Gilbert Renthlei

China rama Missionary hratkhawkheng

Jonathan Goforth

China rama Missionary ropui Hudson Taylor-a avangin mi hrang hrangin China ram an vei a, Pathian ram zauh duhna thinlung neiin China hi an luhchilh a. Chung zingah chuan mi ropui tak tak, khawvelin a hriat reng tur Missionary an awm nual a, tuna a chanchin kan sawi tur Jonathan Goforth pawh hi Hudson Taylor-a hniakhnung zuia China rama Missionary ropui tak ti ta a ni.

            Panlai nun: Kum 1840 khan England ram atangin John Goforth-a te chhungkua chu Canada-ah pem lutin Thorndale, Ontario-ah an inbengbel a. Pu John-a hian a nupui Jane Bates-i nen fa 11 lai neiin a pasarihna chu Jonathan Goforth hi niin February 10, 1859 khan Thorndale, Ontario-ah Jonathan-a hi a piang a ni.

            Jonathan-a nu leh pa te hi lonei mi niin an chhungkaw khawsak a harsa hle mai a, chutih rual chuan a nu hi Pathian ring tlat mi leh a fate pawh Pathian lam hawia hruai tum tlat, nu fel tak a ni. A nu hian a fate chu Bible chhiar leh a chhunga thu awmte hrilhfiahin a zirtir thin a. Sam ziak te chu Jonathana hian a vawng bel hle thin. Kum 7 mi a nihin an thenawm nuin Bible a present a, chu chu a chhiar taima hle thin. Mahse hetih hunlai hian a la piangthar lo a, vanneihthlak takin kum 18 a nih laiin Pastor pakhat Lachlan Cameron-a thusawi atangin a rilru a siam a, Isua chu Lal leh chhandamtua pawmin a piangthar ta a ni.

            Jonathan Goforth-a hian Politician emaw Dan hremi (Lawyer) hlawhtling tak nih a tumruh hle thin a, an kawmcharah chuan amahin thusawite a zir nasa thin hle. Mahse a pain Robert Murray M’Cheyne lehkhabu ziak a chhiar tir chuan a nun chu a thlakthleng chiang hle a, chu lehkhabu hmang chuan Pathianin a rawngbawl turin a ko zawk niin a ngai hmiah mai a ni. Jonathan Goforth-a hi Presbyterian Church of Canada member a ni a, a pianthar hnu atang hian rinna lamah a thang chak hle. Robert Murray M’Cheyne-a lehkhabu ziak a chhiar zawh atang chuan kohhranah tuina nasa tak a nei ta a, Sunday school zirtirtu te niin Bible tract sem chu hna pawimawh takah a ngai a, Pathianni apiangin Biak in kawngka bulah lo dingin Bible Tract chu mitin hnenah a sem thin a ni. Chutianga Bible Tract sem hna a kalpui leh hnuah chuan a rawngbawl dan chu duhkhawp lovin an in atanga mel khat vela hlaa school building hluiah chuan Sunday tlai inkhawm a buatsaih tan ta a. Chu hmunah chuan chhungkhat laina hnai te nen inkhawmna hun hmang thinin a pa lo pianthar theih nan nasa takin Pathian hnenah an tawngtai thin a , thla tam a ral hnuah chuan a pa ngei pawh chu a piangthar ve ta nghe nghe a ni.

            Hemi hnu hian tum khat chu Jonathan-a hian Formosa-a Presbyterian Missionary G.L. Mackey-a thuchah a ngaithla fuh hlauh mai a, a thusawi tawpa Mackey-a’n Missionary a kalchhuak tura a thusawi ngaithlatute a sawmna chuan a rilru a khawih hle mai a, chu sawmna chu chhangin Pathian tana rawngbawl turin a rilru chu a siam nawn leh ta a ni.

            Pathian rawngbawl nana a tangkai zawk inbeiseiin Jonathan-a chu Knox College-ah a inziak lut ta a, mahse a College-a a hun hman dan chu a beisei ang a ni ta hauh lo mai. Loneitu rethei tak fapa ve mai a nih avang te, a thawmhnaw thing tak avangte chuan hmuhsit a tawk nasa em em a, an tiduhdah hle bawk. Mahse Jonathan Goforth-a nun zahawm takah chuan Pathian hmel a lang chhuak a, amah hmusit leh tiduhdah tu te chuan rawngbawl tura a inpekna thuk tak an hmuh chuan an tiduhdah reng thei lova, Jonathana nun chuan amah tiduhdahtu a classmate te rilru chu a hneh em avangin an zah a, China Inland Mission in China rama missionary-a kal a dilna an hnawlsak hnu pawhin heng amah hmusittu a hnua ngaisang let hlauhtu te hian Jonathan-a’n China rama rawng a bawl theih nan sum an tuak pui ta zawk hlauh a ni.

            Knox College, Toronto-a a zir lai hian Jonathan Goforth-a hian Toronto leh a chhehvela rawngbawl dan tur a dap reng thin a, mi rethei awmkhawmna (slums) ah te, Jail leh Toronto-a chenna in hrang hrangah te Pathian thu a hril kual thin a, Knox-a a luh lai hian nipui chawlh tum khat chu Jonathana hian in 960 lai a tlawh chhuak hman nghe nghe a ni. Hetiang taka rawngbawlna lama a inhman avang hian a lawm amah hmusittu te nun a hneh let a, China ramah an aiawh tura an tirh tak hial ni.

            Toronto-a lehkha a zir lai hian rawngbawlna lamah a tuiin mibote Krista hnena hruai chu a thupui tlut mai a, Pathian rinawm zia a hmuchiangin George Muller leh Hudson Taylor te angin a mamawh zawng zawngah Pathian a ring ngam tlat thin.

            Hetih hunlai hian Jonathan Goforth-a hian Thlarau  hruaina a chang nasa thin hle mai. Tum khat chu Pathianni hian hmun pakhatah thusawi tura sawmna a dawng a, mahse kawng chanve chuanna man chauh pawisa a nei si. Tichuan a pawisa neih chhun chuan a Rel ticket a la ta a, station pakhat thleng chauh chuanna a daih a ni. Tichuan a tawngtai a, a bak zawng, mel 10 chuang chu ke a kal mai a tum ta a. Rel station pakhat an thlen hnu chuan ke a kal a ngai ta. Amah chuan mel 10 chuang a thui chu a kal ta tauh tauh mai a, mel 8 chuang a kal hnu chuan mi thenkhat kawngpui siam ho chu a hmu ta. Chung mite bulah chuan chawlh hahdam pahin Pathian thu a hrilh a, a tuk Pathiannia a thusawina hmuna inkhawm tur chuan a sawm ta bawk a.

            A tuk Pathianniah chuan mak tak maiin a mi sawm te chu a thusawina hmunah chuan an lo kal kim thap a, an zinga pakhat chu chhandam a ni ta bawk a. Hemi chungchang hi sawi lehin Jonathan Goforth-a chuan, “Thlarau pakhat chhandam anih dawn phawt chuan lawm takin Mel 10 kea kal ka inhuam reng a ni,” tiin a sawi thin.

            Jonathan-a hian Toronto-a Nawhchizawrhna hmun leh Zu zawrhna hmun te a luhchhuak hmiah hmiah a, chung hmunah te chuan Pathian thu hril nghal zelin mi tam tak, misual leh nun beidawng tak tak engemawzat chuan chhandamna an chan phah a ni. Zan khat chu chung hmuna a kal zo chu Police pakhat hian lo tidingin, “Engtin nge sawtiang hmunah sawn nangmahin i kal ngam a? Keini Police ho chuan pathum tal kan nih loh chuan kan kal ngam hleinem, an bawraw si,” tiin a zawt a, Jonathan chuan, “Keimahin ka kal ngai hleinem, Isua’n min kalpui reng thin a, hlauh tur a awm lo,” tiin a chhang hlauh a ni.

            Jonathan Goforth hian China ram hi a rawngbawlna tura Pathian ruatsakah a ngai hmiah mai a, amah pawh a in puahchah nasa hle. Kum 1885 khan Goforth-a hian Hudson Taylor-a lehkhabu ‘China’s Spiritual Need and Claims’ chu a dawng hlauh mai a. He lehkhabu hian a nunah nasa taka thusawiin China rama Missionary-a kal ngei a duhna chu a chhemalh nasa lehzual hle. Hetih hunlai hian an kohhran Presbyterian Church of Canada chuan China ramah rawngbawlna an neih loh avangin Jonathana hian Hudson Taylor-a pawl China Inland Mission  hnenah Missionarya kal dilna a thehlut ta. Mahse CIM hnen atanga chhanna a hmuh tak loh avangin a hmaa kan sawi tawh Knox College-a a luh laia amah hmusittu a thiante, a hnua ngaisang leh si tu te chuan pawisa tuak sakin Presbyterian Church of Canada kaltlangin China rama rawngbawl chu a dilta a, Pathian hnenah pawh China rama a kal theih nan a tawngtai tlut tlut thin. Hetih rual hian Pathian hnathawh chu lo langin Presbyterian Church of Canada-in kum 1887-a General Assembly an neih tumin China rama rawngbawlna huang zauh chu an rawt thlu ta a, Jonathan Goforth-a leh J. Fraser Smith-a te chu China hmarlama Missionary hnathawk tura lain hemi kum vek hian an ordained ta nghal bawk a ni.

            Nupui: Toronto Union Mission hnuaia rawngbawl hna a thawh laiin Goforth-a hi he pawl hnuaia thawk ve tho nula pakhat Rosalind Bell-Smith-i nen an in hmelhriat a. Rosalind-i hi Episcopalian niin chhungkaw hausa tak leh changkang tak atanga chawrchhuak a ni. Kristian tha tak mai niin Pathian tana hun puma rawngbawl tum tlat mai a ni a. Goforth-a nen an inhmuh hmasak ber ni hian Goforth-a’n thawmhnaw man tlawm tak inbel chunga mitmeng rum tak mai a pu hmel chu a hmuhhmaih loh lian tak a ni. A hnua Mission Meeting neih anih tumin Rosalind-i hian Jonathan-a Bible, chair-a lo awm chu a hmu fuh a. A han keu va, chu Bible chu a neituin a hmang rim hle tih hriat ngawih ngawih hian a phek te chu a er ten tun a, chu Bible chhunga thu hrang hrang lo in underline thleh thluah mai te chuan Jonathana Bible chhiar nasat zia Rosalind-i chu a hmuh chian tir hle. Tichuan a rilruin Rosalind-i chuan, “Hetiang mi ngei hi pasal atan ka duh a ni,” tiin a sawi a. Thla tam a ral hmain Jonathana pawh chuan Rosalind-i chu nupui atan sawmin a hual ta a ni. Hetia an inhual hnu hian Jonathan hian Rosalind-i hnenah an inneih hnua a ngaihpawimawh hmasak ber tur chu a nupui nilovin Pathian rawngbawl a ni a, chu chu a thik a rem loh tur thu a hrilh sa vek a, Rosalind-i pawhin a pawm thiam hle.

            Tichuan October 25, 1887 khan Jonathan Goforth-a leh Rosalind Bell-Smith-i te chu an innei ta a. Toronto khawpuia Knox Church-ah anmahni thlahna ropui taka neih a nih hnuin Feb 4, 1888 khan China rama an rawngbawlna tur hmun panin an thawkchhuak ta a ni.

            China ramah: Kum 1888 Sept thlaah Jonathan Goforth-a leh a thiante chuan China rama Canadian Missionary hmasa ber ni turin China ram chu an thleng ta a. Honan Province Biala rawngbawl chu an tum ber a ni a. Mahse Jonathan-a hian Chinese tawng chu har a tih em avangin Chinese tawng zirin Chefoo-ah thla 9 chhung zet an khawsa ta a ni.

            Pathianin kaihhruaina chang zelin Goforth-a te chuan China ram chhungril zawk lam chu zawi zawiin an luhchilh a, sawi tawh angin Honan Province-a Mission Station bun an tum hmasak a ni. China ram an luhchilh tirh hian lawmna mak tak tak leh lungngaihna tawpkhawk ten a tlakbuak chhen a. An chunga thil thleng lungchhiatthlak tak chu fa 10 lai an neih (Donald, Paul, Florence, Helen, Grace, Ruth, William, Constance, Mary leh Frederick) te zinga 5 (Gertrude, Donald, Florence, Grace leh Constance) laiin an rawngbawlna hmuna an thihsan hi a ni awm e.

            Tichuan Canadian Presbyterian Mission in an tirhna hmun Honan Provine lam chu an hnaih hret hret zel a, December 1889-ah chuan Honan Presbetery chu din niin Jonathan chu Moderator hmasa ber a ni. Kum hnih chhung atan Linching, Shantung-ah Mission Station an din a, hemi hnu hian Kum 1890 khan Chuwang, Honan-ah an insawn. Kum 1894-ah Changte-ah an insawn leh a, heta tang hian Jonathan Goforth-a hian hmun hrang hrangah rawnbawlin a vakchhuak ta thin a, kohhran an din a, ringthar engemawzat a siam bawk.

            Kum 1894-1895 khan Goforth-a te chhungkua hi Furlough in Canada-ah an haw a. An let leh hnu pawhin dan ngaitein rawngbawl hna chu Jonathan-a chuan kalpuiin a. A nupui Rosalind-i erawh chuan Changte-a an inah nu ho tan Bible class a lo buatsaih ve thin thung a ni.  Goforth-a te chhungkua hian inhawng takin Chinese ho chu lengah te an sawm a, Chinese ho chuan khawthlang ho awmdan chu an chik em avangin an chezia an enduh hle a, an inah pawh chuan nitin mi hrang hrang an lo chuang kai thin a, chu chu Goforth-a te nupa chuan Chinese ho hnena rawng lo bawlna remchang atan an lo hmang hlauh thung a ni. Amaherawhchu hetianga Chinese ho an ina an len tir luih luih thin hi Missionary dangte chuan ‘Khawthlang mite standard a tihniam’ tiin sawisel mahse Goforth chhungkua hi chuan Chinese mite hnena rawngbawlna tangkai taka an hman avangin hei hi an kalpui lui ta tho a ni.

            Kum 1900-ah China hmar lamah tualchhung buaina hmingthang tak Boxer Rebellion chu a chhuak a. Chinese ho chuan Foreign mite awpna leh Kristianna dodalin buaina an chawk chhuak a, he helnaa inhnamhnawihte chu Boxers tia sawi an ni. Buaina a lo punlun tak zelah chuan ramdangmi te tan a him lo sawt em em a, Missionary te pawh chu he buaina lak atanga insasenga hmun him lam, China chhim lam pan tura hriattir niin Jonathan-a leh a thuihhruaite pawhin China chhim lam an pan a. Hetia hmun himlam pana an kal lai hian Boxers ho nen in tawngin Jonathana te ho chu an sawisa ta hrep a, Jonathana pawh nasa takin an vua a, Pathian venhimna mak tak changin an vawhlum lo hram a ni. Hetia an buai hrep hnu hian Moslem khuaah inhumhimna an hmu thei ta hram a. Hun engemawti chen Moslem khuaa an awm hnu hian Hankow-ah an insawn a, heta tang hian Shanghai-ah lut lehin buai a reh theih mai loh avangin Shanghai atangin Canada-ah an haw rih ta phawt a ni.

            Canada rama a haw leh hnu hian a hliam tuar leh Boxer Rebellion chhuah hma lawka a fapa a sun rilru nain a bawh buai em em a, chu a chhapah Canada rama Kristian te chu khawvel lamah an lo tlan nasain an thlarau dinhmun a hniam hle a ni tih te a hmu a, chu chuan a rilru a tina hle. Chutih rual chuan a fa pali lai maite ruang zalhna leh thlaraubo a nuai a nuai chuang chhanchhuah ngai la awmna China ram chu thlahthlam thei niin a inhre bawk si lo. Tichuan a hma aia nasa zawka Pathian ram zauh turin kum 1901-ah chuan China ramah a nupui fanaute nen an let leh ta a ni.

            Hemi tuma China rama a let leh hian Honan hmar thlang lam tuam a tum ve thung a, Pathian thu hril dan kalphung thar a duang a. Rawngbawla hmun pakhata kala mission station \-a haw let leh ziah chu buaithlaka a hriat avangin a chhungte chu rawngbawla a vahchhuahna apiangah a hruai ta zel a. Hmun pakhatah thla thum zel te awmin an insawnna hmunah chuan a nupui Rosalind-i chuan in lamah theih tawpin rawng a lo bawl a, chutihlai chuan Goforth-a leh a thuihhruai te chuan an inkulhna khua leh a chhehvelah te rawngbawlin an vak chhuak thin a ni. Hetiang hian kum 3 chhung hmun hrang hrangah an zin kual (Missionary Tour) a, a hlawk thlakin thlarau bo tam tak an chhanchhuak a ni.

            Kum 1904-ah Charles Finney-a’n Harhna a lo thlen theih na tur atana thil tih makmawh nia a hriat te a ziah chhuahna lehkha a dawng a. A han chhiar a, tha a ti hle mai. Charles Finney-a chuan Thlarau Thianghlim harhtharna thlen tir dan chipchiar takin a sawi a, chu chu a dik leh dik loh Goforth-a chuan fiah a duh ta. Hetih lai vek hian Welsh ramah harhna nasa tak a thleng bawk a, chung chuan Goforth-a chu a ti phur hle. Chungte avang chuan harhna China leh a chhehvela a lo thlen theihna turin nitin zing dar 5-ah a tho a, Bible-a thlarau thianghlim lampang inziahna apiang chu nguntakin a zir a, nasa takin a tawngtai thin bawk a. Chu chuan amahah hlawkna a pe nasa hle.

            Kum 1907ah amah tirtu  Canadian Presbyterian Mission-a Foreign Mission Secretary R.P. MacKay rualin Korea-ah a zin a. Hetih hunlai hi Korea rama harhna nasa tak a thlen lai a lo ni hlauh mai a, tisa leh thlarauah Goforth-a chuan a hlawk phah hle. Korea atanga an haw hnu chuan Manchuria Mission Station-ah Korea ram harhna chanchin chu a report a. Hemi hnu hian amah chu Manchuria-a rawngbawlna nei tura sawm niin phalna a hmuh hnuah Manchuria-ah chuan rawng a bawl ta a. Mipui sang tam tak hmaah thusawiin thlarau bo tam tak Krista hnenah a hruai a ni. Hemi hnu atang hi chuan China ramah Goforth-a hi Evangelist lar tak nia hriat a hlawh chhoh phah ta a ni.

            Kum 1908 atangin Honan Presbytery-in China ram a duhna apianga rawngbawl thei turin phalna a pe a, tichuan hmun hrang hrangah zinin rawng a bawl a, Shansi province phei chu a luhchhuak hneh hle. Heng a rawngbawlnaah hian Chinese mi Kristiana inpe tawh te chu Evangelist ni turin nasa takin a hrual a, kum 1912-ah chuan Chinese Pastor pariat lai ordained niin, kum 1909-a Presbytery of Chinese din anih theih nan pawh a thawhhlawk hle.

            Kum 1915-ah a zir thinna Knox College chuan Doctor of Divinity an pe a. Hemi hnu hian Yangtze lui dunga China Inland Mission station hrang hrangah rawngbawlin a vak chhuak nasa hle a, a hriselna pawhin a tlak hniam phah hle. China ramah hian Missionary an rawn kal belh zel a, mahse heng missionary te hian inpekna tak tak nei lo leh Chanchin tha puandarh hna chu tih tak takin an thawk lo niin Goforth-a chuan a hria a, Presbytery lamah pawh a sawisel chamchi a ni. Mahse Presbytery lamin heng kohna dawng tak tak lo missionary te chungchangah hian a beng a hup tlat avangin kum 1917 kha Jonathan chuan amah tirtu  Canadian Presbyterian Mission board hnenah banna a thehlut ta a, Board lam pawhin Changte Field-a a mawhphurhna chu an hlihsak ta a ni. Tichuan Kikingshan-ah in an sa a, mahse hmun hrang hranga rawngbawla zinkual chu an nupa chuan an bansan chuang lo.

            Kum 1919-ah Chinese sipai hotu lar tak, Christian General tia an sawi thin Feng Yuhsiang chuan a sipaite zinga rawngbawl turin a sawm a. Heta tang hian Feng-a leh Jonathan Goforth-a te nupa chu an inthiantha ta hle mai a, vawi tam tak Goforth-a hian Feng-a sipaite zingah rawngbawlna a nei chho ta fo a ni.

            Kum 1920 khan Honan leh China hmarlam ram thenkhatah tam nasa takin a tla a. He tam tuartu mipui te chhawmdawl an nih theih nan Rosalind-i chuan khawthlang rama chanchinbu lianah te tam avanga harsatna thleng leh tanpui an ngaih zia thu vawi tam tak a ziak a, tanpuina pawh an dawn that phah hle. Hei vang hian Chinese sawrkar chuan chawimawina, Medal Rosalind i hi an hlan hial a ni. Hemi kum vek hian General Fenga sipai te hnenah leh China chhim lamah rawngbawlin Goforth-a chu a thang a, hetih chhung hian Rosalind-i chuan lehkhabu tha tak tak pahnih Chinese Diamonds for the King of Kings (1920) leh How I Know God Answers Prayer (1921) te chu a lo tichhuak ve bawk a ni.

            Jonathan Goforth-a te nupa hian China ram hi an vei hle mai a, Presbyterian Church of Canada in an rawngbawlna North Honan Field United Church of Canada hnena an hlan hnuin Honan ah hian an thawh zel a rem ta lo va. Rawngbawlna hmun thar zawng chawpin Manchuria lamah an insawn a. Heta tang hian hmun hrang hrangah rawngbawla vakchhuakin Missionary tur tan Training Centre te a buatsaih bawk a. Hetianga rawngbawl chung hian lehkhabu pahnih ‘Miracles in China’ leh ‘By My Spirit’ te chu a ziak bawk a ni.

Jonathan Goforth-a hian cataract vangin kum 1930 khan a mit a zaitir a. An zaihlawhtlin loh avangin kum 1931-ah chuan a mit dinglam chu a del ta a, kum 1933-ah chuan a mit veilam pawh chu a del leh a, khua a hmu thei ta lo. Heti chung hian amah hruaitu Chinese mi ruaiin hmun hrang hrangah rawngbawlna a nei chhunzawm zel a. Hetih lai hian a nupui Rosalind-i hriselna pawh a tlakhniam zel avangin kum 1934-ah chuan loh theih lohna avangin China ram a an rawngbawlna chu an hawsan ta a ni. Hetianga thahnemngaih taka rawng an bawlna hian par a chhuang zel a, Honan Field atanga an insawn hnu ringawtah pawh Missionary station 2 leh Outstation 30 chuang an din hman a, kohhran tam tak dinin amah ngawt pawhin mi 2554 a baptis a ni.

            Canada rama an haw hnu pawhin rawngbawlna hun hmun hrang hrangah mitdel chungin a la nei fan a, amaherawhchu thahnemngai taka rawng a bawlnaah hian a thusawite a duhthawh luatah Kristian nun dazat tawh tak te a khei ngun em avangin kohhran thenkhat chuan Pulpit a thusawi te an phalsak lo hial a ni. Hetih lai hian a hriselna pawh a lo tlahniam zel a, October 8, 1936-ah chuan thlamuang takin a rawng a bawlsak thin Pathian hnena hahchawl turin missionary ropui, kum 76 mi Jonathan Goforth-a chuan he khawvel hi a chhuahsan ta a ni.

Goforth-a hian kum 5 mi anih laiin Pathian a hmelhriat a, a thihni thlengin a rawng a bawl a. Kum 46 zet Pathian rawng a bawl chhung hian Mission station 30 chuang China ramah dinin Chinese mi 61 zet Pastor atan a chherchhuak a, Kohhran engemawzat dinin ringlo mi 13,000 zet Krista hnenah a hruai bawk.