Gilbert Renthlei

Father of Modern Revivalism

CHARLES FINNEY

Tun tumah chuan Second Great Awakening hunlaia hruaitu ropui, “Father of Modern Revivalism” an tih Charles Finney-a chanchin ve thung aw!

                Second Great Awakening : Second Great Awakening hi kum zabi 19-na tir lama America rama Kristiante zinga harhtharna nasa tak lo thlen tum hnihna kha a ni a, hetih hunlai hian mi tam takin piantharna an chang a, kohhran a thang lian a, chutih rual chuan kohhran hrang hrang Seventh Day Adventist, Mormon kohhran, Church of Christ leh a dang tam tak a lo piang a, Baptist leh Methodist kohhran pawh nasa takin a than phah a ni. Hei hian nghawng chhuah tam tak a nei a, American Civil War pawh kha a nghawng chhuah tih theih niin nghawng tam tak a nei a, American History-ah phei chuan hmun pawimawh tak, he Second Great Awakening hian a luah a ni. Hetih hunlaia mi pawimawh leh a hnarkaitu langsar zualte chu Joseph Smith, Alexander Campbell, Richard Allen, Nathaniel William Taylor, Ellen G. White, Peter Cartwright, Thomas Campbell leh Charles Finney-te hi an ni awm e!

                Harhtharna hnarkaitu bera an sawi thin Charles Finney-a chanchinin i chhunzawm dawn ang.

                Hun hmasa lam: Charles Finney hi Warren, Connecticut, US-ah Aug 29, 1792 khan a lo piang a. An unau hi sawm leh panga lai niin a pa hi loneitu a ni. Kum hnih mi lek a nih laiin Oneida County-ah an pem a, hetah hian zirna bul pawh a tan ve naw naw a ni. Kum 20 anihin New Jersey-ah High School a kal zawm a, hetih rual hian zirtirhna a thawk bawk a, Latin, Hebrew leh Greek tawngte pawh a zir a ni. Finney hian lehkha zir sang lo mahse amah hi feet 6 leh inchi 3 laia sang niin mitmeng rum tak mai a pu a, music a thiam bakah leadership quality tha tak mai a neih miau avangin hriat a hlawh hle thin.

                Piantharna kawng: Dan hremi nih a chak thei em em a, kum 1816 khan Adams, New York-ah dan lam a zir ta.  A inzirchhuah hnuin Adams khuaah hian dan hremi hna a thawk ve ta a. Hetih lai hian dan lam a hriat zau belh zel theih nan lehkhabu hrang hrang a chhiar nasa hle thin. Chung a lehkhabu chhiar zinga a bih ngun ber pawl chu Blackstone’s Commentaries on Law chu a ni a. he lehkhabuah hian a ziaktu Blackstone-a hian Bible chu a dah pawimawh hle a, Bible hming a ziak lang ngun hle. Hetih hunlai hian Finney-a hian Kristianna a hmelhriat lova, Bible phei chu chhiar pawh a chhiar ngai lo. Mahse a lehkhabu rawn ber Blackstone-a lehkhabu-a Bible thai lan a nih ngun em avang chuan Finney-a pawhin Bible a lei phah ta a, a chhiar a chhiar a, dan ziakna lehkhabu te aimah chuan Bible chu a bih ngun ta.

                Bible chu a chhiar a chhiar a, simna leh chhandamna chungchanga a hriatthiam loh te chu an khua Adams-a Pastor pakhat hnenah a zawt zel a, tawngtai te pawh zirchhoin a rukin a tawngtai chho tan ta. Bang awng atangin a tawngtai lai an lo bithlaru ang tih ringawt te chuan a tawngtai chu a tibnuai em em zel a, midangin Bible a chhiar ani tih an hriat a hlauh em avangin Bible pawh chu a lehkhabu karah a thukru tlat thin. Mahse chuti chung chuan chhandamna chungchang hriatchian a chakna chuan nasa takin a thinlung a nawr a, a chhungril chu a tuihal huam huam si.

                Chutianga nun tuihal taka a awmlai chuan kum 29 mi Charles Finney-a chuan October 10, 1821 khan a beisei Pathian hriat tumin a chenna Adams khaw daifem ramhnuaiah chuan a vak chhuak ta. Chu ramhnuai thing tam tak zingah chuan a thingthi rap a, a rilruin, “Ka thinlung zawng zawng Lalpa hnenah ka hlan ang a, amah ka zawn hmuh hma chu he ramhnuai atang hian ka let leh tawh lo vang,” tiin a intiam a, a thiam ang tawkin a tawngtai ta malh malh a.

                Darkar engemawzat a tawngtai hnu chuan a Office-ah a let leh ta. Chuta tang chuan muanna maktak maiin a thinlung chu a luah ta veng veng mai a. A hnua ama sawidanin, “Khatih hunlai khan Thlarau Thianghlim chu ka taksa leh ka thinlungah a kaltlang hian ka hria a. Electric current in mi a man ang mai hian keimaha Thlarau Thianghlim kaltlang chu ka hre thei a ni. Pathian hmangaihna chuan tui angin ka nun a luan fai a, kawngdanga han sawifiah vak ngaihna pawh ka hre lo,” tiin a sawi.

                Rawngbawlna lamah: Hetia a pianthar tuk hian Dan hremi anih angin a Office-ah thubuai a sawifel saktur nen chuan an in hmu a. Mahse Finney-a chuan a client (thubuai neitu) hnenah chuan, “Ka pu, Lal Isua Krista chuan a thiltum tihhlawhtlin a nih theihna turin mawhphurhna min pe tawh a, nang chu ka buaipui thei tawh lo ang che,” tiin a hrilh ta a, tichuan he khawvela thubuaite sawifel hna chu bansanin Krista Chanchin Tha puang zawk turin a nun chu a pe ta a, tihian aman a sawi,

                “Dan hremi nih thlakhlelhna pakhatmah ka nei tawh lo. Ka rilru zawng zawng chu Isua leh a chhandamna chungchangah a awm a, khawvel thlakhlelhna ka nei tlem hle. Thlarau bo krista hnena hruai tluka thlakhlelh ka nei lo a, he khawvel boral meka Isua Krista thu puandarh tluka hna duhawm tih ka nei lo,” tiin.

                Charles Finney hian a pianthar tirh hian Calvinistic Doctrine (thlan bikte hnenah chauh chhandamna) chu hnawlin Pathian chuan sual sim tupawh khawngaihna avangin a chhandam thei tih a pawm a, inchhira inlamlet duhin sual sim a thlang ang bawkin misual chuan sual a thlang tih chu a ngaihdan a ni.

                Hetia a pianthar hnu hian Pathian rawngbawl turin Rev George Gale-a hnuaiah a inbuatsaih nghal char char a, a hranpain Pathian thu a zir lo. Heti chung hian amah a inzir nasat em avangin Pathian thu sawi phalna kum 1823 khan pek a ni a, kum 1824 khan Presbyterian Kohhran a ordained ta a ni. Ordained a nih hnu hian New York hmar thlang lamah missionary hnathawk turin Female Missionary Society of the Western District in an chhawr angin a thawk chhunzawm ta.

**

Female Missionary Society of Oneida County-in hna thawk tura an chhawrna hmun New York hmar thlang lam hi Calvinistic zirtirna ruh tak hluarna hmun a ni a, mahse Finney-a thuhril dan erawh chu a tluang tlamin a thusawi ngaithlatute chu inhawng tak leh langsar taka Krista pawm ngam turin a ngen thin a. A sermon sawite chu Pastor thusawi aiin dan hremiin rorelna hmaa thiamthu a sawi hi a ang zawk mah thin niin an sawi.

                Heng a thusawi dan phung te hi khatih hunlaia Pathian thu zirtirna nena tehkhinin a danglam em avangin ngaihven a hlawh a, chutih rualin sawiseltu pawh an tama, amah thah tum hial leh haw em em tu pawh an awm phah a ni. Chutih rualin khaw hrang hranga a rawngbawlna chuan rah tha a chhuah nasa em em a, mi tam takin Krista an neih phah a, amah pawhin a hmingthat phah hle.

                                Kum 1825 atang hian a rawngbawlna chuan par a chhuang tan a, thlarau thianghlim harh tharnain a zui zel avangin New York leh a chhehvelah  rawngbawlin a tei kual reng a. Calvinistic Doctrine ang lo taka a zirtirna chu pawm nuam an tih ava

                Charles Finney hian New York leh a chhehvel khaw hrang hrang Utica, Troy, Philadelphia, Reading,  Lancaster etc-ah te rawngbawlna kum 1830 thleng khan a nei a. Hetih hunlai hian a rawngbawlnaah tihdan phung hran deuh “New Measures” tia koh chu a hmang thin a. Chu chu inkhawmnaah hmeichhia te tawngtai turin a ko chhuak thin a, tih Methodist ho tihdan ang deuhin Biakin lam tualah , chhandamna mamawh ngawih ngawih nia inhriate thutna na turin thutthleng bik a dah a, tin a tawngtai pawhin tawngkam zahawm pui pui hmang hran loin tawngkam pangngai tak a hmang mai thin a. Heng te avang hian mi thenkhatin an ngaithei lo va, a chungchang hi kum 1827 July thlaa New Lebanon Conference-ah ngaihtuah a ni ta nghe nghe a ni.

Hemi hnu hian Rochester khuaah insawnin he khua, nawmsipbawlna hrang hrang leh Industry lian tak tak awmnaah hian rawngbawlin a lut leh ta a ni. Rochester khuaah hian Finney-a chuan khawtlanga mi thiltithei deuh chin, doctor, sumdawng, dan hremi leh khawtlang hruaitute hnenah rawngbawl hna a thawk hmasa a. Chu chuan mipui nawlpuiteah nghawng nei nghalin Finney-a rawngbawlna avang chuan Rochester khua chu harhtharlehna in a tuam a, mi zawng zawng deuh thawin piantharna an chang a, “American History-a Thlarau Thianghlim harhthar lehna thlen nasat ber tum” tiin he hun hi sawi a ni thin. Rochester khuaa rawngbawlna a huaihawt thin lai hi chuan dawr zawng zawng deuh thaw a inkhar thuap zel a, dawr kawngka ah te chuan anmahni dawr tum tute chu Finney-0a rawngbawlna chhim ve tura ngenna an tar hial thin a, Police lam te pawhin hetih hunlai hian suahsualna (crime report) chu hundang aiin a thleng tlem zawk hle niin an chhinchhiah. He harhtharna thlipui tleh in a nghawng atang hian hla lar “Chatuan Lungpui Aw Krista” tih hi Thomas Hastings-an a phuah chhuak nghe nghe a ni.

                Rochester leh a chhehvela rawngbawlna a neih zawh hnu, kum 1832 khan Charles Finney-a hi Chatham Street Chapel-a Pastor hnathawk tura sawm a ni a. Chu sawmna chu pawmin Pastor hna chu a thawk chhunzawm ta. Hetih lai hian lehkhabu pakhat Lectures on Revivals of Religion chu a ziak a, hei hian a hmingthanna a belhchhah rualin amah sawiseltute pawh a ti pawngpawrh hle a, Princeton Seminary-a thawk Professor Charles Hodge-a phei chuan a sawisel nasa hle. Hemi hnu atang hian  Presbyterian kohhran zirtirna leh a ngaihdan inpersan deuha a hriat avangin Presbyterian chu a chhuahsan ta a, kum 1834 khan amah zuitu ten kohhran an din Broadway Tabernacle- enkawl turin a insawn ta a ni.

                Kum 1835 khan Oberlin Collegiate Institute-ah Theodore Dwight Weld-a rawtna anga Theology lam zirna hawn ani a. Oberlin Institute din thar leh theihna atana sum tam tak thawhtu, Silk hmanga sumdawng hausa Arthur Tappan-a sawmna angin Oberlin Collegiate Institute-ah hian Proffesor hna a thawk tan a, Broadway Tabernacle nen kawpin Systematic Theology leh Pastoral Theology subject-ah Professora ni.

                Hetianga Broadway Tabernacle leh Oberlin College-a a hna thawh kawp reng chu buaithlaka a hriat avangin kum 1836-ah Broadway Tabernacle chhuahsanin Oberlin-ah chuan a inbengbel nghet ta a. Kum 1837 atangin Oberlin khuaa kohhran, First Congregational Church of Oberlin-ah Pastor hna a chelh zui a, hetih rual hian Oberlin College Board of Trustees member kum 1937 atanga kum 1835, Oberlin President-a thlan a nih thlengin a ni bawk a ni. President anih hnu hian khawtlang nun siamthat lamah nasa takin hma a la zui a, amah hi sal chhuah zalen duh pawl (abolitionish) a ni a, Sal chhuah zalenna kawngah Oberlin College hi a hmang tangkai hle. Vawi tam tak sal chhuah zalen tul zia a tlangau pui a, pulpita a sermonah te a zep tel thin a, heti chung hian hmun hrang hrangah rawngbawlna neiin a vakchhuak thin a ni.

                Finney-a hian a rawngbawlna atanga piangthar, hnungtawlh leh ta te a hmuhin a rilru a na hle thin a. Hei vang hian a hma chiaha Oberlin College President Asa Mahan nen doctrine thar Christian perfectionism (Kristiante kan tha famkim thei ani tih rinna) chu an duang a, hei hi a rawngbawlnaah a tlangau pui zui bawk. Hetih lai hian mipui lamin he Christian Perfectionism doctrine hi an hriatthiam loh avang erawh chuan hemi hnua Rochester leh Boston-a a rawngbawlna chu a hlawhtling lo hle. Chutih laiin a rawngbawlnaa puibawmtu tangkai tak leh a nupui hmasa ber Lydia chuan Dec 18, 1847-ah a thihsan zui a,. Finney-a hian a tuar hle.

                A nupui thih hnu lawk hian Finney-a hian Rochester khaw hmeithai pakhat Elizabeth Ford Atkins chu nupui atan a nei leh a, Elizabeth-i hi hetih lai huna hmeichhia te dinhmun chawikan na atana hmalatu pawimawh tak a ni chho ta nghe nghe a ni.

                Oberlin-a a thawh hnu hian Finney hian tum hnih lai England tlawhin hmun hrang hrangah rawngbawlna hlawhtling tak tak a nei a, mi tam tak Krista hnenah a hruai a ni. England a zin hnuhnung zawk hi American Civil War chhuah dawn lai kha a ni a, rawngbawlna lama a inhman nasatna chu a taksa pawhin a tuar a, heta tang hian a hriselna chu a tlahniam chho ta.  Charles Finney-a hian a hun tawp thleng Oberlin College-ah hian hun a hmang a, kum 15 chhung President nihna a chelh a, hemi chhung hian lehkhabu tam tak a ziak bawk. Kum 1864-ah a nupui pahnihna Elizabeth chuan a thihsan a, kum 1864-ah kum 74 mi niin a nupui pathumna atan Rebecca Rayl a nei leh a. Hemi hnu hian thian thenkhatte rawn angina rawngbawlnaa a thusawite chu ziaka dah hna kum 1868 atangin a thawk ta a. A kum lo upat chhoh zel avangin kum 1872 khan First Congregational Church of Oberlin-a Pastor a nihna atangin a chawl ta a, a rawngbawl chhung hian mi nuai 5 chuangin piantharna an changin August 16, 1875 khan Pathian hnena chawl tawh turin a thi ta a ni