Thursday, May 3, 2012


Khuanu kutchhuak ropui
NIAGARA FALLS

US leh Canada inrinnah khuan Niagara lui-ah tuikhawhthla lian em em mai, Niagara Falls a awm a. He Niagara Falls hi hmun thumah khawhthlain heng hmun thuma a khawhthlakna te hi Horseshoe Falls, American Falls leh Bridal Veil Falls ti tein koh an ni.
            History: Historian te chuan Ice Age tawp lama North America khuh luk tu vur khawn (glacier) lo tuiral ta Wisconsin Glaciation in North America-a tuipui lian tak Great Lakes khu a siam niin an ngai a. He Great Lakes zinga tuipui pakhat Lake Erie  atang hian tui luangchhuak lehin Lake Ontario-ah a in chhung lut leh a. He a luanchhuahna hi Niagara lui chu niin Niagara Falls pawh he luiah hian a awm a ni.
            Niagara Falls hming Niagara hi helai hmuna lo cheng hmasa Indian Iroquois tawng ‘Onguiaahra’ tih atanga lakchhawn a ni a, chumi awmzia chu Strait ‘tuipui rek’ tihna a ni. He tuikhawhthla tlawhchhuaktu hmasa ber chu French mi Samuel de Champlain kha niin an sawi a, a ni hian Canada ram leh a chhehvel a fan laiin kum 1604 khan he hmun hi a tlawh chhuak niin sawi a ni. Hetih lai hian mi tam tak chuan kum 1677-a he hmun tlawhchhuak tu Belgian Missionary, Louis Hennepin kha niin an ngai bawk.
            Hetianga Europeans hovin an tlawh chhuah takah chuan he hmun hi a hmingthang ta hle a. Mi tam takin an tlawh a, kum zabi 18-na velah kha chuan Tourism chu helai bialah hian eizawnna tham khawpin a thang lian tawh a ni. Kum 1848-ah Niagara falls chungah hian ke a kal kaina lei sei tak dawh a ni a. Hemi hnu lawkah hian Charles Ellet’s Niagara Suspension Bride chu dawh a ni a. He lei hi kum 1855 khan Engineer lar tak John Roebling-a kutchhuak John Augustus Roebling’s Niagara Falls Suspension Bridge hmangin thlak leh a ni. American Civil War zawh hlim khan Niagara Falls chungah hian rel kaltir tula an hriat avangin a hmaa John Roebling-a’n lung leh thing hmanga suspension bridge a lo siam tawh chu thir hmanga siam a ni a, rel kaltir a ni. He leilawn hi Whirpool Rapids Bridge a ni a, US leh Canada inkalpawh tawnna pawimawh tak niin rel leh lirthei hrang hrangte’n an hmang tangkai hle a ni.
            Niagara Falls hi sawi tawh angin ram pahnihin an insem a. Niagara lui luang hi Goat Island in a hmun hnihah a lo then hrang a, chu chu US leh Canada hian an in chan sem a. America ram lama khawhthla hi American Falls niin he American Falls hi Luna Island in lo then hrang lehin lian vak lovin hmun hran deuhah a khawhthla leh a. He tui khawthla peng hrang hi inneihnaa mo lukhum (Veil) a an em avangin Bridal Veil Falls ti in a hming vuah a ni. Canada ram lamah ve thung hian ropui takin Niagara lui Goat Island in a lo thenhran bung lehlam chu a khawhthla bawk a. He tuikhawhthla hi Sakawr pheikhawk (Horseshoe) anga a kual raih avangin Horseshoe Falls tia koh a ni.
            Niagara lui siam tura Lake Erie atanga tui luangchhuak hi a tam tham hle mai a, hei hian he luia tuikhawhthla hmingthang tak Niagara Falls pawh hi a ti ropui hle a ni. Niagara Falls hmun hniha a lian zawk Horseshoe Falls hi meter 790 chuanga zau a ni a, American Falls zawk hi meters 320 a zau a ni bawk. He tui khawhthla ropui tak atang hian second tinin gallon 6,00,000 chuang a khawh thla pur pur ang a ni.
            Tangkaina: Hetianga tui tam tak khawhliam pur pur hi Sap ho chuan ‘huai’ neiah ngaiin an enliam ve mai lo va, kawng tam takah an hmang tangkai hle a ni. He Niagara Falls hi power siam chhuah nan kum 1759 atang khan an lo hmang hle tawh a ni. Tunah hian Canada leh US ten electric siamchhuah nan hmang tangkaiin he Niagara Falls behchhan hian Canada chuan Sir Adam Beck 1 leh 2 te an bun a, US lam pawhin Robert Moses Niagara Power Plant leh Lewiston Pum Generating Plant te an bun bawk a. Heng Hydro Electric station te hian Electric power 4.4 gigawatts an siam chhuak thei a, hei hian chenna in maktaduai 3.8 lai a chawm thei a ni.
            Heti zozai power siamchhuah anih avang leh tui tha chakna hmanga mill hrang hrang bun anih avang hian Niagara chhehvelah hian Industry tam tak a ding a, mi maktaduai chuang tan an chawbel ber a ni.
            He tuikhawhthla hi khawvela tuikhawthla lian ber leh tui tamna ber a ni a, a ropuiin a hmuhnawm bawk si a, a en turin khawvel hmun hrang hrang atangin tourist te kumtluanin an fuankhawm luih luih reng a ni. A ropuia a hmuhnawm mai bakah hian he tuikhawhthla hi eng mawi tak Xenon Lights 21 hmangin zan lamah an kap eng thin a, a mawi danglam hle. Niagara Falls hi kumtin mi maktaduai 13 chuangin an tlawh ziah anga chhut a ni a, heng tourist te hi Canada leh US tan sum hmuhna tha tak niin mi tam tak tan Niagara Falls hian eizawnna a siam a ni.
            Adventures: Niagara Falls-ah hian mi huaisen tak tak ten thil hrang hrang an lo ti thin tawh a. October 1829 khan Yankee Leapster tia hriat Sam Patch chuan a bula ban sang tak atangin he Niagara Falls hnuaia li-ah hian a zuang thla a, a him hlauh. Kum 1901 October 24 khan zirtirtu kum 63 mi Annie Edson Taylor-i chu barrel chhunga inkhungin he tuikhawhthla hi a in len thlak tir a, thi nel nual mahse a him tlat bawk. Taylor-i barrel hmanga a inlenthlak tir hnu hian mi 14 chuang te chuan tih ve an chak a. Chutih laiin Taylor-i hian a risk a san em avanga ti lo turin a fuih thung a. Mahse mi 14 te chu he tuikhawhthla hi an in len thlak tir ve a, a then chu damchhuak mahse a thenin an thih phah a, ram tui lei lo ten an awm phah a ni. Hemi hnu pawh hian mi huaisen tak tak te’n he Niagara Falls-ah hian Barrel chhunga inkhungin an in len thlak tir ta fo a ni.
            Awle kan sawi tum ber-ah lut tawh ila. He tuikhawhthla ropui tak leh lian tak chungah hian hrui zawh thiam (tightrope walker) Jean François "Blondin" Gravelet chuan a thiamthil a show thin a. Tuikhawhthla sang tak chung feet 170 a sangah chuan thir hrui inch 3 biala lian feet 1,100 a sei an thlung ruah maia. Niagara Falls chunga hrui inthlung chu circus thiam tak mai Blondin-a chuan a zawh chhuak a, a zawh chhuah mai bakah hrui chungah chuan a inbin zak zak a, a chang leh a inrulpui ludin thul. Wheelbarrow nawr chung tein chu hrui chu a zawh thin a, a thil tih entur chuan mi nuaichuang chuang an pungkhawm thin a, hmuhnawm an ti thei hle.
            June 30,1859 khan Blondin-a hian thlirtu mi nuai chuang hmaah Niagara chungah hian circus a bei leh dawn ta. Blondin-a chuan mipui hnenah a mit tuam chunga chu hrui chu a zawh chhuah theih an rin leh rin loh a zawt ta a. Mipui chuan kan ring kan ring tiin an au rual dual dual mai a. Mipui te rin ang ngeiinBlondin-a chuan mit tuam chungin hrui chu a zawh chhuak ta. Hlau leh khur chunga thlirtu mipuite chu Blondin-a’n hrui a zawh chhuah avang chuan an au nasa ngei mai. Chutah Blondina chuan mihring paw chunga chu hrui chu a zawh chhuah theih an rin leh rin loh thu mipuite chu a zawt leh a. Mipui nuai chuang chuan, “Kan ring, kan ring,” tiin an au rual leh ta dual dual mai. Blondin-a chuan tunge ka puak ang? Tiin a zawt ta a, mipui chu thehhmeh ang maiin an reh ta thuap mai. Blondin-a’n mihring paw chunga chu hrui sei tak a zawh chhuah theih chu an ring a, mahse tuman a puak kai nih chu an duh lo. A hnuah chuan mipui zing atang chuan Blondin-a manager Herry Colcord-a chu a lo penchhuak ta a, Blondin-a chuan Colcord-a chu a pua a, hruizen chu a zawh pui ta.
Hrui an zawh lai chuan tuikhawhthla ri hum hum leh thliinsiamte chuan Blondin-a leh a manager hruizen zawh lai chu a rawn ti then hluau hluau a. Mahse Blondin-a thiamna hi a san em avangin leh a manager Colcord-a’n Blondin-a chunga a rinna nghat ngama a lo tal ve sek loh avangin tluang takin ral leh lam chu a zawh kai pui leh ta.
Ral lehlam an kai leh hnu chuan entu mipuite hnenah Blondin-a chuan, “Tunah khan mipakhat ka paw kai a, midang ka la puak kai theih in ring em?” tiin a zawt leh a. Mipui te chuan, “Kan ring e, kan ring e,” tiin an aurual thup thup mai a. Chutah Blondina chuan ‘Kan ring e’ tia au zinga au pawr tak mai pa pakhat hnenah chuan, “Lokal rawh le, ka puak kai theih che i ring a, ka paw kai ang che,” tiin a sawm a. Chupa chuan a duh lo nasa mai. “Ka damchhung hian chu chu a thleng lovang,” tiin a lo chhang a. Hepa hian Blondin-a thiamna hi a ring em em a, mahse a rinna chu Blondin-a chungah a nghah ngam loh avangin hemi tum pawh hian a inpuak tir ngam lo a ni.
Awle Blondin-a circus chungchang leh kan rinna hi i han thlir dun teh ang. Mi tam tak chuan Isua Krista hi min chhandamtu anih thu te, kan tuar ai tuara Kalvari tlangah khenbeh a ni tih te, ni thum niah a tho leh a, vanah hmun siam turin a kal ta a ni tih te chu kan ring vek tiru! Mahse harsatna lian tak awm chu Blondin-a’n pa pakhat a sawm ang deuh hian Isua Krista-ah kan innghat pumhlum ngam lo thin hi a ni. Kan hringnun kawng chhuk chho takah hian Isua Krista ringtu kan nih chuan amahah innghat ngam ila, amah kan rin ngam a kan innghah pumhlum chuan thlipui leh tuifawn karah te, kan harsatna leh hlauhawm hrang hrang karah te Isua hian min hruai ang a, min kal kai pui ngei dawn a ni.
             

1 comment:

  1. Post Tha khawp mai. He thu hi Sermon illustration-ah ka va hmang nasa ve tawh em, hihi

    ReplyDelete