Sunday 25.9.2011
Pakistan Kristian ten Sal an do
Pakistan-a Kristian pawl pahnih Human Rights Focus Pakistan (HRFP) leh Global Human Rights Defense (GHRD) te chuan tunlaia mi rethei leh hnuaihnung zawkte sal ang maia hralh leh hnathawka chhawr luih an ni thin chu dodalin Faisalabad, Pakistan-ah ‘Fight Modern Slavery’ Rally an huaihawt. A huaihawttu te chuan mi tin hnena mihring hmanga sumdawn chungchanga inzirtirna mai bakah an thil tum ber chu mihring hmanga sumdawnna tuartu te harsatna leh tanpui an ngaihna lai sawrkar beng thlen tir a, tanpui leh chhanchhuah an ngaihna te hailan a puanzar chu a nih thu an sawi. He huna thusawi tura ruat speakers, HRFP President, Navin Walters te, Parliamentary Secretary of Foreign Affairs Mr George Clement te leh Social Activist Dr Johnson te pawhin hemi chungchangah hian thu tha tak tak an sawi. He rally-ah hian mu 200 chuang kalkhawmin mihring hmanga sumdawnna leh tihluihna hmanga hnathawk tura inchhawr duhlohna thuziak hrang hrang an keng lang a, speakers te bakah tihluihna hmanga hnathawka lo chhawr hrep tawh Ms Zubeida leh Human Traficking vanga hun harsa tak lo paltlang tawh tu Mr Younas ten an thil tawn hrang hrang rilru khawih tak tak an sawi bawk a ni. Hetianga thusawi hrang hrang ngaihthlak anih hnu hian hun kharna chu Mr Naveen Walter chuan hmangin HRFP leh GHRD te chuan mihring hmanga sumdawnna leh mihring dikna chanvo in rahbehsakna hrang hrang te an do zel dawn thu a sawi a, he rally ‘Fight Modern Slavery’ campaign huaihawt nana sum thawhtu GHRD hnenah lawmthu a sawi bawk.
Kristiante chungthu ngaihtuah dawn.
Iran leh Algeria rama thuneitute chuan Kristian pahnih an hren te chung thu chu an ngaihtuah dawn ta. He an chungthu ngaihtuah turah hian Algeria-a tang mek Siagh Krimo leh Irana tang mek Youcef Nadarkhani te chung thu chu heng ram pahniha roreltu ve ve te’n an ngaituah anga, he hunah hian heng mi pahnihte hi an thiam thu sawina hun pek an ni ang a, Siagh Krimo hi thiamloh chantir anih chuan kum 5 a tang ang a, Youcef Nadarkhani hi thiamloh chantir anih ve thung erawh chuan khaihlum tur a ni ang.
Youcef Nadarkhani hi Iran rama sawrkar pawmpui loh ‘House Church’ pakhata an pastor a ni a. October, 2009 khan Iran ram zirna ina sakhaw dang vuantu te Quran chhiar luih tir an nih thin a dodal avangin man a ni a. Muslim sakhua atanga sakhaw danga inletah leh midang inleh tir(apostacy)-ah puhin thi tura chungthu relsak a ni. Hei hi Jason DeMars, Truth Ministries hotupa chuan Iran sawrkarin Nadarkhani-a Kristianna bansana Muslima inleh tir leh an tumna hmanrua niin a sawi.
Hetih lai hian a chunthu rel ve tur tho Siagh Krimo ve thung hi April 14, 2011 khan an chenna Oran, Algeria-a an thenawmte hnenah Kristian sakhaw chungchang tarlanna CD a pek avang leh Algeria ram danpui Article 144 bis 2-a Blasphemy law chungchang inziahna dan bawhchhia-a puh anih avangin man a ni a. May 4 khan kum 5 chhung tang tura a chungthu rel a ni. He thutlukna hi Siagh Krimo chuan a dan hremi te nen khing let vein a chungchang thu hi thuneitu ten an ngaihtuah tha ve leh dawn a ni.
Siagh Krimo hi nupui leh fanu nausen enkawl lai anih avangin a rilru a hahin a buai ve hle ani tih a thian hnai tak pakhat chuan a sawi a, Muslim chhungkua pakhat hnena chanchin tha a hrilh avanga a nun a inletling thawk mai chuan a bei a ti dawng atawngtaipui a ngai hle niin a sawi bawk. Heng mi pahnihte chungchangah hian Human Rights groups leh sakhaw zalenna atana beitu pawl hrang hrang te chuan US sawrkar chu inrawlh vat turin an ngen a. Pastor Nadarkhani a chungchangah hian US leh Iran sawrkarin sakhaw chungchanga thawhhona an neih loh avangin US inrawlhin awmzia a neih hmel loh a, mahse ramdang, Iran thian tha te chu Pastor Nadarkhani a chunga zahngai tura Iran sawrkar ngen turin US chuan a beisei thei niin US Commission for International Religious Freedom chairman Leonard Leo chuan a sawi.
Hetih lai hian Algeria chungchangah erawh US hian International Religious Freedom zulzuiin Algeria sawrkar chu sakhaw zalenna chungchangah a ngaihdan a hrilh thei a, Algeria hian US rawtnate a pawm chuan an thutlukna pawh a danglam thei dawn a ni tiin a sawi.
San Diego Christian Film Festival
The San Diego Christian Film Festival-in thuchhuah an siam danin kum 2011-a he festival neina hmun tur chu La Jolla, California a nih thu an puang. Nikum khan he festival hi a vawikhat nan neih a lo ni tawh a, kumin Dec 27-30 hian La Jolla-ah hian a vawihnih nan he film festival hi neih a ni leh dawn a ni. Hemi chungchangah hian The San Diego Christian Film Festival produce tu ber Glass Sea Production-a an CEO Richard Bagdazian chuan, “Nikum lam aia lian zawk leh ropui zawkin kumin hian buatsaih kan tum a, kumin festival-a chhawpchhuah tur hian Kristian film tha tak tak 200 chuang pek luh a ni tawh,” tiin a sawi. Kristian nundan, thawnthu leh kalphung behchhana Kristian film siam hrang hrangte chu he hunah hian phochhuah anih bakah kawng hrang hranga tehna hmangin a tha zualte thlan tur a ni dawn a. “He hmun nuam tak hi kan thlanna chhan chu Kristianna behchhana film siam te’n sakhaw ngaihsak lo tak tak te a hip khawm a, Kristian film zirtir nei tha tak tak te’n ngaihhlut an hlawh chho zel theih tura kanbeisei vang a ni,” tiin Richard hian a sawi bawk.
Indonesia Biak in bei
Thihchilh pawl ami suicide bomber pakhat chuan pastor lar Rev Rick Warren-a kohhran, Southern California-a ‘Saddleback Church’ nena inzawm kohhran pakhat biak in, Indonesia ami chu a bei a, mi 2 thiin midang engemawzatin hliam an tuar. He Biak in beih anih chungchang hi Rev Rick Warren chuan Facebook leh Twitter-a Purpose Drive Network Alert-ah puang zarin Solo City, Indonesia-a Bethel Full Gospel Church beih anih thu hi a tarlang a ni. He kohhran beih anih lai hian Bethel Full gospel Church member te chuan inkhawm an bang tan dawn mek a. Hetih lai hian he suicide bomber, kawr var ha hian a bomb pai chu he biakin verandah-ah hian tipuakin amah pawh a hmunah hian a thi nghal a, mi 17 in hliam na tak an tuar bawk a ni. He inkhawmnaa tel Kristian pakhat Kristiano chuan AFP a hnenah, “Ka chhuak hmasa a, haw ka tum mek laiin thil puak ri ring tak ka hria a, ka hawi let chuan chu Biak in chhung atang chuan mangang leh hlauthawng taka he Biak ina inkhawm te lo tlan darh chum chum chu ka va hmu a, an \e \eng tung a, mangang takin an au chiam chiam bawk,” tiin a hmuna thil thlen dan chungchang a hrilh. A hmunah hian he bomb tipuaktu hi a thih nghal avangin tunge tih leh eng pawl thiltih nge tih a hriat mai loh a. Mahse heBiak inah hian CCTV(a ruka thla la rengtu camera) vuah anih avangin Police te chuan he thil thlenga mawhphurtu chu he video atang hian an hriat theih an inbeisei tih an sawi.
Indonesia hi khawvela Muslim tam berna zing ami nimah se an constitution chuan sakhaw zalenna a pe ve tho a. Heti chung hian Kristian te chunga chetna a thleng chamchi a ni. Chhuak hmasa lama tarlan tawh angin September 11 khan Kristian leh Muslim inkara buaina chhuak avangin Kristian 6 an thih bakah mi 80 chuangin hliam an tuar a. Aug 28 khan ralthuam keng Muslim ho chuan Kristian ho beiin mi 12-in an thih phah bawk. Kristian leh Muslim inkara buaina thleng vang hian mi 5,000 chuangin an thih phah tawh bawk a ni. Chawlhni hmasa thil thleng chungchang hi Indonesia President Susilo Bambang Yudhoyono chuan a dem thu puangin ‘Firfiaka chetna tenawm tak’ tiin a ko a ni.
Sikkim-ah Tearfund
Kar hmasaa lirnghing 6.9 magnitude-a nain Sikkim leh a chhehvel a sawi avanga chhiat tawkte leh tanpui ngaite tanpui turin Kristian tanpui ngaite tanpuitu pawl Tearfund chuan hma an ve leh ta. Himalaya leh a chhehvela he lirnghingin chhiatna a thlenna hmunah hian Tearfund leh a thawhpui pawl thenkhatte chuan hma lain tanpuina hna thawh dan tur leh sum sen ngai zat te chhutin ruahmanna an siam mek. Hetianga hma an lak mek chungchangah hian Robert Schofield, Tearfuns-a Disaster Management Director chuan, “North East-a kan pawl thawh pui te chuan helai hmuna chhiattawkte tanpui hna hi an thawk tan mek a. Puan in, thawmhnaw lum, chaw, tui leh damdawi te chu heng hmun sang taka thil mamawh hmasa te an ni. Tunah hian Indian Army helicopter hmanga tanpuina hna thawh mek a ni a, mahse sawrkar thilsem hian tawp chin a nei dawn a. Hei vang hian kan relief team te’n tanpuina hna thawhdan tur leh an thil mamawh supply tur zat an chhut mek a, keini pawhin heng chhiattawkte tanpuina hna hi theihtawp chhuahin kan thawk ve dawn a ni,” tiin a sawi
______________________________________
Sunday 18. 9.2011
Pastor pali man
Hindu sakhaw bia te Kristian-a inleh luih tir ni a puhin Madhya Pradesh-a Pentecostal Pastor pali te chu nasa taka sawisak leh vuak an tawrh hnuah jail-ah zan khat khung an ni a, a tukah bail-a chhuah an ni. Hei hi tunhnaia Kristian sakhaw hruaitu te chunga Hindu kulmuk ho hleilenna hnaivai ber a ni awm e. Sept 15 khan Pastor Ramesh, Balu leh Ashok te chuan Pentecostal dan hmangin Hindu 11 te an baptist a. Hetianga tawngtaina leh baptisma chantira hun an hman lai hian Hindu kulmuk RSS member leh police thenkhatte chu tiang sei tak tak kenga lokalin inkhawm chu an tibuai a, heng pastor te hi an man ta a ni. Police hotu te leh heng ringthar baptisma changte hi reife inkawmin Police te chuan tihluihna hmanga Kristiana inlehtir angin diklo taka heng Pastor te hi puh turin ringthar te hi an thlem a, mahse ringtharte hian he thlemna hi hnawlin an duh thu ngeia baptisma chang an nih thu Police te hi an hrilh a ni. "He thil thleng hi Kristian te tan a huatthlala em em ani" ti a sawiin Global Council of Indian Christians (GCIC) president Sajan K. George chuan, " Madhya Pradesh-ah hian Kristian te an chep hle a, Constitution in mipuite sakhaw zalenna a pek hi nasa taka rahbeh a ni," tiin a sawi.
Pastor pahnih kap
Florida thuneitute sawidanin Sept 18 khan misual pakhat chu Lakeland, Florida-a Hreater Faith Christian Church biak in chhungah tlanlutin he kohhrana senior pastor leh amah puitu pastor tho te chu silaiin a kap. Central Florida News 13 pawhin hemi chungchang hi chhuahin he misual hi kum 57 mi Jeremiah Fogel a ni a, pastor a kah hliam te hi senior pastor William Boss leh Associate Pastor Carl Stewart te an ni. Police te chuan he misual hian Biak in a luhchilh hma hian nu pakhat chu an in bul maiah a kaphlum bawk niin an sawi a, hemi hnu hian Biak in hi panin hetiang hian a che ta mai a ni. Buaina a siam hun lai hian he kohhran hian zing inkhawm an zo fel deuh chiah a, inkhawm vawihnihna nei tura an inpuahchah laiin he misual hi lutin silai a hmet puak ta a, pastor pahnih a kah hliam hnu hian kohhran member te chuan misual hi beihrawnin an man thei ta a ni. Heng Pastor pahnih te hi an luah kah hliam ve ve niin Lakeland Regional Hospital-ah enkawl an ni a, an nunna atana hlauhawm erawh a ni lem lo niin Central Florida News 13 chuan a sawi. Hetianga silai a hmehpuah nachhan leh Pastor te a kah nachhan hi hriatchhuah a la nilova, thuneitu te chuan thil awmdan a chhui mek niin an tarlang bawk.
Pakistan tulian tuar
Tunhnaia pakistana tuilian nasa tak avangin Pakistana Kristian te’n harsatna namenlo tak an tawk mek. He tuilian avang hian mi tam tak chu hmun him lamah sawnchhuah an ni a, an sawnchhuahna hmunah hian in enkawlna tha dawn tur a awm loh avangin natna hrang hrang Malaria, santen, khawsik etc te a leng nasa hle. Pakistan rama Kristiante hi hnam hnuaihnung leh rethei te te an nih avangin he tulian hi Kristian te’n an tuar nasa hle a, tanpuina thil engemaw sem anih pawhin sem kan an ni fo a ni. Tun tum tuilian hi nikum lam tuilian aiin a rapthlak zawk niin helai hmuna tanpuina hna thawktu Barnabas Fund chuan a sawi a, Barnabas Fund hian khawvel hmun hrang hrangah henglai hmuna tuilian vanga harsatna tawk mek Kristiante chhawmdawlna atana tui intur, chaw leh damdawi pek tur atan donation an khawn mek a ni. Hei bakah hian Barnabas Fund hian an thawhpuite nen henglai hmunah hian tanpuina hna thawkin an luhchilh mek a. Chhungkaw 800 hnenah chaw fun leh damdawi thenkhat an sem mek a ni.Hemi chungchangah hian Barnabas Fund International Director, Dr Patrick Sookhdeo chuan, “Pakistan-a Kristian te hian sawrkar atanga tanpuina dawn kawngah hlamchhiah an tawk reng reng a, tuna kan unaute’n harsatna namenlo tak an tawhnaah pawh hian inhlamchhiahna hi thlengin tanpuina an mamawh em em si a, chuvangin khawvel puma Kristian te an tana tanpuina sum thawh a, tawngtai pui turin ka ngen tak meuh meuh a ni,” tiin a sawi.
Kristian leh Muslim inkara buaina
Indonesia rama Ambon khuaah Muslim leh Kristian te inkarah buaina chhuakin mi pathum an thi tawh ami 60 chuangin hliam an tuar. He buaina thlen chhan hi taxi driver pakhat Darkin Saimen chuan a motor khalh lai thunun zo lova mi in a sut vanga a thih hnuah Saimen hi Kristian te thah anga thu a than vang niin hei vang hian Kristian leh Muslim te inkarah buaina lian tak a chhuah phah ta a ni. Hetiang hian thu thang mahse Police thupuangtu Gen Anton Bahrul Alam chuan Saimen chu chetsual palh vang liau liaua thi anih thu a puang thung. Ambon-ah hian Kristian leh Muslim inkarah buaina a chhuak fo tawhin kum 1999 khan mi 9,000 chuang thihna buaina lian tak chu Muslim ho vek hian an lo chawkchhuak tawh a. He buaina hian kum 3 chuang awhin Malino Peace Treaty kum 2002-a an ziah khan kha buaina kha a titawp ta chauh a ni.
WEA in General Assembly hun tur puang
World Evangelical Alliance chuan Christian Council of Korea (CCK) nen tangkawpin WEA General Assembly neih leh hun tur an puang a, he inkhawmpui hi Oct 27-31, 2014-ah Seoul, South Korea-ah nghah a ni dawn a ni. WEA hi khawvel puma chanchin tha hriltu pawl inzawmkhawm lian ber an ni a, he pawl hnuaiah hian rawngbawltu maktaduai 600 chuang an awm a ni. WEA hian kum 6 danah General Assembly hi an nei thin a, he hunah hian sum chalai dan, hruaitu chher dan, zirna tih hmasawn dan leh zau zawka rawngbawl zel dan an ngaihtuah ho thin a ni.
Orissa tuilian tuarte tanpui
India rama Kristian tanpuitu pawl hrang hrang te chuan Orissa state-a tuilian tuartu district 9-a mihring maktaduai 2 chuangte chhawmdawl hna nasa takin an thawk mek.
Kristian pawl, tanpuina hna thawktu Churches Auxilliary for Social Action (CASA) leh Lutheran World Service India Trust (LWSIT) te chuan heng tulian tuartu, in leh lo, ran, thlai etc chante chhawmdawl hna hi nasa takin an thawk a. Action by Churches Together (ACT) member CASA hian chhungkaw 500 chuang hnenah chhungkaw mamawh bulpui deuh deuh chaw, tui intur leh damdawi te an sem tawh a, CASA vek hian he tuilianin a nghawng zau zawng leh tuilian tuartu te mamawh hrang hrang a zirchiang mek bawk a ni.
Hetiang bawk hian ACT member Lutheran World Service India Trust te pawhin tanpuina hna hi district thenkhat atangin an thawk tan mek bawk a. Tanpuina hna thawk tur Community Based Disaster Management Teams (DMT) dinin hma nasa takin an la bawk a, Indian Meteorological Department(IMD) leh Water Resource Department nen tang kawpin Lutheran World Service India Trust hian thingtlang mite hnenah chhiatrup lo thlena hmalak dan tur training an pe bawk a ni.
Hetih rual hian state sawrkar atanga tanpui hna thawhtu te chuan mi 200,000 chuang chu hmun him lamah an sawn tawh a, he tuilian hian kawng leh leilawn a tihchhiat nasat avangin hma lak chak a har hle.
Tunhnaia Orissa state-a tuilian, ruahsur nasa tak avang leh Hirakyd tuidah khawlna atanga tui tam tak putchhuak bawk avang hian khaw hrang hrang 4,100 a chenna in 22,000 chuang a chhia a, mi 32 in thih phah tawhin mi tam tak chin hriat lohvin an bo a, Jagatsingpur, Kendrapada, Puri, Boudh, Subarnapur, Cuttack leh Nayagarh district te chu a tuar nasa ber te an ni a, mi maktaduai 2 chuangin he tuilian hi an tuar a ni.
China Aid-in UN ngen
China rama Kristian tihduhdahna tuartu te tanpui thin tu ChinaAid chuan Kristian dan hremi Gao Zhisheng-a tihduhdahna leh hun engemaw chen chin hriatloh a bo mek chanchin chhui chiang turin United Nations hnenah ngenna a thehlut. ChinaAid-in a tarlan danin Gao Zhisheng hi Aug 15, 2006 khan chhan mumal tak awm lem lovin a unaunu in atangin Police ten an man a, Sept 21, 2006-ah Police te chuan a laizawnnu hnenah sawrkar thuneitute a beih avanga man anih thu an hrilh chauh niin an sawi. Hemi chungchangah hian NGO pakhat Freedom Now-te leh pawl hrang hrang te chuan IN Working Group on Arbitrary Detenton hnenah thubuai thehlutin he thil hi chhui anih hnu pawhin China sawrkar chuan khawvel ram dang te leh UN ngei pawh anmahni thil chauh buaipui tura hrilhin Gao-a case chu China ramchhung thil a ni a, inrawlh lo turin an lo hrilh thin niin tarlan a ni. Kumin Aug 15 kha Gao-a chin hriat loha China sawrkarin an dah kum nga na a ni ta a, hei vang hian UN chu inrawlh a, Special Investigation hmanga he thil hi chhuichhuak ngei turin ChinaAid founder Bob Fu leh a danhremi David E. Taylor te chuan an ngen ta a ni. He an thil ngen hi United Nations Special Rapporteur on Torture hnuaiah ziah luh ni tain rang taka hmalak tum ani tih thu an dawng niin an sawi bawk.
Russia-ah Isua lem khap
Artist pakhat Alexander Savko-a lemziak, tlang chunga Isua thusawi lai lem Forbidden Art 2006-a an lo pho chhuah tawh chu Court of Central Russia chuan Kristian Sakhua sawichhiatna leh sakhua leh sakhua inkara inhmuhthiam lohna thlen thei lemziak hleihluak tiin print chhuah, tar, a thla lak, TV-a chhuah etc khapna thu a a chhuah ta. He Isua lem ziahah hian cartoon character lar tak Mickey Mouse-a lu chu Isua lu-ah vuahin Isua chu he artist hian Mickey Mouse-a kutkawr a bun tir bawk a ni.
Seven Day Slumber album thar
Kristian Rock Band lar tak Seven Day Slumber te chuan an album thar ‘The Anthem of Angels chu Nov 15, 2011-a tlangzarh theih turin an peihfel ta. He album ami hla pahnih hi single angin an tichhuak tawh a, chungte chu- harsatna engpawh tawh laia Pathiana rinna nghah chungchang hlaa puanchhuahna ‘Love Came Down’ leh Never Too Far Away’ te an ni.
Greg Laurie Los Angeles-ah
Southern California Pastor leh khawvel huapa evangelist lar Greg Laurie chuan Harvest Crusade chu Sept 10 hian Los Angeles-a Dodger Stadium-ah a nei dawn a, he hun hi US in firfiak te beihna rapthlak tak a tawh 9/11 hma ni chiah a ni dawn a, Greg laurie pawh hian he hunah hian tawrhna, thihna leh ngaihdamna chungchang chu he crusade thupui ‘Why Tragedy?’ hmangin a puangchhuak ang. He ‘Los Angeles Harvest’ hi Los Angeles-a kohhran hrang hrang 230 chuang ten an buatsaih a ni a, volunteer pawh mi 4,000 chuang awmin he hunah hian thuchah ngaihthlakna bakah khawvel huapa Kristian zaithiam lar tak tak Chris Tomlin, Kirk Franklin, Jeremy Camp etc te’n zaia rawngbawlna hun an hmang bawk dawn a ni.
Ruahmanna felfai tak nena kalpui thin Greg laurie-a Harvest Crusade hi zaithiam lar tak tak hmanga mipui hipkhawm in kalkhawmte chu Greg Laurie hian thuchah a lo hrilh thin a, heng hi internet-ah te pechhuakin a hmalak dan hian fak a hlawh hle a, Billy Graham phei chuan ‘Evangelist of the future’ tiin a fak hial a ni. He hunah pawh hian Los Angeles-a mi harsate tanpui nan kalkhawm te chu Boxes for Hope’ pualin eitur chhe mai thei lo chi kengkhawm theuh tura ngen an ni a, hengte hi Los Angeles kawtthlera mi rethei eitur neilo te hnenah sem a ni leh dawn a ni.
Kristiana inleh avangin ke chan
Compass Direct News (CDN) in a tarlan danin Uganda khawthlang lama hmeichhe naupang pakhat kum 14 mi lek chu Islam atanga Kristiana a inleh avangin a pain nasa takin a sawisa a, hei veng hian sawisak anih hnu thla 10 lai a ral hnu pawhin a la kal thei lo.
He hmeichhe naupang khawngaihthlak tak Susan Ithungu hi March 2010 khan a unaupa Mbusa Baluku nen Bwera Full gospel Church atanga lokal evangelist pakhat in an school-a Pathian thuchah a rawn sawi an ngaihthlak atangin Isua hnungzui turin a inpe a, hei vang hian a pa chuan October 2010 khan nasa takin a vua a, a sawisa chiam a, room-ah hun rei tak kalh hnan niin he thu hi hriatchhuah a nih hnuin Susan-i chu an thenawm ten chhanchhuakin damdawiinah dah nghal a ni a, a pa pawh hi Police te’n an man nghal a ni.
Susan-i chuan, “Ka pa hian Kristian te inkhawmna a tello tur leh Pathian thu ngaithla lo turin min vau thin a, Kristiana kan inleh phei chuan a chemte hriam deuh hmanga min thah tur thu min hrilh thin,” tiin a pain a vau thin dan a sawi.
Bwera Full Godpel Church Pastor, Joseph Baluku sawi danin Susan-i thenawm te hian a pa in a kalh hnan tlat tih an hriatin thuneitu te hnenah hrilh an ni a, Susan-i hi damdawiinah dah a ni a, a that chhuah theih hun tur hriat a nilova, tanpuitu dang a neih loh avangin Bwera Full Godpel Church member te hian pawisa thawhkhawmin Susan-i hi an enkawl a ni tih a sawi a. Sawi chhunzawm zelin Pastor Joseph chuan, “Pathian khawngaihna azara Susan-i a damchhuak hi a lawmawm hle. A kal thei lo a, mahse a tawng thei tawh a, thu lawmawm ber chu heng harsatna zawng zawngte hi tuar mahse Isua Krista a phatsan lova, a rinna a la nghet hle a, a damchhuah leh vat theih nan i tawngtai pui theuh ang u,” tiin a sawi.
GCIC in Suprem Court ngen
Global Council of Indian Christians (GCIC) chuan Orissa Sawrkarin Nandagiri, Kandhamal-a Kristian biak in thiat tura thuchhuah a siam chu an dem hle tih sawiin Chief Justice of India hnenah he order hi sut leh tura ngenna an thehlut. Nandagiri hi kum 2008-a Kandhamal-a Kristiante tihduhdahna nasa tak a thlen tuma mahni inleh loa awm ngamlo tlandarh te awm khawmna hmun a ni a, he hmunah hian Catholic chhungkaw 54 leh pentecostal chhungkua 17 awm mekin kum 2009 atang khan inkhawmna an nei tan a, chumi hnuah he biak in hi an sa ta a ni. Hetiang anih lai hian helai hmuna kristian hruaitu Krisant mallick chuan show cause notice dawngin he hriattirna lehkhaah hian ni 30 chhunga he biakin hi thiata bungrua leh hmanrua zawng zawng la bo vek tur leh chung chu a ti lo anih chuan hmanrua leh bungrua awm zawng zawng te chu hren a, tihchhiat vek anih tur thu a dawng ta a ni. Hei vang hian GCIC chuan Supreme Court Chief Justice hnenah he Biakin thiahna order chu sut turin an ngen ta a ni.
Dr Sam Paul thlang.
Dr Sam Paul, All India Christian Council (AICC)-a National Secretary nilai mek chu Andhra Pradesh-a hnam hnuaihnung leh tlem zawk (minorities) te chawikanna tura duan PM’s New 15 Point Programme enkawltu tur State level Committee member atan thlan a ni.
Nun chhuahtir
Britain atanga lokal Nun pakhat, India rama phar te tana thawktu chu chhuanlam mumal em em awmloin India ram atangin chhuahtir a ni. He Nun hi a hming chu Sister Jacqueline Jean McEwan a ni a, New Castle atanga lokal niin Montfort Missionaries hnuaiah kum 1982 atang khan Bangalore-a Sumanahalli Leprosy Rehabilitation Centre-ah a thawk a ni. Sister Jean hian tunhnaia India ram awm zuizel phalna a dil chu Foreigner Regional Registration Office, Bangalore chuan a hnawlsak a ni. Sister Jean chuan rilru na takin a haw dawn tih sawiin tap chungin Sunday Post hnenah, “Ka dilna min hnawlsak nachhan ka hre lo. Mi rethei leh phar natna veitu te nen kum hei leh chen kan awm ho tawh a, tuna ka dinhmun hian ka rilru a tina takzet a ni,” tiin a sawi. Inrinni kalta khan Sister Jean thlahna hun hi phar natna veitu te leh Sumanahalli Leprosy Rehabilitation Centre Society member ten an hmang a, he hunah hian Father George Kannanthanam, Director, Sumanahalli Leprosy Rehabilitation Centre chuan Sister jean tan hian Visa dang dilmek anih thu leh a tel lo chuan Sumanahalli chuan ngai a awh theih a rinloh thu a sawi. Sister Jean hi Mother Teresa of Sumanahalli tia hriat lar a ni a, Seshadripuram, Indirapuram leh Chikkanayanakanahalli vela Slum Area hrang hranga phar natna veite tan a thawk nasa hle thin a ni. Sumanahalli Society hi kum 1978-a din a ni a, Phar natna vei mi 5,000 chuan an enkawl tawh a, heibakah hian naupang rethei tak tak te, AIDS vei naupangte leh rualbanlo te tan zirna Sikul an hawnsak bawk a. National Award 11 leh State Awards 6 lai he Society hian a dawng tawh bawk a ni.
Mission Aviation Fellowship rawngbawlna
Mission Aviation Fellowship (MAF) chuan tunhnaia Horn of Africa an tihmai Eritrea, Djibouti, Ethiopia leh Somalia ramte a tam nasa tak tla avanga ei tur neilo mi tam takte tanpui nan eitur phur thlawhna chua vawi sarih nan South Africa-a an hmunpui atangin an tirchhuak. He thlawhna hian eitur bakah tanpuina hna thawktu tur te a phur tel a, heng ram hrang hrang a thawk tur a phurh te hian Kenya hmarlama raltlan te awmna hmun Dadaab Refugee Camp atangin hma an la tan a ni. Heng tanpuina hna thawhktu te hian ei leh in tur sem pahin raltlan te hriselna te an endik anga, chu chu chanchin tha hrilhna remchang atan an hmang dawn a ni. Tunhnai khan Horn of Africa-ah hian tam a tla na hle a, Somalia chu a tuar nasa ber an ni. Horn of Africa bakah hian Kenya ram hmar lam pawh he tam tla hian a nghawng a, UN chuan mihring maktaduai 10 chuang chu eitur neiloin an awm niin a sawi. Heng lai hmuna tam tlka avang hian mi tam tak chuan Kenya hmarlamah hian an raltlan a, tuna Dadaab Refugee Camp hi refugee 90,000 awm theihna tura ruahman nimah se refugee 5,00,000 chuang an kalkhawm a, hei hian tanpuina hnathawh kawngah nasa takin harsatna a thlen a ni. He hmunah hian MAF te bakah tanpuitu pawl hrang hrang leh Christian Aid te pawhin tanpuina hna an thawk mek a ni.
Muslim Ramadan rualin tawngtai kutpui
Naktuk, August 1, 2011 atanga tanin Muslim sakhaw vuantu te chuan August thla chhung hian chawnghei tawngtaina thla Ramadan chu an tan dawn a, hemi rual chiah hian Kristian pawl lar tak leh Kristian tihduhdahna tuartute tanpuitu pawl Open Doors te chuan ni 30 chhung Muslim te leh Muslim rama tihduhdahna tuartu Kristiante tana tawngtaisakna hun an lo hmang ve thung dawn a ni. August thla hian Muslim sakhaw zuitu te chuan zing ni chhuah atanga tlai nitlak thleng chawngheina hun Ramadan thla an hmang dawn a, hei hi mahni inkhuahkhirh leh thil tha tichunga an sual an tlenfaina hun niin Muslim te chuan an ngai a ni. He Ramadan chhunga tawngtaina hun kaihhruaina Calendar chu Open Doors chuan an tichhuak a, tihduhdahna tuartu ram hrang hrang, mimal leh pawl tana tawngtai dan tur kawhhmuhna point hrang hrang chu he Calendar-ah hian a awm a. Hei bakah hian Open Doors chuan email hmangin he ni 30 chhung tawngtaina hmangtu Kristian te hi tawngtaina subject hrang hrang heng Muslim rama Kristian te atanga an dawn chu an thawnchhuak zel dawn bawk a ni. Tunhnaiah Muslim ram hrang hrang Egypt, Tunisia, Libya leh Syria-ah te sawrkar duh lohna lantirin tualchhung buaina nasa tak a chhuak a, heng tualchhung buaina hi remchanga lain Muslim te chuan kristian te nasa takin an tiduhdah a, heivang hian tawngtaipui pawh an ngai zual hle a ni. Open Doors in Kristian tihduhdahna thlen nasatna ram nia a tarlan Top 10 zinga pariat Iran (2), Afghanistan (3), Saudi Arabia (4), Somalia (5), Maldives (6), Yemen (7), Iraq (8) leh Uzbekistan (9) te hi Muslim ram an ni a, tunah hian khawvel puma Kristian nekchepa awm te hi million 100 chuang an awm niin Open Doors chuan a chhut.
Iran in Kristian chhuah
Sawrkar hriatpui loh a House Church a din avang leh a ruka an inkhawm tih hriatchhuah anih avanga kohhran member mi 9 te nena March thlaa man tak Masoud Delijani chu hun engemawchen hrehawm taka Jail tan tir a nih hnuah $101,000 chawiin bail-a chhuah lailawk a ni.
Samaritan’s Purse tuilian tuarte tan
North Dakota a Minot khua chu Sourius River lianin nasa taka a chim avangin chenna in 4,000 chuang a chhia a, tui hian kam lam a pan tawh avangin chhanchhuahna hna thawktu hrang hrangin an luhchilh mek. Samaritan’s Purse pawhin helaiah hian volunteers 500 chuang awmna Disaster Relief Units te nen helai hmun hi an luhchilh tawh a ni. Heng Volunteers te hian inchhia siam that te. in \hiah te leh a tul ang ang hna an thawk dawn a, hemi pah hian counselling leh inkawmna hun te tulian tuarte nen an nei pah bawk ang.
Saudi Arabia in Kristian chhuah
India mi Vasantha Sekhar Vara leh Nese Yohan, ‘Rejoice in the Church of the Lord’ kohhran member te chu Saudi Arabia police ten Bible Study programe an hmang lai an man avanga ni 45 chhung tang tura an chungthu relsak chu Riyadh Jail-a an tan tling tlak hnuah chhuah an ni a, India ramah rawn thawn haw an ni.
CSI South Kerala Bishop thar
The Church of South India chuan Inrinni liamta khan South Kerala Diocese Bishop thar atan Rev Dharmaraj Rasalam chu a ruat thar. Kum 53 mi Rev Dharmaraj hi CSI South Kerala Diocese Vice Chairman hlui a ni a tun tumah hian South Kerala Diocese Bishop kalchhuak ta Rev JW Gladstone chu a thlak a ni.
Nigeria ah Kristian te tiduhdah
Washington DC, USA a inkulh, Human Right Group pakhat, khawvel hmun hrang hranga Kristian tihduhdahna tuar tutr tanpui thintu International Christian Concern(ICC) in a report danin Nigeria ram inthlanpui (General Election) a Muslim Presidential Candidate General Muhammadu hneha Kristian mi Jonathan Goodluck President-a a tlin avangin Muslim kulmukte chuan Kristiante chu vote ti chingpena puhin an bei chiam a, Kristian te beihna thlengah hian Kristian 100 chuang thi in Kristian biak in 40 chuan hal a ni. Heng Muslim firfiak a che te hian Muslim thenkhat Jonathan Goodluck-a lamtangte in pawh an tichhe tel bawk. ICC report danin Muslim ho hian vote tihchingpen a ni a, General Muhammadu Buhari chu inthlana chak zawk dik tak a ni tiin an tlangau a, mahse Nigeria Presidential Election endiktu (Election Observer) te chuan he inthlan hi kum sawm chhunga Nigeria rama inthlanna felfai ber niin an puang thung. Nigeria hmarlam ah hian Muslim an tam zawk avangin Kristian te’ntihduhdahna an tuar nasa thei hle a, kum 2001 a Sharia Law hman a nih atang phei kha chuan Kristian sing chuang thah anni tawh a ni. He thil thleng chungchangah hian Nigeria State pakhat Kaduna-a Kristian hruaitu pakhat chuan, “Nigeria hmarlam district ah Kristiante thah niin Biak in te hal a ni a, ngatinge Politics thil a nih laia Biak in te hal a nih? Ngatinge mi pakhat President aa tlin avanga Kristiante thah an nih? Goodluck hi Kristian te tan chauh President tur a ni lova, Nigerian zawng zawngte tan President a ni dawn zawk a sin,” tiin rilru na takin ICC a hrilh
Israel Baptist ten rawngbawlna kum 100 tlin lawm
The Association of Baptist Churches in Israel (ABCI) te chuan ram thianghlima rawng an bawl kum 100-na anlawm dawn. ABCI in an puan danin he centenary lawmna pui ber hi May 12-14, 2011 hian Nazareth Golden Crown Hotel, Mount Precipice ah an hmang anga, a hun tawp lamah hian a huhova Baptisma channa (Mass Baptism) Jordan luiah neiin he centenary lawman hun hi an khar dawn a, he centenary lawmnaah hian a tam thei ang ber Pathian hnena lawmthu sawi a, Pathian rinawmna faka hun hman tum a ni. He hunah hian ruahman dan chuan Southern Baptist Missionary hun reitak ABCI tana rawng lo bawl tawh te leh thawkmekte chawimawina hun hman a ni anga, tin thupui thlanbik hmangin khawvel huapa mi challang tak tak John Upton, BWA President te, Gordon Fort, Southern Baptist Mission Board a global strategy office vice president te, David Coffey Baptist Missionary Society global ambassador te leh Suheil Madanat, Amman Baptist Church Pastor te’n thu an sawi ang a Israel ram a thusawitu lar tak tak ten hun an hmang bawk ang. ABCI sawi danin Baptist te hian ram thianghlim a rawngbawl hna hi kum 1911 khan Shukri Mosa , First Baptist Church of Dallas member chuan a thawk tan a, he hna hi kum 1920 atangin Southern Baptist Church in an thawh zawm ta a ni. 1920 - 1940 chho thleng khan khhran hi a thangduang hle a mahse 1948 indo khan member te an darh sarh nuaih a, 1950 a Dwight Baker a rawngbawltura a luh hlim phei chuan kohhran member 5 chiah an awm tawh a ni.
Somalia ah ring thar that
Muslim firfiak pahnih te chuan Lower Shabele, Somalia ah Kristian sakhua a inlet thar pakhat an that. A thattute hi Al Shabaab member an ni a, Kristian te thah chimih vek an tumna kawngah he tlangval kum 21 mi Hassan Adawe Adan hi Shalambod town-a a chenna inah luh chilhin an kaphlum a ni. Thudawnna pakhat Hassana te thenawm hnai ami chuan, “Muslim firfiak te chuan a inah luhchilhin an rawn hnuk chhuak a, minute 10 hnu velah a taksaah vawi engemawzah silaiin an kap a, a hmunah a thi nghal a ni,” tiin a sawi. Heng misual pahnih hian Hassan-a an kahhlum hnu hian, “Allahu Akhbar” (Kan Pathian a ropui zawk) tiin an au a, an tlan chhe nghal a ni. Compass Direct News Service (CDN) ina sawi danin Hassan a hi tlangval hnahkhat a ni a, an chhungin Muslim sakhaw vuantu an ni a, thla tlemte liam ta khan Kristianah a inpe a, Kristian sakhua a zawm thu hi mi tuin emaw Muslim firfiak te hrilh hria a hetianga hmala ta hi an nih Somalia Kristian te chuan an ring deuh ber.
Mihang kohhranah Obama Easter hmang
US mihang President hmasa ber Barrack Obama chuan Easter service chu Washington DC a mihang kohhranah a hmang. He kohhran Shiloh Baptist Church hi kohhran upa tawh tak niin kum 1863-a America rama sal hote chhuah zalen an nih hlim a Fredericksburg, Va a Sal chhuah zalen ten an din a ni a. Easter Sunday tuka Barrack Obama’n he kohhrana Easter Service a hman hian a nupui First Lady Michelle Obama leh an fanu pahnih ten an tawiawm a ni. Inkhawmna hunah hian President te chhungkua hi tlar hmasa ber dawttu ah thu in he kohhran pastor Rev Dr. Wallace Charles Smith chuan chuan President te chhungkua chu an kohhranin an lo lawm thu a sawi a, kum hnih kalta atang khan chawlhni tin Obama te chhungkaw tan an kohhran chuan an tawngtai sak thin thu hrilh in, an hlimna te, malsawmna an dawn te chu an tawngtaipuina rah a ni tih hre turin Obama chhungkua chu a hrilh nghe nghe. Obama hian Suit dum leh lavender neck tie awrh in a fanu upa zawk Malia bulah a thu a, a kiangah hian a nupui Michelle Obama leh a fanu Sasha te an thu bawk a ni. Kohhran member te pawh Obama chhungkua in easter an hmanpui thut chu an beisei loh thil a ni aniang an thla an la nasa hle a, Pastor Wallace chuan kohhran member te chu Obama te chhungkaw thlalak sak chu ti tawp rih tur a ngen in, “He hmunah hian a pawimawh hmasa ber chu Pathian a ni tih i hria ang u,” tiin a khap nghe nghe. President Obama hian nikum pawh khan Mihang kohhran upa tawh tak pakhat Allen Chapel AME Church, WashingtonDC-ah Easter Service hi a lo hmang tawh bawk a ni.
Paramore guitarist hluiin band chhuahsan chhan sawi
Tunlaia secular Rock Band lar tak, Grammy Awards ah pawh vawi thum lai nominate tawh Paramore dintu te zing ami an guitarist Josh Farro chuan amah leh a unaupa Zac-a ten Paramore an chhuahsan chhan chu rinna vang a nih thu a sawi. Paramore hi Kum 2004 a din a ni a, a tirah chuan Kristiam Band tia chhal a ni thin a, mahse an album ‘brand new Eyes’ an released atang khan khawvel lam hl ate a tel avangin Kristian Band ah chhal anni zui ta lo. Josh Farro chuan “Paramore hi Kristian Bandangin kan inchhal na a, mahse kan hla thu kan ziah dan te hi kanrinna nen a inkalh a, chuvang chuan chhuahsan lo thei kan ni lo,” tiin nikum December-a a unaupa nen he band an chhuahsan dan a sawi. Paramore Vocalist Hailey Williams pawhin a hma chuan Sunday apiangin an inkhawm ziah thin thu a sawi a, mahse an han lar chho a, Sunday ah te concert neih a ngaih thin avangin an inkhawm ngai ta mang lo a, chu chuan an thlarau nun a khawih hle niin Fuse TV interview naah a sawi a, “Mahse Pathian leh Isua hi kan tan a pawimawh zia hi kan theihnghilh ngai lo a, show kanneih dawn apiangin Pathian hnena inhlanna hun hmangin kan tawngtai ho ziah ani,” tiin Hailey Williams chuan a sawi chhunzawm. Paramore an chhuahsan hnu hian Josh Farro leh a unaupa Zac tehian Christian band ‘Novel American’ an zawm a, tunah hianan album tihchhuah tumin nasa takin hma an lamek.
-----------------------------------------------------------------------------------
North Carolina ahTornado che
Kar hmasa khan North Carolina US chu thlipui na tak Tornado ina nuai a, in tam tak a chhiat bakah mi 22 in nunna an chan. He thli tleh hi 160 mphs a na in a tleh a, tornado 8 laiin North Carolina hi a nuai niin sawi a ni. He thlipui avang hian in tam tak a chhia a, thing te tlusawpin thi te bakah mi 130 chuangin hliam an tuar bawk. He thlipui hi kum 20 chhunga North Carolina in thlipui a tawrh nat ber a ni. Hetih lai hian khuarel chhiatna thlenna hmun hrang hranga tanpui leh chhawmdawl hna lo thawk tawh thin tu, Kristian relief organization lar tak Samaritans Purse te chuan chawlhni hmasa atang khan tun thlengin chhawmdawl hna thawk in NorthCarolina hi an luh chilh a. Samaritans Purse hian tuna volunteer an neih bakah hian mi inpe volunteer tur an dap leh mek a, thlipuiin a nuai hnawmhnawk leh chenna in chhia thenfai te leh thlipuiin a chhemchhiat insak that hna te chu tunkar chhung khan an thawk a, thawh tur a la tam hle ani. “Thlipui karah chhungkaw tam takin an hmangaih takte an sun a, heng mi te hi kan lainat a, kan theihna kawng apiangah kan chhawmdawlin kan puibawm dawn a ni,” tiin Samaritan’s Purse CEO leh North Carolina-a inkulh Billy Graham Evangelistic Association (BGEA) CEO ni bawk Franklin Graham chuan a sawi. He thlipui na tak hian North Carolina mai bakah hian Oklahoma, Virginia, Arkansas, Mississippi, Alabama leh Georgia teahrut bawk a, a pumpuiah mi 43 laiin an thih phah a ni.
Billboard Awards 2011 a Kristian te
Kum 2011 a Billboard Award dawng thei tur nominees te zingah Chris Tomlin, Mercy Me leh TobyMac te chu Gospelmusic huangah a langsar ber leh beisei awmber pawl an ni. Heaward ngaihhlut tak Billboard Awards 2011 hi May 22, 2011 hian Las vegas-ah sem a ni dawn a, category hrang hrang 46 zing atangin award hi sem a ni ang. Heng Categories ahte hian Kristian music huangah lawmman hrang hrang Top Christian Artist, Top Christian Album and Top Christian Song ah te sem a ni dawn a, khing kan tarlan te bakah khian zaithiam langsar tak tak Skillet,Kris Allen, Santus Real leh Casting Crown te chu a langsar pawl a ni. Hengzaithiam kan tarlan te hi tunah tour nei ai vek an ni a, Casting Crowns leh Sanctus Real te hian tour homek bawk a ni. Heng zaithiam te bakah hian Kristian sakhaw zuitu rinawm tak nisi Pathian hla sa lem lo nominees a lang zingah Justin Bieber, Kings of Leon, Owl City, B.O.B leh Hailey Williams te chu a langsar zual an ni
Justin Bieber leh Lady Gaga te aiin BIBLE
Tunlaia thian inkawm nan a hman lar ber (Social Networking Site) Facebook ah chuan Justin Bieber, Lady Gaga leh football club lar Manchester United te aiin Kristian lehkhabu thianghlim ‘BIBLE’ chuan fans a ngah zawk a, f.7 million an tling tih heng figure lakhawm tu allfacebook.com chuan a puang.Facebook-a Bible page hi United Bible Societies ami Jane Pleace siam a ni a, he bible page ah hian fans te chuan Pathian thu thenkhat leh Bible chang hrang hrang te an ziak thin a, tin, Pathian thu in an nun a khawih dan leh an harsatna hrang hrangte, an lawman te chu facebook hmangtu ten he Bible page-ah hian an inhrilh tawn thin a ni. ‘Facebook hmang hian Pathian thu hrang hrang Bible fans te hian vawi maktaduai 239 chuang kan inhrilh tawn hman a, an hlawkpui tih kan hriat hian kan lawm em em a ni” tiin Jane Pleace chuan a sawi. Lawmawm leh zual chu Bible fans zing a 51% te hi kum 21 hnuai lam an ni a, “Kum naupang lamin Bible an ngaihven hi kan lawm a, heng mi te hian zawhna hrang hrang Pathian thu leh a zirtir chungchangah an nei thin a, tam takin rinnaah hma an sawn a Pathiam hmel an hmuh phah tih kan hriat hian kan lawm em em a ni,” tiin a sawi bawk. He facebook page BIBLE fans te hi Kristian bakah Pathian awm ringlo Atheist te, Muslim te leh sakhaw hrang hrang vuan tu te an ni a, thlirna dang atanga Bible rawn thlir tu te ngaihdan hrang hrang chu Pathian thu hmangin he page enkawltu te hian an lo hrilhfiah thin a ni. He rawngbawlna pawimawh tak hi I zawm ve duh chuan www.facebook.com/The Bible ah hian i lut dawnnia.Blasphemy Law avangin man leh
Sawisel hlawh tak Blasphemy Law hmangin April 16, 2011 khan Pakistan ah mi pahnih man leh an ni. Heng an man te hi Christian Technical Training Centre, Gujranwala, Punjab District a Vice Principal, Mushtaq Gill leh a fapa te an ni a, anni hi Quran pawtthler a tichhia a puh an nih vangin man an ni a, Muslim thenkhatte chuan an inbula bawlhlawh dah khawmna bagah Muslim sakhaw lehkhabu thianghlim Quran phek thenkhat pawhchhiat nuai an char avangin Police hnenah hemi te pafa hi an hek ta a ni. Police te hian hemi te pafa hi Commissioner Road Police Station-ah an hruai a, hetih lai hian an chhungte chu inhumhim turin hmun dangah an biru vek a ni. Tunlaia Quran hal avanga boruak a sosan avang leh Pakistana Kristiante an chep zel avangin Mushtaq Gill a chhungte hian hmalak dan tur pawh an hre lo a, mahse mirethei tanpuitu pawl Masih Foundation hotupa Mr Haroon Barkat Masih chu hmala tura ngenin a ni hian kawng hrang hrangin hma a lakpui a, FIR thehluh a nih hnuah Masih Foundation hian court-ah an dinpui dawn a ni. Masih Foundation hian Asia Bibi, thi tura chungthu rel tawh pawh buaipuiin kawng hrang hrangion an lo tanpui tawh a ni.
China ah Pastor Man
Police te chuan Inrinni kalta khan China a kohhran registered loh pakhat chu Sunday a inkhawmna hun an hman avang leh hun an hmanna hi pawnah a nih avangin an Pastor anman a, kohhran member engemawzat chu pawn chhuak thei lovin House Arrest in an hrem a ni. Tun tuma an man Senior Pastor Jin Tianming hi member 1000 lai awmna Shouwang Church kum 1990 chho a dintu kha a ni a, a kohhran te hian pawna inkhawmna hun hi neih leh an tum hle tih an sawi. Hmanni lawk pawh khan kohhran member engemawzat chu pawna an inkhawm avangin man an lo ni tawh bawk a, khawlaia inkhawmna hun hman hi sorkarin duh lo hle mahse Biak in atana lei an tum in chu an lei tumna aia engemawzaha to a lei turin Sawrkar chuan he ram neitu hi a lo be fel a, $ 4.0 million lain sawrkar chan he in hi a lei khalh a ni. Hei hi Kristianten a huhove an inkhawm tur thik leh dan buai hrim hrim tumna vangnia an hriat avangin Shouwang Churh hotu te cuan hetiang program hi an duangta a ni. Heti Pastor Jin Tianming-a anman hnu hian a awmna chin hriat a ni lova, engtiangin nge an hrem dawn tih pawh hriat a nilo. He thil thleng avang hian China-a house church engemawzah te chuan thupuan intawm (joint statement) siamin Shouwang Church chu an tan tlat dawn a, an tawngtainaah an hre reng dawn bawk tih an thuchhuah intawm siamah an tarlang. China-ah hian sawrkarin a pawmpui kohhran nilo tan kohhran din phal a ni lo a, hemi awmzia chu kohhran din tur zawng zawng te chu Three-Self Patriotic Movement leh China Christian Council (TSPM/CCC) hnuaiah an in register a ngai a. Mahse kohhran tam tak chuan Isua lo chu kohhran lu dang an awm lo tih changchawiin TSPM/CCC hnuaia in register hi an duh lo a, heng kohhran registered loh te hi ‘Underground Church’ emaw ‘House Church’ emaw tiin koh an ni a, sawrkar atanga beihna pawh an tawk ngun hle.
Mumbai ah Good Friday kawngzawh runpui
Tun Good Friday liamta khan Mumbai khawpuiah Kristian Sakhaw zuitu kohhran hrang hrang atanga kalkhawm mi 20,000 chuang te chuan India ram hmun hrang hranga Kristian te chunga hleilenna leh tihduhdahna thleng chamchi chu an duhlohzia lantir nan leh Kristian tihduhdahna avanga thi ta te tuarpui nan kawngzawh runpui an nei . He Good Friday kawngzawh hi Sacred Heart Church atanga tannin mel 6-a hla Convent of St, Charles thleng an nei a. India ram sakhaw hruaitu lu ber ber ten he kawngzawh hi an zawm a, mel 6-a hla kawngzawh hi ngawirengin an kal a ni. Tarlan fo tawh ang in India ram hmun hrang hrang a bik takin Orrisa leh Karnataka state-ah te Kristian tihduhdahna hi a hluar hle a, Karnataka-ah Biak in, Kristian School leh Kristian sakhaw zuitu te chenna in beih leh suasam a ni a, mi tamtakin tihduhdahna nasa tak an tuar bawk. Chutiang bawkin Kristian tam tak chuan Orrisa state ah tihduhdahna nasa tak a thleng bawk a, Biak in tam tak hal a nih bakah Kristian tam takin an thih phah a, mahni inluma awm ngam lo in tamtak ramhnuaiah an tlanbo a, chhiatna rapthlak tak an tawk a ni. Heng Kristiante tawrhna thleng hrang hrangah hian Sawrkar leh Police ten hma an la tha lo hle a, thubuai thup then leh nuaibo engemawzat a awm bawk. Heng thil te duhlohna lantira thi ta te sunnan hian he kawngzawh hi huaihawt a ni ta a ni
Good Friday chawlh a puang turin hma la dawn
Tun Good Friday, April 22, 2011 dar 12- 3:30 p.m. inkar hian National Mall, Washington D.C.-ah America rama Good Friday chu National holiday (rampum huap chawlh) a puan a nih theih nan hmalak a ni dawn a, he hmalakna ah hian a buaipuitu te’n signature maktaduai khat lakkhawm an tum a, an lakkhawm theih chuan hei hi U.S. Congress-ah ngenna ang in US sawrkarin chawlh atana an puan theina atan an thehlut dawn a ni. U.S. state thenkhat North Carolina, North Dakota, Kentucky, New Jersey, Louisiana, Tenessee, Indiana, Hawaii, Delaware, Texas leh Connecticut-ah te chuan Good Friday hi chawlh atan puan ni mahse ram pum huap ang in state dangah te puan a nih loh avangin US sawrkarin Good Friday hi rampum huapa chawlh atana puan a nih theih nan hma an la ta a ni.
American leh Arab pastor thawk dun
American Pastor leh Arab Pastor te chuan tunlai khawvel buai tak kara sakhua leh sakhua inhuatna awm ti reh tura hma lak tumin thawhdun an tum. Heng pastor te hi Garry Andsell, Bellflower, California aHosana Christian Fellowship Pastor leh Ambassadors for Peace dinchhuaktu Jordan Pastor Ameal Haddad te an ni a, hetianga thawkdun tur hian 9/11-a America beih a nih hnu khan hma an lo la tan tawh a ni. “Haddad nen hian ‘Religious Rights Resolution’ chu sakhaw hrang hrang hruaitu te sign tir turin kan ruahman chin tawh a, hei hi a chhan chu sakhaw hrang hrang Christian, Muslim, Jews, Hindu etc te hian kan sakhua leh rinna hi kan tlang aupuia a duh apiangin an duh duh sakhua a an inleh theihna turin a ni,” tiin Garry Andsell chuan a sawi Hetianga thawh dunna thuthlung an ziah fel hma pawh hian Garry Andsell leh Ameal Haddad te hian sakhaw hrang hrang inkara innghirnghona awm thin ti reh turin hma an lo la tawh thin a, Dr. Imad Mustapha, Syrian Arab Republic Ambassador te, Egypt a Sunni Muslim hotu lu ber Grand Imam te, Damascus leh Allepo a Jewish hruaitu lu ber Albert Cameo te, Rev. Edward Awabdeh, Damascus a Jesus Light of the World kohhran Pastor te leh Grand Mufti, Dr. Ahmad Bader Eddin Hassoun te chu Sakhaw hrang hrang in unauna leh innghirnghona thleng thin tihreh tura hmalak chungchangah hian an kawm tawh bawk. Hengbakah hian Muslim ram hranghrang te fangkualin mi zawng zawng, an thil buaipui mek tuipui tute chu an website (www.am4peace.com) a signature hnutchhiah turin an ngen a ni.
North Africa ah Bible sem
Italy rama chanchin tha puangdarhtu pawl, Evangelical Alliance chuan Africa hmarlam ram thenkhata tunhnaia tualchung buaina neuh neuh thleng avanga mahni ram tlanchhiatsan raltlan mi sing chuang te hnenah a thlawnin Bible an sem. Bible sem hna hi Mineo, Sicily-a refugee camp-ah leh Europe ram a luh beisei a raltlan tam tak awmkhawmna Tunisia hmarlam tuipui kam atanga km 75 a hla Lampedusa thliarkarah te kalpui a ni. Lampedusia thliarkar hian raltlan tam tak a mikhual avangin a buairu tawh hle a, raltlan 15,000 chuang te’n Italy pan tawh mahse mi sing chuang teh meuh he thliarkarah hian an la awm a ni. Heng mite buaipui tur leh rawngbawlna remchang nei tur hian Evangelical Alliance Italy te chuan volunteer engemawzah an thawn lut a, heng Volunteer te hian thuneitu te remtihna in tanpuina hrang hrang bakah Bible leh Pathian thu ziahna lehkha te an sem kual pah dawn a ni.
Pakistan ah Bible ti chhia
Pakistan khawpui pakhat Lahore-ah tunhnai khan Muslim tlangval kum 24 mi chuan Saint Anthony’s Catholic Church, Lahore kawta gate bulah Bible a pawtthler a, a rap vel. Hei hi hmanni lawk a Pastor Terry Jones leh Wayne Sapp te’n Florida, USA-a Muslim sakhaw lehkhabu thianghlim Koran an hal chhanlet na atana a tih niin a sawi. He pa, Akhtar Hussain, Kasur District a cheng ni a hriat hi Police te chuan an man nghal a, a lakah hian Section 295 A of Pakistan Penal Code hnuaiah thubuai an ziak lut. He dan Section 295-A hmang hian mi tupawh Pakistan mi leh sa in an sakhaw zui lai tawngka, thiltih, thuziak hmanga hmusit taka deuhsawh a buaina chawkchhuak thei dinhmuna dintirtu chu kum 10 lungin tan leh lei chawi hmanga hrem theih an ni Police sawidanin Akhtar Hussain hian biak inah hian mi tam tak inkhawmlaiin luh a tum phawt a, gate-a security te’n i.d. an dil hnuah luh a duh chhan an zawt a, ani chuan US-a Pastor Terry Jones leh Wayne Sapp te’n Koran an hal ang chiah khan Biak in chhunga Bible hal va a duh thu a sawi a, mahse Security te’n luh an phalsak loh avangin gate bulah hetiang hian a che ta a ni. Police te chuan he mi hi rilru lam buaina nei a ni loa, mahse Koran hal ani tih a hriat atangin a rilru a na em em a, kawng khat tal a chhanlet a duh vanga hetianga che ta hi niin ansawi
Pastor Terry Jones leh Pastor Wayne Sapp te thil tih hian rah tha lo tak tak a chhuah mek zel a. He thil duhloh lantira buaina hrang hrang khawvel hmun hrang hranga Muslimten an chawhchhuahah mi engemawzatin nunna hial an chan phah a, khawvel sakhaw hruaitu hrang hrang te’n an dem thu an sawi bawk. Tunhnai pawh khan Kristian Evangelist lar John Piper chuan a thusawinaah ‘Muslim lehkhabu thianghlim Koran hal hi Krista kraws-a khenbeh a nih Kristiante tan a na ang bawk khan Muslim ho tan pawh a na a ni” tiin a sawi.
