan vanah ro i nei ang” tih chuan a rilru a luah hle a. Tichuan kum 1885-a a kum 25-na birthday lawm anih tumin a pa, sumdawng hausa tak maiin a thihsan atangin Dollar 1,45,000 chuang a rochun ta a, heng sum tam tak hi rawngbawlna atan pein Moody Bible Institute-in Tricot, North India-a rawngbawl hna an tanna atan Dollar 25,000 a pe a, George Muller-a mission atan Dollar 20,000 pein fahrahte tana a hnathawh tanpui nan Dollar 5,000 a pe bawk. Whitechapel-a George Holland-a’n London mirethei a enkawlna atan Dollar 25,000 a pe bawk a, S.A. Commissioner Booth Tucker-an India rama Salvation Army hmanga a hnathawhna atan Dollar 25,000 a pe bawk a ni. Hemi hnu hian a rochun tur zat a chian hnuah heng mite hi Dollar 5,000 theuh a pe leh a, a mah chuan Dollar 17,000 chauh a chang ta a ni. Heng sumte hi a hunlai chuan tam tham tak a ni.

            Nupui: Kum 1887 khan Belfast, Ireland ami Priscilla Livingstone Steward chu China rama rawngbawl turin Shanghai a rawn thleng ve a, Lawngpu ho awmkhawmnaah rawng a bawl thin a ni. He hmunah vek hian Studd-a pawhin rawngbawlna a lo kalpui ve bawk a. Chuta tang chuan inhre chhovin an inngaizawng a, April 7, 1888 khan Chinese pastor kutah an innei ta a ni.

            An inneih hma chiah hian CT Studd-a hian a nupui tur Priscilla chu a pa ro a khawm hmun hranga a sem atanga a bang a la neih Dollar 17,000 chu present atan a pe a. Chung pawisa chu Pathian duhdan nia an hriat angin Priscilla nen an inneih hnuah General William Booth-a Salvation Army hotu hnenah a rawngbawlna atana a hman turin an pe ta vek a, van bank-ah an ro an khawl khawm zawk thu an hrilh nghe nghe a ni.

            Hetianga General Booth-a hnena an sum an pek hnu hian an nupa chuan Dollar 5 chiah an nei bang a, mahse an thiltih chu Pathianin a theihnghilh lo, mal nasa takin a sawm ta zawk a ni. China ramah hian kum 10 chuang rawng an bawl dun a, thlarau bo tam tak Lawng pu te, a ram mi te, Opium addict te Krista ke bulah an hruai thleng a ni.

            Kum 1889-ah an fa hmasa ber a piang a, a hnuahfa pali dang nei lehin an fa pangana hi nikhat lek hnuah a thi a, England an haw hnuin an fa parukna a piang leh a, hei pawh hi nihnih hnu lekah a thi veleh a, a dam chhun pali te chu hmeichhia vek niin Grace, Dorothy, Edith leh Pauline-i te an ni.

            Kum 1894-ah Studd-a hian Asthma nasa tak a neih avangin in enkawl turin England-ah an haw a, a fanu te hian Chinese tawng chauh an thiam avangin English an zir tha leh a ni.  England-ah pawh hian Studd hian hrisel lo chungin rawngbawl hna a thawh chhunzawm a, America ramah te kalin a unaupa Kynyaston-a rawngbawlna puiin zirlaite zingah harhtharna ropui tak a alh chhuak a, Student Volunteer Movement chu a piang nghe nghe.

            India ramah: CT Studd-a pa khan a thih hma khan thingpui leh Indigo huan zautak a lo neih thinna (a hausak tanna bul) North India-ah an chhungkaw zinga mi tu emaw berin rawngbawl hna thawk se a tih thu a sawi thin a. Chu chu CT Studd pawh hian Pathian kohnaah ngaiin India rama rawngbawl tur chuan a inpuahchah ta. Kum 1897-ah India ramah rawngbawl turin an kal a, Tricot-ah inkhuarin hetah hian thla 6 chhung rawng a bawl. Hemi hnu hian South India-a Ootacamund-ah pastor hna thawkin kum 6 chhung (1900-1906) a awm leh a. Heta a hnathawh hi China rama a thawhdan nen chuan dang hle mahse helai hmuna British mi hnathawka awm hrang hrang leh a rammi tam tak Krista hnenah a hruai a ni. South India sik leh sa chu a Asthma veiin a ngeih loh em avangin zan a mu tha hleithei lova, tichuan kum 1906 kum tawp lamah England-ah a haw leh a, a rawng lo bawl tawhna hmuna rawngbawl tura midang chhar chhuah a tum hle.

            Africa-ah: England-a theih ang tawka rawng a bawl laiin kum 1908 khan ni khat chu Liverpool khawlaia a tei laiin kawngsira Poster lo intar a hmu a. Chutah chuan “Cannibals (Hringei) te’n Kristian te an duh” tih a lo inziak a. A nuih liam mai. Mahse chu thu chu hriatchian a duh avangin a ziaktu Dr Karl Chum, Africa rama missionary chu a zawngchhuak a, an ti ti chun ta.Dr Karl Chum chuan a thinlung zawng zawngin Africa rama Pathian ram tul zia CT Studd-a chu a hrilh a, Africa rama Explorer te, sal hmanga sumdawng te, European Officials te an kal laia Missionary tumah chulai hmuna kal duh an awm si loh thu te chu lungchhe takin a sawi a, a thusawi tawpah, “Engatinge Pathian kohna hi tuman an hriat loh a, tuman an chhan loh le? Engatinge nangmah i kal mai loh?” tiin Studd-a chu a sawm ta.

            Chu missionary thusawi hmang chuan Pathianin C.T. Studd-a thinlungah nasa takin thu a sawi ta. “Lalpa, keimah ka kal ang e,” tiin Africa rama rawngbawl tur chuan a inpuahchah ta a. Mahse Kum 50 chuanga upa, kum 15 chuang hrisellohna hrang hrangin a tlakbuak tawh, a neih zawng zawng Pathian tana pe zo vek a sum neih reng nei tawh lo chuan engtin nge Africa ram a thlen ang? Kristian sumdawng hausa tak takte chuan Africa rama a rawngbawl theih nan an puih theih thu a hre ta hlauh a, mahse Africa khawlum tak maia kal leh tur chuand doctor thurawn la hmasa turin an ti a. Tichuan doctor hnenah a inentir ta. Africa ram sik leh sa chu a Asthma in a huat dawn thu leh kal lo chu a tan a him zawk thu Doctor chuan a lo hrilh a. Chuvang chuan amah puitu tur ber te pawh chuan a pui theih loh thu an hrilh zui a. Hei hian Studd-a chu a tihnual hle mai. Mahse Pathian kohna a hrechiang si a, kal lo thei a ni lo. Chutianga lungngai taka a awm lai chuan a rilruah beiseina a nei ta, “Pathianin hun kha leh chen China leh India-ah min hruai a, Africa ramah pawh hian min hruai leh dawn a ni,” a ti a, Dec 15, 1910 khan amahin Africa ram chu a pan ta a ni.

Hemi tuma Afica ram a pan hian a nupui fanaute hruai lovin amahin Africa hi a pan a, Sudan khawpui Khartoum thlengin Khartoum-ah hian ni rei lote a chawl a. Chumi hnuah Bishop Gwynedd-a nen Sudan ram chhimlam fang tura thawkchhuakin tawlailir leh ke-a kal chungin malaria tamna rama an rawngbawlna hmun zirchiang tur hian thla hnih leh a chanve chhung an thang a, an tawlailir hnuktu sabengtung 29 zinga 25 lai chu hemi tum hian an thi nghe nghe. Sudan chhim lam an fan zawha an lo haw leh hnu hian Studd-a hian  Malaria natna a kai ve a, a damlo chau hle mai. An ram fan, Nile luikam leh Lake Chad chhehvela hnam mawl leh rethei tam tak, dawi leh ramhuai biaa mihring sa ei thin, Krista chanchin la hre ngai hauh lo te hmel a hmuh chuan Studd-a chuan a damchhunga Africa rama rawngbawl turin a rilru a siam ta a ni.

Kum 1912-a malaria a vei enkawl turin England-ah a haw a, hemi tum hian Heart of Africa Mission (H.A.M) din niin CT Studd chu Director hmasa ber a ni. HAM mission headquarter atan leh a chhungte lo chen nan hian Upper Norwood, London-ah Studd hian In a lei a, hemi rual hian Cambridge University pawh tlawhin Pathian ram tul zia a tlangau pui a, a hnathawh rawn zawm ve turin mi dang a sawm bawk. Kum 1913-ah Africa-ah let lehin a kal dawn hian a nupui kalsan chu har a ti hle mai. Mahse Studd-a chuan, “Isua hi Pathian a nih a, ka tan a thi a nih chuan a tana ka inpeknaah hian lutuk a awm thei lo,” tiin Africa chu a pan ta a, hemi tum hian Alfred B. Buxton chuan a zui a ni. Buxton nen hian Kenya leh Uganda ram chhung atangin Lake Albert thleng an fang a, helai hmun lo awptu Belgian Official te pawhin an lo dawngsawng tha hle. Hmun hrang hrangah zin kualin ramhnuai pilril tak tak te an fang kual a, tichuan Congo ramhnuaia hnam mawl te zinga rawngbawl turin kum 1913 October 16 khan an in bengbel fel ta a ni.

Hetia an inbun fel hnu hian Niangara-ah mission station hmasa ber kum 1915 khan an din a, chumi pah chuan an chhehvel hnam hrang hrangte an zir chiang bawk a, hnam pariat zinga rawngbawl turin Mission Station hrang 4 an din ta phawt a ni.  Hetianga rawng an bawl tan takah hian Studd leh Buxton te chu inthen hrangin Studd chu Congo luipui dung zawh thla zelin chanchin tha a hril a, mel 300 chuanga hlaa tuifinriat a finna thlenga kalin chumi hnuah Africa-a rawngbawl tur thalai zawng turin England-ah a let leh a, hetih chhung hian Buxton chuan midang panga nen Napa-ah Pathian thu hril pahin hawrawp an lo siam sak a, an thawkrim hle.

Hetianga Studd-a te Africa rama rawng an bawl hlan hian a nupui chuan England-ah Heart of Africa Mission (H.A.M) office lo enkawlin Prayer Centre te  a lo din a, Pathian thuziak pamphlets te a lo buatsaih ve thinin chanchinbu te a lo chhuah thin a. Kum 1914-a Studd-a’n a nupui damloh avanga England-a a hawn leh tum hian Africa rama rawngbawl tur mi pariat a hmuh belh a, a fanu Edith pawhin Studd-a rawngbawlpui Alfred Buxton nen an inneih dawn avangin a kal tel bawk a, tichuan July 24, 1916-ah Africa chu an pan leh ta a ni.

CT Studd-a hian Africa ramah hian kohhran tam tak a din a, ringthar te chu rawngbawl thei turin a buatsaih zel bawk a, hei hian a hnathawhah hmasawnna a hmuh tir nasa hle. Mihang ho chuan an ngaina hle a a hming pawha ko lovin ‘Bwana’ tiin an ko thin. Ituri ramhnuaia Lal ropui tak Ibambi chuan Studd-a chu ram pein a khuaa Mission Headquarter sawn turin a sawm a, Studd-a pawhin he khuaah hian a Mission Headquarter a din ta. He khuaah hian Pathian hnathawh nasa taka langin nitin mai hian khaw thenawm atangin mi tam tak baptisma chang turin an lo kalkhawm ruih ruih thin a, chu chuan rah duhawm tak chhuahin lal Ibambi-a khaw thenawm lawk Imbai khuaah Biak in mi 1200 leng chu a rammi ten an sa ta mai a, Adzangwe khuaah pawh Kristian 500 chuang chuan Sunday apiangin Pathian Biak inkhawm an nei thin bawk a, an khaw thenawm te chu chung khuaah chuan Pathian be turin an kalkhawm thin a ni. Hetih lai hian Studd-a hriselna hi a tlahniam hle a, England lama inenkawl tura haw turin thurawn mi hrang hrangin pe thin mahse Pathian hnathawh midum ho chunga lang mek chu hmuh a duh avangin a haw duh lo a ni. Rim takin a thawk a, Africa hnam mawl sang tam takin Pathian an hriat phah a ni.

Kum 1928-ah a nupuiin, a bula awm a thlakhlelh em em thin, Pathian ram tulna avanga a theih siloh Priscilla chuan Egypt-ah Studd-a hi a rawn tlawh a. African ho chuan an lo ngaisangin Kristian 2000 chuang an kalkhawm a ni. Hemi tuma an nupaa an inhmuh hi an inhmuh hnuhnung ber a ni ta a, a kum leh 1929-ah Spain rama Malga khua a tlawh laiin Priscilla hi a thi ta a ni.

Hetih lai hian Studd-a hriselna pawh a tlahniam chho zel a. July 12, 1931 khan Ibambi khuaah inkhawm a kaihruai a. A tuk thawhtanniah chuan a khua a sik seng seng avangin quinine in a injection a. Ziaawm lam pan hleithei lovin a mit-a lungte awmin na a rawn siam pawh chuan mutmu a tuah tir thei lo. Thawhlehni leh Nilaini-ah pawh a ni telin a zual zel a. Ningani a lo thlen chuan a chau ta hle aniang tawng pawh a tawng peih ta lo. Zan dar 7 a rik chuan a tawngkam hnuhnung ber ‘Haleluiah, Haleluiah!’ tia tawngchhuakin a rawng a lo bawlsak thin Pathian hnenah chuan a chawl hlen ta a, a ruang chu mihang Kristian 2,000 chuang leh mihang lal panga kalkhawm ten Africa ram pilril taka thlan mawlmang te an laihah chuan an zalh ta a ni

            Kum 1909-a Doctor ten Africa rama rawngbawl tur chuan a hriselnain a tlin lo nia an lo sawi chu an lo tidik lo nasa mai. CT Studd hian Pathian rinchhan chungin huaisen takin Africa ram a luhchilh a, malaria leh natna dang tam tak vei chungin chhel takin rawng a bawl a, kum 20 chuang Africa-ah hian a thawk a ni. Africa rama rawng a bawl lai hian kohhran 200 chuang a ding hman a, a rawngbawlna nghawng zel avangin adang tam tak pawh a thih hnuah a ding leh zel a ni. Amah hi mawlmang takin a nung a, millionaire fapa, ro tam tak khawm tu nimahse pawisa khawl a nei lo va, mau rap in, chirh hmanga a bang zutah a cheng mai. Rawngbawlna kawng hrang hrang atan a ro khawm zawng zawng a sem zawh avangin a fanu pakhat phei chuan a pa hi a huat phah a, a thih dawn tumin a fanu hi Africa-ah rawn kalin a pa hi a rawn tlawh a. Chumi tum chuan CT Studd-a pawhin a fanu chu ro hnutchhiah a duh ve ngei mai. A mau rap in te reuh te ah a hawikual a, a fanu rochun tur thil hlu chu inah chuan engmah a hmu si lo. Chutah a bianga mittui luang zawih zawih chungin CT Studd-a chuan a fanu hnenah, “Chemte, engmah rochun tur che ka nei lo, ka neih zawng zawng Pathian hnenah ka lo pe vek tawh a ni,” a ti ta a. Heta tang hian a pa laka hel, a fanu pawh chu a inchhirin a pa rinna ropui tak mai chu a hmu thiam ta a, Pathian hmangaihna nasa tak a pa atang chuan a neih phah ta zawk a ni.

            Ecuador rama missionary martara thi ta Jim Elliot-a khan, “Rohlu bo thei tawh lo tur chang tura rohlu bo thei pe tu chu mi a a ni lo,” tia a lo sawi hma kum 50 daih tawh khan he missionary ropui CT Studd-a hian Jim Elliot-a thusawi hi a takin a lo ti daih tawh a. A pa, mi hausa tak hnen atanga pound nuai chuang a rochun chu Pathian ram rawngbawlnan a bo a bang awm lovin a lo pe tawh a, sul rul leh tui ekin a eichhiat theih tawh lohna Vanah a ro chu a khawl khawm tawh a ni.