Gilbert Renthlei

NBA KRISTIAN PLAYER

JEREMY LIN

Basketball hi Mizo thalaite zingah pawh a lar chak chho hle a, chumi rual chuan khawvela Basketball League Tournament lar ber NBA pawhin Mizo thalaite en a hlawh ta hle mai. Tun hnaia NBA-a a chet that em avanga lar ta em em amah atchilhna tawngkam thar ‘Linsanity’ hial an chherchhuahna leh Kristian anih zahpui lo va khawvel hmaa puangchhuaktu Jeremy Lin-a chanchin i han bih dawn teh ang.

            Jeremy Lin hi Taiwanese thlah niin Los Angeles-ah August 23, 1988 khan a piang a, a pa chu Lin Gie Ming niin a nu hi Shirley Lin a ni. A nu leh pa te hi kum 1970 chho vel khan Taiwan atangin US-ah an pem a, hmun hrang hranga awm kualin Jeremy pawh hi Los Angeles-ah piang mahse a naupanlai hun a hmanna chu Facebook Office pui ber awmna Palo Alto, San Francisco-ah a ni.

            Basketball Player ni tur hian san hi a pawimawh ve pakhat a, Jeremy Lin pawh hi Feet 6.3 laia sang a ni. Mak angreng takin a nu leh pa te hi chu Feet 5.6 ve ve a sang chauh an ni lawi a, mahse a nu te chhung lam hi feet 6 hawl an awm thuau avangin an ni lam hi a chhun niin a lang. Jeremy-a te unau hi mipa vek niin a pa hian an khuaa YMCA Centre-ah a tet lai atangin Basketball khelh a zirtir thin a, hei vang hian Jeremy pawhin Basketball-ah a tui phah hle. A nu Shirley hian an khua Palo Alto-ah National Junior Basketball Programme kalpuiin a fapa pawh hi a khelh tir ve a, a lehkha zir tibuai lo thei ang ber turin a fapa hi a tuina lamah a kal tir a ni.

            A pa in a tuipui ang ngeiin Jeremy-a hian Basketball lamah talent a nei tha hle mai. High School basketball-ah hnuhma tha tak tak a hnutchhiah a, chutiangin College lamah pawh. High School a kal lai hian Palo Alto High School aiawha khel thinin Nothern California Div II Player of the Year te a ni ve zak zak tawh a. College level-a a kaisan hnuin a khelh chak em em thinna University of California leh Stanford-ah te khelh a dil ve tan a, mahse a hmun chan chu Havard University leh Brown University-ah chauh a ni. Hetianga college kalna (Basketball team-a khel pahin) a zawn lai hian Havard University Basketball Team Assistant Coach Bill Holden chuan July, 2005 khan he tlangval hi hmuchhuakin a mi zawn ang ngei, Feet 6.3 a sang leh Basketball khel thiam tak a ni tih a hria a, zirna lamah pawh High School chu 4.2 Grade Point Average (US-a mark an inpekdan) laia a passed tih a hriatin Havard University-ah a lut thei tih a hria a, tichuan Havard-ah chuan a senglut ta a ani.

            Havard-a a luh hnu hian sawm anih ang ngeiin an College Basketball Team-ah hmun a chang nghal a, mahse player nawi ber pawl a ni rih. A tum a ruh a, a taihmak em avangin level sang zawk a khelh tirh chuan nawi viau mahse hma a sawn chak hle thung a. A bul tan kum hian North America-a College pariat inzawmkhawm Ivy League-a second division team–ah telh a ni ta tho va, a hnu lawkah First team-ah hmun a chang chho zui ta a ni. Havard University tana a khelh chhung hian record ropui tak tak siamin an team tan player tangkai tak a ni a, Point a score theiin kawng tinrengah a tangkai a, College Basketball coach ho chuan an it hlawm hle mai. Havard atang hian Economics-ah degree la in kum 2010 khan a Graduate ta a ni.

            NBA lamah: A graduate hmaa Portsmouth Invitational Tournament-a khel tura sawm anih tum khan Sport Agent Roger Montgomery nen an in tawng a, a thiam em avangin Montgomery pawh hian NBA club hovin khel tura an sawm a ring a, mahse a ring dik lo. Mahse vanneihthlak takin Lin hian kum 2010 khan NBA team lar tak Dallas Marvericks ho camp zawm ve tura sawmna a dawng hlauh mai a, NBA Summer League-ah khel tura sawm ni zuiin hemi tum pawh hian a che tha leh hle a, tantu leh au phurtu a ngah hle. He Summer Games an khelh zawh atang hian NBA Team lar tak tak Dallas Marvericks, L.A. Lakers leh Eastern Conference team thenkhat bakah Golden State Warriors ten contract ziahpui atan an sawm ta nghal luai luai mai a ni.

            Hetianga sum tam tak hlawh tura contract ziahpui an tum lai hiam Lin hian hlawh tlem zawkna Golden State Warriors tana khel turin Contract a ziak ta hlauh a, a hlawh hmasa ber chu Dollar 5,00,000 a ni. Hemi rual hian Nike chuan Contract an signed pui bawk a, a jersey pawh chu NBA game a khelh hma hauhin hralhchhuah a ni nghal a, Golden State Warriors hi thleng sang lu lo mahse hemi kum hian Lin hian a khel chhe lo hle a, hma a sawn chak em avangin khawvel leh NBA entu te zingah hriat a hlawh chho ta hle.

            September 2011-ah a chawlh chhungin Chinese Basketball Association  club Dongguan Leopards tan ABA Club Championship-ah loan in a khel a, hemi tum hian MVP-ah thlan a ni nghe nghe. Hemi tum hian Shanghai Sharks  neitu leh NBA Player hlui Yao Ming chuan an club a khel turin a sawm nasa hle a, Italy lama club pawhin sum tam tak hlawh turin an sawm bawk a, mahse Warriors player a la nih avangin hei hi tihhlawhtlin a ni ta lo a ni. Hemi hnu hian rei lo te chhung Houston Rockets-ah a khel leh a, hming chherna em em a nei hman lo

            New York Knicks: Dec 27, 2011 khan NBA club lar New York Knicks chuan an player Toney Douglas leh Mike Bibby te pui turin Lin-a hi an club-ah an la lut a, Knicks tan hian a khel tam lo va, a hnu lawkah D-League club Erie BayHawks lamah loan-a hawh chhuah leh a ni. Hetah hian a che tha bawk a NY Knicks chuan an ko leh a. Hemi tum hian khelhna hun tha a changlo ang tih a hlauh avangin an club Chaplain chu tha zawka a inkhelh theih nan a in tawngtai tir a ni.

            Hetia a rawn let leh hnu hian Lin-a hi a che tha chho nghal hle a, New Jersey Nets an khelh tumin point 25 a score a, a team a chak pui a, Utah Jazz nen an inkhelh tumin point 28 a score leh a, a chakpui leh a, Basketball game zirchiangtu te chuan an duhin an ngaihven tan hle. Feb 10-a Los Angeles Lakers nen an inkhelh tum phei chuan Basketball player lar ber pawl Kobe Bryant ai pawha score tamin point 38 lai mai a thun a, hemi hnu hian Eastern Conference Player of the Week atana thlan a ni.

            A lar tak hluaina game Feb 14, 2012-a Toronto Raptors nen an inkhelh tumin huntawp lam second hnih khat lek la awm tihah hla tak mai atangin an chakna basket(goal) ring chhungah a han vawmlut thaih mai chu, mipuiin ‘Linsanity’ tiin an au rual dual a, khawvelin he player hi a hmelhriat ta a, ngaihven a hlawh a, chanchinbu lian leh news reporter hrang hrangin an bawr ta luai luai mai a ni. Hemi hnu pawh hian a chetha chho hle zel a, game tinah point 20 aia tam a thun deuh ta ziah a, a chanchin chu chhuah nuam an ti ngei mai.

            Kristian tlangval: Internet lama Jeremy Lin chanchin han zawn chuan Kristian rinawm leh ringtu tha, a rinna zahpui lova puangchhuak thin anih thu leh a testimony sawina video tam tak hmuh tur a awm. A naupan lai atangin a nu leh pa te hian Biak inah an inkhawm pui ziah thin a, High School a kal laia piangthar niin a pianthar hlim hian a nun pum kaihruai turin Pathian a dil a ni.

            Heti hian a sawi, “Ka pianthar hnu hian Pathian chu keimahah a rawn in puangchhuak zel a, amaha rinna nghah dan tur leh ka tih ve tur pawh ka thliar hrang thiam chho zel. Kan inkhelh reng rengin ka nundanah Pathian hmel a lang em? Pathian mi ka nihna angin midang ten ka nunah Krista hmel an hmu em? Ka thil tih hi Pathian duh zawng a ni em tih chu ka inzawt a, Pathian duhdan leh Pathian hmel lan tir turin awm ka tum reng thin,” ti a sawiin “ Ka nu leh pa te hian Pathian ropui nana inkhel turin min chah fo a, mahse Pathian ropui nana khelh chu a awmzia ka hre ngai lo. Mahse tunah chuan ka hrethiam ta, Basketball ah chauh lo pawh kan ni tin hnathawh leh kan nitin nun hi Pathian ropui nan kan hmang thei a, midangte hnenah Pathian ropuina hi kan lanchhuah tir thei a ni,” tiin Jeremy Lin chuan Victorious-christian-life.com a hrilh.

Ni, Jeremy Lin hi Kristian chhungkua atanga seilian a ni bawk a, Kristian tha tak, tawngtai thlahthlam ngai lo mi a ni.  Lehkha a zir lai hian a chak ber thin chu Pastor nih a, hlawkna um lo, khawvel huapa rawngbawltu pawl din a, khawpui chhung leh pawn a naupang chanhai te tanpui a ni. Havard University-a a luh lai pawhin Asian American Christian Fellowship-ah hruaitu a ni thin.

            New York Knicks player a nih a a chet that avanga a lar chiam tak hnu hian khawvelin Kristian tha a nihna hi a hmuh hmaih lova, milar tak tak te pawhin an chhuang hle. Boxer lar Manny Pacquiao chuan March 27-a GMA Studio 7, Philippines-a Bible Study a neih tum pawhin Jeremy Lin-a chungchang hi sawichhuakin “Engvangin nge Boxingah Manny Pacquiao, American Football-a Tim Tebow, Basketball-ah Jeremy Lin te hi a dah? Pathian hian milar tak tak te hi a thu puangdarh turin min duh a, midang ten keimahniah a hmel hmu se a duh vang a ni,” tiin a sawi.

            Hetianga a larchiam avang hian social networking site lar tak Twitter-ah pawh a lar phah hle a, Asian mitzim anih vangin hmuhsitna pawh a tawk nasa a, ‘Chink’ (Asian te hmuhsitna tawngkam) tia kohna pawh a tawng nasa hle. A khelhna team New York Knicks-in Portlkand Trailblazers 121-79-a an hneh tum khan Lin hian point 6 chauh a score a, hemi hnu hian mi tam takin amah tih elhsen nan Twitter lamah ‘Chink’ tiin thu bawlhhlawh pui puiin an chhu zui a, mahse Lin chuan hetianga Tweet tu te hi ‘Unaupa, Isua’n a hmangaih che a, keipawhin,” tiin a chhang let leh vek a ni. Hetianga amah hmusittu pakhat chuan “Jeremy Lin hian amah kan deuna tawngkam na tak te chu dam thluama chhangletin Isua’n min hmangaih thu min hrilh hlauh a, keichuan ‘Chink’ tiin ka koh leh tawh ka ring lo,” tiin a sawi hial a ni.

                  A inkhelh hian banbun ‘IJNIP’ (In Jesus Name I play) tih chuanna a bun ziah thin a. Interview pakhatah chuan Gospel music chauh a ngaithla thin tih sawiin Hillsong ho hla a ngaithla nasa hle tih a sawi. Basketball star dangte ang thovin Hip Hop music a ngaina em em a, mahse HipHop music ah pawh Gospel Hiphop ngat ngaithlain Gospel Rapper Lacrae rap a ngaithla nasa thei hle tih a sawi bawk. A inkhelh dawnin Pathian hla angaithla a, tawngtaina hun a hmang bawk a, chu chuan amahah chakna nasa tak a pe tih a sawi. Pathian tihmi tih takah hmanni lawka a inkhelh hmaa an interview tum pawhin “Engkimah Pathian hnenah ka lawm a ni. Bible in min hrilh angin Pathian hian amah hmangaihtu te chungah an tana tha tur angzelin hna a thawk thin tih ka hria,” tiin a sawi. Tunah chuan milar a ni ta, a inkhelh loh chang hian hmun tam takah thusawi tura sawm a ni thin a, thalaite leh California-a kohhran hrang hrangte zingah a testimony ngaihnawm tak a puangchhuak thin a ni.

            Awle, Kristian tlangval Jeremy Lin-a’n a larchhuahna Basketball a khelhdan chungchang hian ti tawp dawn teh ang

            Zinga ka thawh apiang hian he khawvel atan chauh hian ka inkhel lo va, vana lawmman hmuturin ka khel tih hi ka ngaihtuah chhuak ziah thin. Ka fans te tan ka khel lo va, ka chhungte leh keimah ngei tan pawh ka khel hek lo, Pathian ropui nan a ni ka khelh ni. Miin ka inkhelh dan leh ka nungchang te, fans leh ka khelhpui te ka hmachhawn dan an hmuh hian Pathian hmel leh Pathian hmangaihna an hmuh theihna turin theihtawp ka chhuah thin,” tiin. A va awhawm em! Keini pawhin kan hnathawh leh kan thiltih reng rengah Jeremy Lin ang hian kan nunah Pathian hmel leh a hmangaihna midang te’n an hmuh theihna turin tan i la thar sauh sauh ang u!