JOHN NEWTON
Kristian hla ropui ‘Khawngaihna mak mawi leh duhawm’ tih phuahtu John Newton hi July 24, 1725 khan Wapping, London-ah a piang a. A pa chu Medditerenean tuipui vela sumdawng thin, Lawngpu John Newton Sr. niin a nu chu Elizabeth Newton a ni. A nu hian a naupan laiin nasa takin Kristianna kawngah a hruai a, amaherawh chu kum tam a enkawl hmain July, 1732 khan TB natna avangin a thihsan a, kum hnih hnuah a pa hian nupui dang a nei leh a ni. Hemi hnu hian Essex-a Stratford khuaah lehkha zirin a awm a, hetahhian Latin tawng leh thildang zirin kum 2 chhung a awm. Kum 11 anih atangin a pa chuan tuifinriata a zinaah a hruai tan a, a pain lawng hmanga sumdawnna kum 1742-a a chawlhsan hma khan vawi 12 lai a zinchuak ve hman a ni. Hetianga a pain lawng hmanga sumdawnna a chawlhsan dawn takah hian a fapa John Newton chu Jamaica rama Fu (Sugar Cane) huana thawk turin tirh liam a tum a, mahse lawng lama a lo tui tawh avangin Newton chuan Mediterranean tuipuia sumdawng lawngah hnathawk turin a inziak lut ta zawk a ni.
Hetianga Medditerannean tuipuia sumdawng lawng a zui lai hian chawlh a lak laiin kum 1733 khan Newton hi Royal Navy hnuai HMS Harwich lawnga thawk turin nawr luh a ni a, a pa lawngpu senior leh thil tithei tak avangin Midshipmanship-ah a kaisang thuaia a. Mahse, he lawnga hnathawh hi a tui loh em avangin tlanbo te a tum a, mahse an man leh si avangin nasa takin an hrem a, Midshipmanship atangin Commonshipman-ah a tla hniam nghe nghe. Tichuan he HMS Harwich lawng hian India ram a pan laiin Newton chu Africa khawthlang lama Sal hmanga sumdawnna lawng Pegasus-ah a insawn ta a, he lawng hian Sierra Leon leh a chhehvelah bungrua leh thildang phur lutin chung hmang chuan Africa rama sal te an thlenga, chung chu England leh hmundanga zawrh turin an phur haw thin a ni.
Hetianga Pegasus lawnga a thawh lai pawh hian harsatna hrang hrang a siam ngun em avangin Pegasus lawngpu te chuan West Africa-a sal hmanga sumdawngtu lian tal Amos Clowe hnenah an hnutchhiah ta a. Clowe pawhhian kawl rei lovin Newton chu a nupui Princess Peye hnenah a hnutchhiah leh a. Hetah hian sal dangte ang bawka enkawl niin tihduhdahna a tuar nasa hle a, amah phei chuan hetih hunlai hian ‘Sal te chhiahhlawh’ anih hial thu a sawi nghe nghe. Tichuan kum engemawzat he hmuna hrehawm taka a awm hnu hian kum 1748 khan a pa John Newton Sr. chuan amah zawng turin lawng captain pakhat a tir a, chu chuan Africa rama a awmna Kittam atanga chhanchhuakin England-ah a hruai haw ta a ni. Hetih lai hian apa hi Hudson Bay-a York Fort Governor a ni.
Piantharna: Hetianga Africa khawthlang lam atanga chhanchhuah anih hnu hian England lam panin kum 1948 khan lawng lian pakhat Africa atanga Khawihnun (Beeswax) leh African Sandalwood chikhat Camwood phurtu Greyhound lawng hmangin a haw a. Tuifianriat zau tak maia a lawng chuanna a her mup mup lai chuan thlipui na tak leh tuifawn nasa tak maiin a chuanna lawng chu a rawn nuai a, lawng chhuat chu pawpin chuta tang chuan tui tam tak a rawn lut a, chutianga tui a luh reng chuan lawng chu a pil mai dawn a ni.
Hetih hunlai hian Newton hian a hnathawh avangtein sakhuana lam a ngaihsak lo hle a, mahse chutiang hun manganthlak taka a awm lai chuan a naupan laia a nuin a lohrilh thin Pathian ngei mai chu a auvin mangang takin a tawngtai ta. Mak tak maiin a tawngtai zawh hnu lawkah chuan tui fawnin lawng a tihchet paha bawm lian tak tawlh chuan chu lawng chhuat pawp chu a rawn hnawh ta a, chu chuan lawng chhunga tuilut chu ti tawpin him takin vaukam an thleng thei ta a ni. Hemi tuma a thil tawn leh thawkleh khata a tawngtaina chhana awm chuan Newton-a rilru nasa takin a khawih a. England a thlen leh hnu pawh chuan Kristian lehkhabu hrang hrang leh Bible te a dapkhawm a, tichuan March 10, 1748 khan Kristian rinna pawmin, he ni hi a thihni thleng khan a pianthar ni a pawmin a serh hle thin a ni.Tin, he ni atang vek hian a hmaa a lo chin thin zuin te, pawisa khelh te chu a bansan ta vek a, amaherawhchu sal hmanga sumdawnna erawh a la bansan lo. (A hnua ama sawidanin hetah hian mi piangthar dik tak erawh a la ni lo)
Hemi hnu hian Newton hi Liverpool lamah a pa thianpa Joseph Manesty kawhhmuh angin a insawn a. Liverpool atang hian Guinea leh West Indies vela Sal hmanga sumdawng lawng Brownlow-ah thawkin he lawng hmanga a zinchhuah hmasak ber tumin Khawsik na takin a man a. Khumbeta khawsik natna a tawrh lai chuan a thlarau nun famkim lohna leh a pianthar dan duhthusam lohna te chu a rilruin a chhui let a. Hemi tum hian Krista chu hmu chiang hlein Pathianah piantharna dik tak a chang ta a, hei hi a thlarau nun in her danglamna leh Pathian thlamuanna a chan hmasak berna niin a sawi.
Sal hmanga sumdawnna a chawlhsan hnu hian John Newton hian amahin Latin tawng leh thil dang dang a zir chhunzawm a, kum 1755-1760 chhung khan Liverpool lawngchawlhna hmunah Surveyor of Tides hna thawkin Pathian thu lam a ngaihvenna chu a zual zel a, hetih hunlai hian Church of England hruaitu leh evangelist lar George Whitefield nen intawngin Newton hian George hi a ngaisangin a zui nasa hle. Hetih hunlai vek hian Methodism dinchhuaktu John Wesley pawh hmelhriatin ani pawh hi Newton hian a ngaisang hle a, heng miropuite hnungzui pah hian Latin tawng mai bakah Hebrew leh Greek tawng a zir pah reng bawk.
A hun tam zawk Pathian rawngbawl nana hman duhin maicham rawngbawl hna (minister) a thawk a, hriat pawh a hlawh tan hle. Tichuan Dec 1758 khan Pastor puitling ni turin dilna Archbishop of York hnenah a thehlut a, mahse hnawl a ni. Mahse a beidawng mai lo. A hnuah Bishop of Lincoln chuan Olney, Buckinghamshire-a Pastor puitu (curate) hna chelh turin a la lut ta a, heta a kohhran enkawl hi a thangduangin Biak in pawh tihlen a ngaihphah hial a, Olney mai bakah hian ramchhung hmun hrang hrangah rawngbawl turin a vak chhuak thin bawk.
Olney-a pastor hna a thawh lai vek hian hlaphuahthian William Cowper chu kum 1767 khan Olney-ah hian a rawn pem lut a. Heta tang hian inhmelhriat chhovin rawng pawh an bawl dun nasa hle. Cowper hian Newton chu a rawngbawlnaah nasa taka puibawmin kartin tawngtai inkhawmna regular takin an huaihawt thin a, heng inkhawm apiang hian kohhran mite inkhawmnaa sak tur hla thar an phuah ziah thin. Heng hunlaia an hlaphuah tam tak hian tun thlengin sak a hlawh a, an lar em em a ni.
Olney-a hunrei tak a thawh hnu hian April 29, 1764 khan Deacon nihna pek a ni a, hemi kum vek Jun 17-ah puithiam puitling atan hlankai a ni. Hetih hunlai hian Newton hi a Pastor hna a tlin em avang te, mi rethei a ngaihsak avang leh rawngbawlna kawnga hma a sawn em avangin ngainat a hlawh a, a lar hle bawk. Olney-ah hian kum 16 zet rawng a bawl a ni.
Kum 1779 khan John Thornton chuan Newton hi St Mary Woolnoth-a Rector hna thawk turin a sawm chhuak a, hetah hian a thih thleng a thawk ta a ni. He hmunah hian Newton hi kohhran member rinnaa chungchanga buaina nei te’n an bel nasa in a fuihna an ngaithla thin a, heng zingah hian philanthropist lar Hannah More leh Britain MP William Wilberforce te pawh an tel nghe nghe. William Wilberforce phei hi chuan John Newton-a counselling atanga piantharna a neih tak hnu hian politics chawlhsana rawngbawl hna thawh ve a tum hial a, mahse Newton chuan William Wilberforce hi Politics chawlhsan lova a hnathawhna hmun apianga Pathian rawngbawl zak turin a hrilh a, Wilberforce pawh hian Newton-a thu zawmin MP nihna chu chelh zuiin a hnuah Newton-a thian tangkai tak a ni zui nghe nghe.
Abolitionist Newton: Kan sawi tawh angin tunhma chuan John Newton hi Sal hmanga sumdawnnaah thuk takin a inhnamhnawih thin a, a pianthar hnu pawhin kum engemawzat chu sal hmanga sumdawnnaah hian a la inhnam hnawih a ni. Hei vang hian mi tam takin a der maia Kristian niin an ngaih phah a, mahse amah vekin hei hi sawifiahin a pianthar atanga kum 9 chhung, sal hmanga sumdawnnaa a inhnamhnawih lai khan piantharna dik tak a nei lova, mahse a hnua a pianthar tak tak hnua Pathianin Stroke natna avanga a kaihharh hnu kha chuan Sal hmanga sumdawnna hi a bansan chiang hle a, a huatin a hua a, a do zui a ni ta ber mai.
Sal hmanga sumdawnna a bansan atanga kum 34 a liam leh hnu, kum 1788 khan sal hmanga sumdawnna chungchanga a ngaihdan ‘Thoughts Upon the Slave Trade’ pamphlet chu tichhuakin he lehkhaah hian Sal hmanga sumdawnnaa a inhnamhnawih laia a thil tawn chungchang lungchhiatthlak tak tak te chu a ziak lang a, tin sal te hnena ngaihdam dilna leh sal hmanga sumdawnna tih tawp a tul zia thu te a ziak a. He lehkha hi mi hrang hrang hnenah leh British Parliament-a MP tin te hnenah sem niin a thuzuak hian mi thinlung a hnen em avangin chhut nawn chhut nawn a ngai hial a ni.
Hetianga a hmalaknaah hian a hmaa kan lo sawilan tawh MP William Wilberforce nen nasa taka tang tlangin hma an la dun a. Dodalna hrang hrang karah sal hmanga sumdawnna controll na dan Slave Trade Act 1807 chu passed a ni ta a ni.
Hlaphuah lamah: A hmaa kan sawi tawh angin Olney-a curate hna a chelh lai khan hlaphuahthiam William Cowper nen an inkawp fuh hle a, a ni nen hian Pathianni inkhawm leh kartina tawngtai inkhawm an huaihawt apiangin hla thar zir tur an phuah duh thin a ni. Heng an hlaphuah te hi kum 1779 a Olney Hymns tih buah an dah zel a, a bu hmasa berah hian Cowper-a hla 68 leh Newton-a hlaphuah 280 te dah a ni.
Khawngaihna mak mawi leh duhawm: Olney Hymns ami ‘Khawngaihna Mak Mawi leh Duhawm’ tih hla hi chung a hla phuah tharte zinga pakhat niin, a thinglung in-hlanna ril tak leh a rilru inthununna chak tak hmanga December thla nawi, 1772 kuma a phuah zawh a ni. A tirah chuan a hla hming hi ‘Faith’s Review and Expectation’ (Rinna Thlirletna leh Beisei-na) tih hmangin kum 1773 kumthar ni inkhawmnaa sak atan a hla thu pawh tawngtai hla taka duan a ni. Newton hian 1 Chronicles 17:16-17 chhiarin ama nun ngei chu Davida thu hmanga a thlirlet leh chuan, tuipuia a zin kual laia a nun khawlo tak te, inthlahdah nun leh sal hmanga sumdawnna te a tlansan tak atanga a lo thlen thui tawhzia a ngaihtuah a. Israel Lal Davida ang khan, Olney pastor chu Pathian thatna mak tak leh a ropuina chuan a fan hneh em em mai a. Chutih lai chuan Kristian hla lar leh chuai thei lo, a kuthnu hmingthang ber lo ni tur chu a phuah chhuak ta a ni. Kum 1835 khan Faith’s Review and Expectation’ hi America-ah ‘Amazing Grace’ (Khawngaihna Mak) tih hming puin a thluk siam a ni.
Rawngbawlna leh hun tawp lam:
A rawngbawlna Pathianin England tuipui kam atangin Australia Botany Bay thleng a tizau va. Evangelical Kristian insuihkhawm “The Eclectic Society” hruaitu lu ber a ni bawk a; September ni 23, 1786-ah ama dilna Rev. Richard Johnson-an a remtihpui ang chuan, lawng sipaite chaplain ni turin a inpe leh ta zel a. A hun hnuhnung chu Australia lamah rawngbawlin a hmangral ta a ni. A lehkhabu ziah hmasa, ama chanchin testimony “Authentic Narrative” chuan vawiin thleng hian mi tam tak nun tihdanglam nan leh siam thar leh nan Pathianin a hmang nasa hle a. Tin, “Thoughts on African Slave Trade” lehkhabu a ziah pawh chu Pathianin a hmang em em a; hei zet hi chuan a zirtir William Wilberforce-a (M.P.) chu, sal tihban a nih theihna tur thuah, huaisen leh rinawm taka campaign-na kum 20 a neih hnuah kum 1807 khan British awp ram zawng zawng tan hlawhtling taka parliament thuchhuahtir thei turin a lo buatsaih reng hi lo niin!!
December ni 21, 1807ah kum 82 mi John Newton-a chu he lei taksa hrehawmna kalsanin a Chhandamtu Lalpa hnenah chatuana a nun chawlhna a chang ta. A thih kum thlengin, midel chung pawh chuan thu a hril thin a. Tluksantu ni thin kha, ringtu tha a lo ni ta, John Newton-a chuan Khawngaihna makin a van in a hruai thleng ngei dawn tih rinnaah a chiang hle a ni.
No comments:
Post a Comment