Gilbert Renthlei

US PRESIDENTIAL ELECTION 2012

Khawvela ram ropui ber tia chhal ngam USA chuan kum 5 dana an tih thin angin a vawi 57 na atan an ram hruaitu lu ber President thlanna an nei leh dawn ta. Super Power US President hi chu khawvelin a chung en a, khawvel roreltu ang maia thlir anih avangin khawvelin he inthlan hi a ngaihven a, chuvangin keini pawhin Gospel viau lem lo mahse hriatna tihzau belh nan kumin... a neih tur US Presidential Election chungchang leh a candidate te i han bih zau dawn teh ang.

            A hun: US Presidential Election hi November thlaa Thawhlehni hmasa berah neih a ni thin. Hetia ‘Thawhlehni hmasa ber’-ah kher USin inthlan a neih thin nachhan chu tun hma chuan zin veivahna motor, rail, thlawhtheihna etc a la awm lo va, vote thlak tura Polling station pan tur ten ke leh tawlailir hmanga an pan a ngaih si avang leh Kristian deuh vek an nih bawk si avangin Pathianni an inkhawm phawt a, thawhtanniah vote thlak turin an thawkchhuak a, thawhlehniah vote an thlak ta thin a ni. Hetianga kum zali chuang liamtaa an lo tih thin hi kalpui zelin US chuan an ram inthlanpui hi November thla thawhlehni hmasa berah an nei thin a, kumin pawh hian November 6-ah inthlanpui hi an nei dawn a ni.

            US inthlan dan tlangpui?: US President inthlanah khuan Major Party pahnih Republicans leh Democrats ten President hi an inchuh thin a, anni bakah hian party tenau te te Third Parties an tih awm ve thin mahse Third Party candidate te hi chuan vote tam an hmu ngai lem lo. USA President inthlannaah hian “Electoral College” system an hmang a, a awmzia chu USA-a State 50-ah hian an State tet leh len dan azirin Electorial College (Vote) an neih dan a inang lo va, Electoral College 538 awmin, State lian chuan vote an nei tam a, State tein an nei tlem a. (e.g. California chuan vote 55 chuang a nei a, Alaska, South Dakota, Vermont etc chuan vote 3 an nei). State vote hmu tam ber kha President atana thlantlin an ni thin. An President chu “State in an thlang” tihna a ni ber e. Mipui vote hi chu ‘Popular vote” an ti a, popular vote nei tam zawk si a, Electoral vote (state vote) hmuh tlem avanga President tling lo an awm nual tawh.

Tute nge inkhing dawn?: Kum 2008-atanga US President hna chelh tu Barrack Obama chuan Democrat lam aiawhin kumin inthlanah hian President a chuh leh dawn a. Amah khing tur hian Grand Old Party (GOP) an tih mai Republican Party chuan mi hrang hrang atangin Obama khing tur hi vote hmangin an thlang a. State tinah Republican Party te chuan an aiawha vawrhchhuah tur January 3 khan Iowa State atangin an lo thlang tan tawh a, he inthlan hi “caucus or primary” tiin an sawi thin. State hrang hrangah Presidential candidate tura chuhtu te zing atang hian an duh ber Republican party te chuan an thlang zel a, May 8 khan Indiana-ah an thlang zo ta a ni. Tichuan Obama khing tur hian Republican Party chuan vote hmu hnem ber Mitt Romney chu an vawrh chhuak dawn ta a, theihtawpa an campaign hnuah November 6 hian mipui hmangin a tling zawk chu chinfel a ni dawn ta.

US inthlan dan hi a chipchiar erawhin kan sawi hman lo ang. USSR tlukchhiat hnua Super Power ram awmchhuna hotu lu ber tur, kum 2012 US Presidential Election-a Democrats leh Republicans candidate insu tur te buktawnin an chanchin i han bih thuak teh ang.

Barrack Obama:

Ani hi US President tang lai a ni a, US President 44-na niin mihang zinga US President ni hmasa ber a ni. Jan 3, 2005 atang khan Illinois state-ah Senator atan thlan tlin a ni. Obama hi August 4, 1961-ah Honolulu, Hawaii-ah a piang a, a pa hi Kenyan mi a ni. Law Graduate niin Havard Law School chhuak a ni a, Havard-a a zir lai hian Havard Law Review-ah editor a ni a, a hnuah mihang zinga Havard Law Review President hmasa ber a ni ta ngh nghe.

University of Chicago Law School-ah Lecturer hna kum 12 chhung zet a thawk a, hetih chhung hian Board hrang hrang Wood Funds of Chicago, Chicago Annenberg Challenge, Joyce Funds etc ah Board member a ni a, kum 1995 khan a chanchin leh thildang a ziahna “A Dreams from my Father” tih chu a tichhuak a ni.

Kum 1996 ah Illinois State Senator (MLA) atan thlan tlin a ni a. Kum hnih dana thlan thin niin 1998 khan thlan tlin a ni leh a. Kum 2000-ah erawh tling zolovin kum 2002 khan Senator atan thlan tlin leh a ni. Hemi hnu hian kum 2005 khan Illinois state atangin United States Senate (MP) atan thlan tlin leh a ni a, mahse President chuh a tum avangin kum 2008 November 16 khan US Senate hna atang hian a bang ta a ni. Tichuan kum 2008 US Presidential Election-ah a khingpui John McCain hnehin US President 44-na atan lakluh a ni ta a ni.

Sakhuana: Obama nu hi sakhuana lam ngaihsak tak a ni lem lova. A pa leh a pa hrawn te hi Muslim ve ve an ni. A pa hrawn bula Indonesiaa a khawsak lai chuan Muslim school leh Catholic School-ah lehkha a zir thin a, heng sakhua pahnih te hi a hrechiang thawkhat hle. Mahse a ngaihtuahna fim tak hmanga duhthlanna siamin kum 1988 khan mihang kohhran Trinity United Church in Christ, Chicago-ah Baptisma a chang a, he kohhran ah hian kum 20 chuang member a ni a, tunah erawh Camp David-a Evergreen Chapel-ah a lawi tawh thung. Obama thlahtu te lam hi Muslim an nih avangin rinhlehna tam tak a tawk a, mahse Christianity Today-in an kawmnaah Obama chuan, “Keima duhthlanna hmanga Kristian-a inpe ka ni. Kristian diktak ka ni a, ka tana Krista thihna leh thawhlehna hi ka ring a, Krista rinna hian ka sual ngaihdamna leh chatuan nunna min pe thei tih hi ka pawm a ni,” tiin a sawi. Obama hian nupui Michelle Obama a nei a, fanu pahnih a nei bawk.

Mitt Romney:

Sawi tawh angin US Presidential Election 2012-a Barrack Obama khingtu tur hi GOP (Grand Old Party) Republicans lam chuan kumin Jan 5 atang khan mi hrang hrang zing atangin primary or caucus vote hmangin an lo thlang tawh a. Tichuan a vote hmu hnem ber Mitt Romney hi a GOP lam hian an vawrh chhuak dawn ta a ni.

Mitt Romney hi March 12, 1947 khan Detroit Michigan-ah a piang a. Obama zirna Havard Law School atang vekin J.D. (Juris Doctor) zirchhuakin Havard atang vek hian kum 1975 khan M.B.A a zo leh a ni. Business lam timi tak a ni bawk a a zirchhuah hnu lawk hian Bain & Company-ah CEO hna thawk nghalin sum leh pai lama he company lo tluchhe mek khaichhuaktu a tih theih awm e. Tin kum 2002 Winter Olympic thleng tur thlannaah khan Salt Lake City in an thlen theih nan IOC member thenkhat vote nei te tham an ni tih hmuhchhuah a ni a, hei vang hian he Olympic hi sum leh paiah leh kawng hrang hrangin a tlahniam hle a ni. Hetiang dinhmun harsa taka an din lai hian Organising Committe chuan Mitt Romney hi President leh Salt Lake Organising Committee CEO turin an sawm a, he buaina lak atang hian Mitt Romney hian he Olympic hi khaichhuakin tluang taka neih a ni a, a hmingthat phah hle.

Kum 1984 khan Romney hian investment firm Bain Capital a din a, he company hmang hian company dang tluchhe mek te an khaichhuak a, a hlawhtling hle. A hnuah Bain & Company lamah CEO hna chelh turin a company hi a chhuahsan leh a, sum lama an tlukchhiat mek laiin a khaichhuak leh a ni. Hetianga Bussiness Administration lam thiam tak anih avang hian US Economy tluchhe mek tungding tur hian mipuiin an it hle rin a ni. Romney hi mi hausa tak mai a ni hrim a, tunah hian a hausakna hi Dollar million 190 – 250 inkar vel niin chhut a ni a

Romney hian kum 1984 daih tawh khan US Senate thlannaah a lo in candidate tawh a, mahse hemi tum hian Ted Kennedy hneh lovin a tla. Kum 2002 khan Romney hi Massachusetts state Governor atan thlan tlin a ni a. Governor a nih chhung hian a che tha hle. Kum 2008 khan US President thlannaa Republican candidate tur thlannaah Republican nominee nih tumin a chuh ve a, mahse John McCain kha a hneh lo ta a nih kha. Tichuan kumin inthlanpuia Obama khing tur thlannaah a ding leh a, chiang taka tlingin Republicans Presitential nominee a ni dawn ta a ni.

Sakhuana: Mitt Romney hi Kristian a ni a, mahse The Church of Jesus Christ of Latter-day Saints kohhran a ni thung. Latter-day Saints te hi Mormon kohhran tiin koh a ni bawk a, Kristian kohhran pangngaiah chuan ‘kalsual’ ang hi an ni ber awm e. College a kal laiin an kohhran hnuaiah hian France ramah missionary-in a lo han kal zak zak tawh a ni. Hetianga Mormon kohhran anih avang hian President thlannah Kristian ram US hian an iai deuh mai ang tih hi thil hlawuhthawn awm tak nimahse economics a thiamna avang hian sum leh paia America ram tluchhe mek khai chhuak tur hian mipui erawhin an it viauin a rinawm. Kum 1969-ah Ann Davis nen an innei a, fa 5 neiin tu 16 lai a nei.

            Awle, an chanchin tlangpui chu kan hre ta. Inthlan hmasaah khan Obama hian ‘Change’ tih thumal kha a rawn vawrh lar hle a, a tlinpui ta a nih kha. Tun tumah hian ‘Hope’ tih chu a campaign auhla tura khawvelin a ngaih laiin Obama hian “Forward” tih chu campaign slogan-ah a hmang leh dawn a, champion pui leh thei tak ang maw!

            Barack Obama, President a nih chhungin US hi economy-ah a tlahniam a, hna thar siam a tlem bawk si, chubakah Obama campaign auhla pakhat Health Care law “Obamacare” an tih mai hi a taka tihpuitlin theih chiah an ngai mang bawk si lo. Heng te hian Economics thiam Mitt Romney buk an tirit thei a, chutih laiin Mitt Romney-a hi kohhran kalsual member anih avang hian mi tam takin an iai ve thei tho bawk a. An Healthcare, Foreign, Economic, Defense policy etc hrang hrangte an buk tawn ang a, tunge America-in President atan an thlan dawn i lo thlir ang.