EAST LUNGDAR - KA LAWM E (Tour Diary)

Thawhtanni tukah hna thil avanga North Vanlaiphai a kal turin driver nen kan chhuak a. Chekkawn kan thlenin kan kalna tur deptt in advance Krismas an hmang a tlaiah chauh an hman dawn tih kan hria. Chekkawnah hian SDO N. Vanlaiphai chuan North Vanlaiphai kawng a lo block bawk a, a hla lam Champhai road atanga kal a ngai a, ka peih lo hle.

Tihngaihna awm hek lo, Champhai road lam atanga N. Vanlaiphai lehluh tum chuan kan tlan ta vang vang a, rei fe kan tlan hnuah kawng pengthuam kan thleng a, dinglam chu N. Vanlaiphai kalkawng a ni a, veilam chu Champhai kawng a ni. Signboard kan en a, East Lungdar 13 kms tih kan hmu. Chutah rilru ka thlak ta. Tlang mawi em em, ka kal chak thinna East Lungdar chu hnaite a lo ni a, North Vanlaiphai a kan programme tur lah tlai lam daih ala nih avangin ka rilru ka thlak thut a, ka driver peih vak lo chungin East Lungdar lamah kan kal ta.

East Lungdar kan thlen phatah tlang chu kan pan ding ta a, a lo nuam narawh e.. A nawmlohna erawh kan thleng chho chiah a, tawlh sawn leh ngaihna reng reng awm lova kan Motor lower arm bung hmawk mai chu a ni. Kan dinhmun ka thlir a, zan riah ngei ngei a ngai dawn a, a tuk bandh a nih avangin zan khat aia tam pawh riah a ngai mai thei. East Lungdarah hnelhriat ka neih loh chu thuhran, East Lungdar tuiliak hmelhriat ka neih ka hre lova, chhungte kan neih ka hre hek lo. Rilruin ar bo a zawng.

Vanneih asiamin signal a lo awm hlauh a, Mark Zukerberg-a remhriatna zarzo a hun e tih ka hrechhuak. Facebook ah ka status ka update ta nghal a, kan mangan thu leh puih kan ngaihthu ka han ziak chu mi hrang hrangin an lo chhiar a, an chhungte leh thiante min lo kawhhmuh ta zut zut mai. In chungah ka va lawm tak em.

Hun rei pawh a rial hmain bike tlan ri kan hria a, chu bike chu Pu Fakkima East Lungdar KTP Treasurer khalh niin U Puitei Mary Vanchhawng in theihpatawpa min buaipui azara min pui tura lokal a ni. A bike hnungah chuan E. Lungdar Mechanic chhuanvawr, samsei bumro ve tak mai, pasaltha hmel awma mai U Lianthanga a chuang bawk a, a sakhmelah ngaihnobeina hmu lo mah ila, ani aia hmeltha kha khatih hunlai khan ka mitah hian an awm awm love ka ti hial.

Motor kan han check a, chuti maia siam chi a ni lo. Thianpa Er Ruatsanga zarah P&E Tuipang SDO thin Pu Zaia East Lungdara a awm thu kan han hre leh a, ani pawh Aizawl atanga East Lungdar pan tuma Aizawla a awm lai nimahse kan chanchin a hriatin a thawhpui E Lungdar pa fel Pu Valtea a lo hrilhhria a, Pu Valtea hian a tir atanga a tawp thlengin min buaipui nghe nghe a ni.

Bolero Lower Arm leh Torsion rod kan han zawng nghal a, East Lungdar leh N Vanlaiphaiah kan hmu lo. Pu Valtea te, Pu Faktea te leh Pu Lianthanga ten mi hrang hrang an phone kual a, Serchhipah pawh a awm chuang lo. A buaitheih teh e.

Tlai khua a lo thim hnai a, tihngaihna awm hek lo le, kan motor chu kan kalh a, tlangchhipa hnutchhiah chu a ngai ta. Hmelhriat kan nei mang si lo a thlenna turah kan buai ta phawt. Mari leh Josepha thlenna hmu lo te pawh ka hrechhuak uai uai mai.. Chutih mek lao chuan Pu Lalfakkima bawk chuan an ina thleng turin min sawm ta hlauh mai a, kan bag kan ak a, a nupui Pi Mabiaki Serchhip lama a training avanga parawl mek Pu Faktea ina thleng tur chuan East Lungdar tlang atang chuan kan haw thla ta a. Puar takin chaw kan ei a, zan tawnmang lamah pawh engmah dang a leng lo, Motor siam lai leh Bolero lower arm hlir kan hmu.

Zing a lo ni a, hma takah thoin East Lungdar khua ka fang a, a faiin khaw mipui an tho hma hle mai. Thu lawmawm kan dawng ta. Taitesena bula thu sawi ang maiin ngawi rengin amah SDO Pu Zaia chuan kan mamawh ber mai Bolero Lower Arm chu Aizawl atangin min lo hawn lo niin. Kan lawm zia chuteh. .  Mechanic U Lianthanga te unau nen Pu Valtea te nen thleninpa Pu Faktea leh Pu Zaia te nen tlang lamah kan chho ta a, chawhma dar 10 ah kan insiam zo ta ani.

Tichuan chaw puar taka eiin tawngtaina leh lawmthu sawina hun ka hmang a, thlen inpa Pu Faktea nen kan in bye bye a, North Vanlaiphai lamah tihtur angte kan tifel a, Bukpui lan pan leh a, Serchhip ah chutiang zelin.. zan dar 8:30 velah tluang takin Lunglei ka thleng leh ta a ni.

Kalkawnga ka ngaihtuah chu Pathian remruat dan mak zia hi a ni. Kal dawnah ka nuin tawngtainain min thlah thlap. kan tluang viau. East Lungdar tlanga kan chhiat hlim kha chuan ka ngaihtuahnaah "Ka office hna thil pawh ni lo, ka hawikhawthawn chak vang mai maiin East Lungdarah tih tur nei miah lova ka han kal vang anih hi" tih kha a ni. Mahse ka han ngaihtuah thui deuh a, East Lungdarah khan kal lovin North Vanlaiphaiah khan kal tlang ila lo chhe ta ila, Pu Zaia anga motor part min lo hawn tu tur kha an awm miah lo ang. Lunglei atangin min lo thawn dawn se Champhai Sumo zawng zawng North Vanlaiphaia lut lovin Chekkawn atangin North Mualcheng lamah an tlan vek dawn a, a buaithlak hle bawk ang tih te kha a ni. Pathian remruat dan hi chu a tha a, a fel vel vek ani.

East Lungdar khua ka fak duh. An fel em em a, mikhual chungah that an chhuah a, kan thlen inpa phei chu keini aiin a inthlahrung emaw tih mai tur a ni. Kan mangannaah min buaipui a, an tei dawr dawr a, an tlan a, min ngaihsak zia kha ka thuziak thiam danin a tlin lo. Lawmna hlirin ka khat a ni ber mai.

Kan harsatna tawh azarah chhungkhat ang maia ka en zui tur East Lungdar mi fel tak tak ka tawng thar a, "Kan hloh hlepah kan chhiar" tih ang maiin kan harsatna tawh chuan hlawkna leh experience ropui tak min pe a, ka hlawk phah awk mai.

Kan buai atalangin East Lungdar tlangah lah chuan thla la tura kal e ti lovin thla ka la mumal hman pek lo va. Dam han hauh ila, mumal zawkin keima motor ngeiin ka la kal leh dawn chiang a ni. A khua a nuam si, mihring an fel si, a tlang a mawi bawk si.

East Lungdar - Ka lawm e.

BOKO HARAM

Western Education is Sin

                    Tun tum chu Nigeria rama hel pawl lar leh Kristiante chunga tihduhdahna nasa tak thlentu Boko Haram chungchang hi ziak ve dawn teh ang. Chhiartu thenkhat hnen atangin hman deuh atang tawh khan Boko Haram chungchang hi rawn ziak tura ngenna a rawn lut fo a, chipchiar takin hre thei lo mah ila an chanchin tlangpui leh an hnawksak zia te, Kristian te chunga an lo chet tawh dan tlangpui tarlan i han tum chhin teh ang.

India fa ropui, mual liam ta.......

KHUSHWANT SINGH  

               Vawiin Dt 20.3.2014 hian India mi ropui, khawvelin an hriatlar, lehkhabu tam tak ziak tawh tu,hlahril phuahtu lar,  fiamthu thiam lar, Khushwant Singh chuan kum 99 mi niin khawvel a chhuahsan ta. Khushwant Singh-a thuziak chhiar hi kan tam lutuk lo mai thei, mahse a thuziak chhiar hian ziaktu dang anglo takin a dang chhiar belh zel min ti chak tlat thin a, hei hi PU KS-a danglamna leh ropui em emna chu a ni. MI dik leh langtlang, a ngaihdan sawi pawp thin mi a ni a, heivang hian mi tam takin an ngainat em em rualin amah haw tu pawh an tam hle a ni. Sardarji Jokes phei chu sawiseltu an tam thin hle. Tunge chu miropui chu?

ALEXANDER DUFF

Tun tum chu India rama Scottish missionary hmasa ber Alexander Duff-a chungchang hi I han bihchiang veleh thung dawn teh ang.

                Hun hmasa lam: Alexander Duff hi Scotland rama Auchnahyle khuaah  April 15, 1806 khan a piang a. A nu leh pa te hi James Duff leh Jean Rattray te niin loneitu chhungkua an ni. A nu leh pa hian Alexander-a hi lehkhathiamin hna sang tak te chelh ve se an tih avangin lehkha zir lamah an kal tir tauh tauh a. An khaw kianga Pitlochry leh Kirkmichael vela sikul hrang hrang leh Perth Grammar School-ahte  a kal thinin mel 8 chuang nitin kein a kal tauh tauh thin.

Alexander-a hi a nu leh pa ten a naupan lai atangin an kaihruai tha em em a. Naupangte a nih lai atangin missionary tuta kohna chiang tak a dawng tawh a ni Kum 1821 atangin St Andrews University-ah Arts leh Theology lam a zir a, Greek, latin, Logic leh moral philosophy lamte a thiam em avangin kum hnih hnu lekah MA a zo ta mai a. Hna hrang hrang a thawh zui lai chuan kum 1827 khan Church of Scotland chuan ramdanga an mission hmasa ber tur chu tan an lo tum ve a, rawngbawlna kalpui an tum dan hi zirna behchhanin a ni.

                Hetianga Church of Scotland-in rawngbawlna bul an tan tur hi a hriatin Alexander Duff pawh hian Pathianin rem a ruat sakah a ngai a, missionary atana inpek chu a tum ta a. Chumi kawngah chuan St Andrews University-a  a zirlaia Moral Philosphy professor Dr Thomas Chalmers chuan Alexander-a chu a tuipui hle mai a, kawng tinrenga fuih phurin hma a lak pui ta a. Chuta tang chuan kawng tinrengin Alexander Duff chu a inpuahchah chho ta a ni.

INDIA RAMA KRISTIAN PAWL LIAN ZUAL TE

Tun tum chu bengvar nan India rama kohhran inhlawm khawm, Kristian pawl lian deuh deuh te i han bih thuak thuak dawn teh ang.

All India Christian Council (AICC): 

AICC hi India rama Kristian pawl inhlawmkhawm lian tak pakhat a ni a. AICC hnuaiah hian zirna in, pawl peng, missin leh kohhran hrang hrangte an awm a ni. Kum 1998-a din niin pawl thil tum pakhat chu Kristiante insuihkhawm a, hnam tenau zawk leh sakhua te nau zawk te tana aw nei ve khawpa inhlawmkhawm a ni. AICC hian kohhran in daidanna bang thiat a, kohhran hrang hrangte zai khata luana India rama Kristiante nekchepna leh tihduhdahna tih tawp anih theih nana hmalak ho chu an thil tum lian tak pakhat a ni. AICC hian motto atan “To Protect and to serve” (Venhim leh rawngbawl) tih an nei a, hemi dulthul hian hna tam tak an thawk mek a ni.

HLA LEH A PHUAHTU

IT IS WELL WITH MY SOUL 

- Horatio Spafford

Pathian fakna hla ropui tam tak hi harsatna nasa tak kaltlanga Pathianin hlaphuahtute

a pek a lo ni chawk thin a. Harsatna namen lo an tawh atanga Pathian an fakna hla an lo phuah tawhte hian vawiina Kristian tam tak nun a chawm nasa hle a nih hi. Harsatna kal tlanga hla phuah ropui tak mai, “It is well with my soul” chungchang hi tun tum chu han ziak ve leh dawn thung ila. He hla hi zaithiam tak tak ten an sak kan hre tawh ang a, hemi hla thluk hmang hian Rev Edwin Rowlands khan Mizo tawngin hla a lo siam a. Chu chu “Khawvel hrut chhuak ila, Lal Isua ang hi,” tih hi a ni. Rev Edwin Rowlands hian “It is well with my soul” tih hla hi letling lovin a thluk (Ville du Havre) hmanga hla dang diai a phuah avang erawhin he hla ropui tak a phuahtuin a phuah chhan leh Mizo tawnga he hla thluk kan lakna “Khawvel hrut chhuak ila,” tih hla hi en kawp a rem lo va, a inmil lo tih hriat hmasak a tha awm e. Chuvangin a sap hla hi engvang leh eng atanga a phuahtu hian a lo phuahchhuah tih kan sawi dawn a ni.

AMY CARMICHAEL

            Missionary ropui tak tak zingah hmeichhia tam tak an awm a. Pasal neih aia rawngbawl hna thawh thlang chin ngat phei chu an hnathawh a hlawk thei hle. Tun tuma a chanchin kan ziah tur Amy Wilson Carmichael pawh hi nu rorum leh tumruh tak, hrisel lo chunga huaisen taka Pathian rawngbawl tura India rama rawn chhuak, Furlough-a an rama haw miah lova kum 50 chuan rawngbawlna hmuna bung tling tla thak khawpa mi inpe, Pathian mi ropui zing ami a ni.

            Pianna: December 16, 1867-ah Amy hi Amy Wilson Carmichael tih hmingpuin Millisle, County Down, Ireland-ah a piang a, an unau hi pasarih niin Amy hi a upa ber a ni. A nu leh pa David leh Catherine Carmichael te hi Presbyterian kohhran niin Kristian tha tak mai an ni a, Mill an nei a, chhungkaw khawsa thei tak mai an ni. Naupangte anih lai atangin a nu leh pa te hian an kaihruai tha em em a, Kristian tha tak a nih piah lamah fahrah leh chanhai leh rethei zawk te a khawngaih thei em em a, tanpui chakna thinlung, naupangte a nih lai atang tawhin a nei a ni.

Rev William Williams

            Nikuma Synod rorel khan Mizorama Chanchin Tha rawn thlen hmasak ber ni chu March 15, 1891 niin a rawn thlen hmasa bertu chu Rev William Williams ani tih an pawm thu kha kan hre vek awm e. Kha thutlukna khan ngaihdan hrang hrang a siam chhuak a, a pawm leh pawm lo pawh kan kat nuk awm e. Awle, tun tumah hian Rev William Williams-a hi Chanchin tha rawn thlen hmasa bertu anih leh nih loh lam kan ziak dawn lo va, amah hi pa ropui ve tak, tuifinriat ral atanga Pathian chanchin tha hril tura India hmarchhaka rawn kal vang vang anih avangin leh tunlaia a hming a rawn lar thar leh tak em avangin a chanchin tlem a zawng kan ziak veleh dawn a ni. 

            Pian leh murna: William Williams-a hi Feb 11, 1859 khan Captain Daniel leh Elizabeth Williams te inkarah a lo piang a. A pianna khua hi Wales ram Cardiganshire biala thingtlang khaw te tak te Nanternis khua a ni. A pa Captain Daniel hi lawng hmanga sumdawng mi a ni a, lawng captain a ni a, Williams-a hian kum 12 anih thlengin Rev William Lewis-a enkawlna hnuaiah New Quay Grammar School, Capel Neuadd-ah a zir a ni.

ROBERT ARTHINGTON

Tun tumah hian he mi hausa, a sum leh paite Chanchin tha hril nana hmang zotu Robert Arthington-a chanchin hi kan ziak ve leh rawih dawn a. Thulaknate chu Arthington-a chanchin tawpna Issue-ah ka tarlang leh e.

            Pian leh murna: Robert Arthington hi May 20, 1823 khan England rama Leeds khawpuia Beer siamchhuaktu hausa tak Robert Arthington Sr leh Maria Arthington te fapa neihchhun niin a lo piang a. A nu leh pa te hi Society of Friends (Quakers)ah a kul ataia inhmang an ni. A pa hian Leeds khawpuia Hunstlet Lane-ah Brewery (Zu thlawrna) lian tak mai a nei a, hei hi an thlahtute atanga an inrochun an sumdawnna hlawk tak chu a ni. Zu siamna atanga an hausak em avang hian Robert Arthington-a pawh hian Cambridge-ah College a kal theih phah a ni.

            Zu sak an bansan: A nu leh pa te hi Kristian pawl pakhat Quakers-a a kul ataia an inhmang chunga zu thlawr hna an thawk hi hrethiam lo kan awm mai thei. Hriattur chu hetih hunlai (kum zabi 19-ma tirlam) hian zu zawrh leh in hi thil pawiah miten an la ngai lem lo va, kohhran pawhin a sawisel ngai lem lo. Ṭuakers ho hian thlatin Arthington-a inah hian inhmuhkhawmna an ne9i thin a. Hetia an inhmuhkhawm hian Beer te an inho thin hial a ni. Mahse Arthington-a’n college a kal lai hian mi fekfawn deuhte chuan Kristian inhlawmkhawm ṭuakers a an tel chung si a Zu saa an in chhek hausa hi an sawi sel tan tawh a. Chumi atang chuan a pa Robert Arthington Sr chuan zu siama eizawn hi a rilru chhungril tak atanngin tha lovin a hriat a, chutiang bawk chuan Ṭuakers member dang rilruah pawh an inhmuhkhawm apianga beer an in thin te, Pathian rawngbawl chung si a beer an siamchhuak reng si ngaimawhna chu a awm a. Tumkhat chu inkhawmnaah beer an inho leh a. Chutih lai chuan Ṭuakers member John Prietman-a chuan beer bel lianpui mai chu a leih baw ta vek a. Robert Arthington Sr. pawh chu thinrim ahnekin a rilru a siam fel a, tichuan kum 1950-ah an chhungkaw sumdawnna hlawk tak, Beer siamchhuahna chu a khar ta hmiah a ni.

Pangdailo Sena

Rev. P.D. Sena

          

            Rev PD sena hi kum 1901 May thla khan Lunglei khawthlang lampang, Kawlhawk khuaah a piang a, a pian kum hi Zoram chhiarpui neih hmasak ber kum a ni a, Queen Victoria (kumpinu) hriatrengna lung khawnawta an phun kum kha a ni bawk. A hming pum chu Pangdailova a ni a, a u ten koh duat nana ‘Sena’ an tih chu a pu hlen ta a, PD Sena (Pangdailo Sena) tia hriat leh koh a ni ta ber a ni.

            PD. Sena pa hi Siakeng pasaltha Hangkhawia a ni a, an unau hi mipa pahnih niin a u hming chu Vawmkaia a ni. A pa Hangkhawia hian kum 4 mi vel anih laiin a thihsan a, a pa hi a hrechiang hman lo hle.  Ni lum ai naa a pain a kapkara a pawm thin te, a pa lo chak loh tak hle hnua an chhuat dap keu awnga zunram a thiar laite chu a pa a hriatrengna awmchhunte a ni mai. Tichuan an nufa thum chuan pa tel lovin an khawsa chho ve ta naw naw a, a hnu deuhah an nufa thum chuan an pa mi Piangrawia (Piangrova Pa) chuan enkawl turin a hruai ta a ni.

Martar Vanlalliana

        MARTAR VANLALLIANA 

      

Martarna hi Pathianin nasa takin a ram zauh nana mite thinlunga thusawi nan a lo hmang tangkai tawh thin a. Pathian tana Martar ngam khawpa rawngbawlna luhchilhte thisen hian mi tam tak Krista hnenah a lo hruai thleng tawh thin. Mizote zingah Martar sawitur tlemte chauh kan nei a, chung zinga mi Tv Vanlalliana, Lunglawn, Lunglei ami, Kawrpuichhuah Vai sipaite laka Martar ta chanchin i han ziak leh dawn teh ang.

                Hun hmasa lam: Vanlalliana hi February 18, 1925 khan ringtu hmasa Pu Romuala leh Pi Lianthuami te fa pathumna ni turin Lunglawn, Lungleiah a lo piang a. An unau hi 7 lai niin mipa 2 leh hmeichhia 5 an ni. A pian tirh hian nausen hmel tha tak leh ngo tak mai a ni a, Pastor Thankunga chuan a lawm em em mai a, a hmingah Vanlalliana tih a sa ta a ni.

                Naupang hmeltha leh thuawih, lehkha thiam thei tak mai a ni a, lehkha a zir peihin mi thiam ang thiam tum ve zel mi a ni. Hei vang hi a niang kum 10 lek anih in Primary a passed thei hiala, a hunlai ngaihtuah chuan naupang tak a ni. Hetih hunlai hian zirlai te hi an upa thei khawp a, “Pu Hrangsela’n Dawna a sikul naupangte hnenah, ‘Pawl thum ho khan in hmuihmul met vek rawh u, Inspector a lo kal dawn’ a ti e” an ti thin a, pawl thum zirlai te chuan thlan an lai a, nula an rim luih luih tawh a ni.

GEORGE BEVERLY SHEA

America's Beloved Singer

GEORGE BEVERLY SHEA

         Mizo mi ropui tak tak te chanchin kan ziak ta nual a, tun tum atan chuan Billy Grahama rawngbawl pui thin, zaithiam lar tak, George beverly Shea chanchin i han thlur bing ve leh dawn teh ang.

  George Beverly Shea hi February 1, 1909 khan Winchester, Ontario, Canada-ah a piang a, Wesleyan Methodist Church pastor, Rev Adam Joseph Shea leh a nupui Maude Theodora Shea te fa pariat zinga palina a ni. Kohhran hruaitu chhungkua atanga seilian tih takah naupangte anih lai atangin a zai tan tawh a, a pa hian Violin tum a zir tir thin bawk bakah a nu hian Piano leh Organ tum te a zirtir thin a ni. A tleirawl chhoh tirh atanga a aw thum tak mai chuan mi ngainat a hlawh em em a, a pa kohhran enkawla zaipawlah te regular takin a tel chho a, mipui hmaa a zai hmasak berna chu Ottawa Valley-a inkhawmpuia a zai kha a ni awm e.

Ama sawi danin George Beverly Shea hian kum 5 anih laiin Lal Isua Krista hi Lal leh Chhandamtua pawmin a piangthar tawh a, tleirawl sual em em nei lo mahse midangte ang bawkin a tleirawl nunah Pathian ngaihsak tawk loh hun te a nei chho ve a, kum 18 mi anihin Sunnyside Wesleyan Methodist Church, Ottawa, Canada-a a pa rawngbawlnaah Krista tan a inhlan thar nawn leh ta a ni. 

“Ka thlarau nun chau tak avangin Krista hnena inhlan thar leh tul tihna lian tak ka nei a. Kum 18 mi ka nih lai, ka pa in Ottawa-a kohhran a enkawl laiin ka pa chuan rawngbawlna a nei a. Zirtawp zan a ni a, chumi zan chuan ka pa thusawi lai chu Pulpit atangin a rawn chhuk a, zawi sap hian, “Ka fapa, zanin hi  lalpa hnena i lo let leh hun tur a ni,” tiin min rawn hrilh a. Ka pa sawi vang pawh ni chuang lo chuan khami zan khan ka nun chu Lalpa tan ka hlan thar nawn leh ta a ni.”

BILLY GRAHAM             

                Billy Graham-a rawngbalna chanchin hi chipchiar takin ziak dawn ila chuan thui tak leh kim tak ziak tur a awm a, helaiah erawh kan chhawpchhuak seng awm lo ve. Khawvel ram hrang hrangah rawngbawl tura sawm a ni a, chung ramah te chuan rawngbawlna neiin mi tam tak Krista hnenah a hruai a, a rawngbawlna a tla tha thei hle. Cold War lai te khan US mai bakah Europe leh Soviet Union-a ram hrang hrangah rawngbawlna neiin remna leh muanna chungchang a auchhuah pui nasa thei hle a, a rawngbawlna hi mipuiin an hlutin Billy Graham-a tluka Evangelist lar hi an tam lo viauin a rinawm. A  lar bawk aniang Oct 15, 1989 khan Billy Graham-a hming hi lemchan leh rimawi lama milar te hming ziakna Hollywood Walk of Fame-ah ziah luh a ni a, Rawngbawltu zingah chuan Hollywood Walk of Fame-a hming lang pha awmchhun a ni awm e.

THE CHRISTMAS TRUCE 1914

Indopui 1-na thlen hunlai kum 1914 Krismas-a thil thleng chungchang hi mi tam takin an ziak tawh a. Ngaihnawm leh chhiar nuam tak chanchin a nih avangin i han thailang ve leh teh ang.

                He Christmas truce of 1914 tia hriatlar hi indopui 1-na hunlaua Western Front-a indo mek British leh German sipaite inkara hotute hriatpui loh inkahhai (unofficial ceasefire) a ni a. Tuma thu pawh nilova inkahhai neih anih hi hriatreng tlak a nihna lai a ni lo va, amaherawh chu he inkahhai phena Krismas thlarau awm hian he inkahhai hi a ti lar a, mi tam tak rilru a khawih a ni.

                Indopui I-na kha kan hre theuh awm e. July 28 1914 atangin a intan a, November 11, 1918 thleng a awh a nih kha. Hetih chhung hian khawvela ram thil tithei deuh chu he indonaah hian an inhnamhnawih deuh vek a. Chung ram hrang hrangte chu pawl hnihah inthenin Allies (Triple Entente) lamah United Kingdom, France leh Russia an tang ho a, Tripple Alliance lamah Germany, Austria- Hungary leh Italy te an tang ve thung a, mi tam takin an thih phah a, kum 4 chhung indonaah hian mihring million 25 chuang thi leh hliamin an awm a, khawvel politics a sawi danglamin nghawng pawh a nei lian hle a nih kha. Heti chung hian he indonaah hian chanchin ngaihnawm tak zu awm tlat a.

Mi ropui Pu Chawngkhupa chanchin kimchang

                  PU CHAWNGKHUPA

Pu Chawngkhupa chanchin ziakna lehkhabu hi ka dap ru reng thin a, hetiang mi ropui chanchin hi kimchang taka internet-a chhiar theih tura chhawp chhuah ve reng reng hi ka duh thin a. Vanneihthlak takin Padma Shree RK Lalhluna nen kan intawngfuh hlauh mai a, keiin Pu Chawngkhupa chanchin ziakna a neih leh neih loh ka lo zawt var a, ani chuan a bu-a alo siam tawh thu leh a copy hlui a la neih thu min hrilhin min lo photocopy (xerox) sak hlauh mai a, he lehkhabu behchhan hian Pu Chawngkhupa chanchin hi kan ziak thei dawn a ni. A bu ami hi a tam tham deuh avangin kan kaitawi ang a, a pawimawh leh ngaihnawm chin lakchhuah kan tum anga, a tul angin kan belh bawk ang.

Hun hmasa lam: 

                       Pu Chawngkhupa hi Pu Kawldingpuia leh Pi Challianthangi te fa pangana a ni a, April 9, 1909 khan a lo piang a, amah hi Ralte Kawlni (Helhlah) hnam a ni. An chhungkua hi chhungkaw taima leh tluang tak an ni a, pachhia leh hmeithaite inhnemna ber an ni thin. Pu Chawngkhupa hian amah hringtunu leh pa bakah hian thlarau lam pa a nei a, chu chu ringtu hmasate zing ami Upa Khuangzika a ni a, Pu Chawngkhupa hian thlarau lama a pa, amah hringtu nia a ngaih avangin “Ka pa khuangzik Abraham” a ti kher thin.                                                                                           

                Pu Chawngkhupa hi a piantirh atangin mi pian tha mang lo a ni a, a naupan laiin a beng a chhet a, chutih rual chuan a kherh deuh reng mai bawk a, hei vang hian thil ri a hre thei meuh lo. Chu achhapah a dang a awk em em a, rei tak chhung phei chu ‘R’ hawrawp hi a lam ri thei meuh lo. Chuvang chuan chhawnchhaih leh bawlzan pawh a hlawh deuh va. Mahse a nu leh pa te hi an khawsak theih avang leh an lal fapa Lalthawvenga nen an inkawmngeih em avangin tuman an tichhe tak tak ngam lo va, an hmusit tak tak ngam lo bawk.

                Kum 1914 khan thuhriltu lar tak Pu Thangbawnga khan Pu Chawngkhupa te khua Sailam a tlawh a, hetih lai hian Sailam lal, Bengkhuaia fapa Sairuma hi Kristian do em em mai a ni a, chuvang chuan Sailamah pawh hian Kristian an tlem hle. Pu Thangbawnga chuan Sailama Kristian tlemte awmte a va tlawh tum chuan Pu Kawldingpuia te inah hian a leng a, tah chuan an fapa Chawngkhupa chu a en vang vang a, “In fapa hi naupang danglam tak a la ni dawn e,” tiin a hrilh a. Chuta tang chuan Pu Kawldingpuia te nupa chuan an fapa chu eng ang taka danglam tur nge anih an hre lem lo nain Pu Thangbawnga thusawi chu an vawng ta reng a ni.

TATTOO LEH KRISTIAN THALAITE

                 Tunlai khawvelah Tattoo hi a lar em em a, mi tam takin tattoo hi an taksa hmun hrang hrangah an chhukai a, tam takin an chhuan viau laiin tam tak chuan an zahpuiin an inchhir leh a, tih reh tumin sum tam tak an seng thin. Celebrities lar tak tak ten Tattoo hi an uar em avangin henglai hmunah pawh thalai tam tak ten tattoo hi an chhu kai ve thin a, hei hian nghawng thalo tak a neih ve theih avangin tun tum ah hian helam hi i kan chhuizau dawn ang a. Tattoo-ah hian chi hrang hrang a reh awl chi Henna tattoos, Ball Point Pen Tattoos leh temporary tattoos dang tam tak hun rei lo te chhung daih tura taksa a chhut kai chi a awm ve a, duh vang reng ni lova chhhinchhiahna chhutsak Sipai te pawh an awm. Mahse tun tum chu reh thei lo tura taksaa an chhut kai thin Permanent Tattoos chung chang kan chhui bing dawn a ni.

WATCHMAN NEE

            Kum zabi 16-na lai atang khan Europe leh America atangin Missionary tam takin China ram an luhchilh a, Chanchin tha chi an theh nasa hle a. Hemi kalzelah hian kum zabi 20-na a lo herchhuah meuh chuan heng mi huai kal hmasa te Chanchin tha chi theh tiak thang chho zelin a ram mi, mi tha tak tak missionary atan a chherchhuak chho zel a, Boxer Rebellion lai pawh khan martar an tam hle anih kha. Heng a ram mi, Krista chanchin thain China ram pum a tuam theihna atana mi inpe tam tak zingah hian Watchman Nee hi a lar pawl leh ngaihsan hlawh ber pawl a ni awm e.

                Pianna: Watchman Nee hi Nov 4, 1903 khan Foochow, China-ah Nee Shu-Tsu tih hming puin a lo piang a. A pian hma hian a nu unaunu hian fanu hlir 6 lai aneih avangin a nu pawh hian fanu a neih a inring hle a, chutih lai chuan fapa a awt bawk si. Tichuan fapa dilin Pathian hnenah, “Lalpa, fapa min pek phawt chuan i rawngbawl turin ka hlan ang e,” tiin a tawngtai ta a. Pathian chuan Nee-a nu tawngtaina chu chhangin fapa a pe ta a, a pianpui hming Nee Shu-Tsu tih hi kum 6 anih thleng a pu a, hemi hnu hian a hming hi Watchman Nee tiin a thlak ta a ni.

                Chhungkaw lam: Watchman Nee-a hi Kristian chhungkaw tha tak hnuai atang seilian niin a pu Nga U-Cheng hi kum 1870 chhoa American Supplies Commission-a an thuhriltu thin a ni a, a pa Ni Weng-Sioe hi Imperial Customs Service-a officer a ni ve thung. Nee-a thlahtute hi Methodist kohhran an ni a, Nee-a pawh hian a naupan laiin American Methodist Episcopal Mission hnuaiah Baptisma a chang a ni.